ന്യൂഡൽഹി: (KVARTHA) ലോക്‌സഭയിൽ 'ഒരു രാജ്യം ഒരു തിരഞ്ഞെടുപ്പ്' (ഒഎൻഒഇ) ബിൽ അവതരിപ്പിക്കുന്നതിനുള്ള വോട്ടെടുപ്പിനിടെ ഹാജരാകാതിരുന്ന ബിജെപിയിലെ 20 ലധികം എംപിമാർക്ക് നോട്ടീസ് അയക്കാൻ പാർട്ടി തീരുമാനിച്ചതായി മാധ്യമങ്ങൾ റിപ്പോർട്ട് ചെയ്‌തു. ചൊവ്വാഴ്ച ഹാജരാകാൻ എംപിമാർക്ക് പാർട്ടി വിപ്പ് നൽകിയിരുന്നു.

കേന്ദ്രമന്ത്രിമാരായ നിതിൻ ഗഡ്കരി, ജ്യോതിരാദിത്യ സിന്ധ്യ, ഗിരിരാജ് സിംഗ്, സിആർ പാട്ടീൽ തുടങ്ങിയ പ്രമുഖർ അടക്കമുള്ളവരാണ് ഹാജരാകാതിരുന്നത്. ശന്തനു താക്കൂർ, ജഗദാംബിക പാൽ, ബി വൈ രാഘവേന്ദ്ര, വിജയ് ബാഗേൽ, ഉദയ്‌രാജെ ഭോൺസാലെ, ജഗന്നാഥ് സർക്കാർ, ജയന്ത് കുമാർ റോയ്, വി സോമണ്ണ, ചിന്താമണി മഹാരാജ് എന്നിവരും സഭയിൽ ഇല്ലായിരുന്നു. മുൻകൂർ പരിപാടിയുള്ളത് കൊണ്ടാണോ ഇവർ ഹാജരാകാതിരുന്നതെന്ന് വ്യക്തമല്ല. 

ലോക്‌സഭയിലേക്കും സംസ്ഥാന നിയമസഭകളിലേക്കും ഒരേസമയം തിരഞ്ഞെടുപ്പുകൾ നിർദേശിക്കുന്ന ഭരണഘടന (നൂറ്റി ഇരുപത്തിയൊമ്പതാം ഭേദഗതി) ബിൽ, 2024', 'കേന്ദ്രഭരണ പ്രദേശങ്ങളുടെ നിയമങ്ങൾ (ഭേദഗതി) ബിൽ, 2024' എന്നിവയാണ് കേന്ദ്ര നിയമമന്ത്രി അർജുൻ റാം മേഘ്‌വാൾ ചൊവ്വാഴ്ച ലോക്‌സഭയിൽ അവതരിപ്പിച്ചത്.

ബിൽ അവതരിപ്പിക്കുന്നതിനെ പ്രതിപക്ഷ അംഗങ്ങൾ ശക്തമായി എതിർക്കുകയും ഡിവിഷൻ ആവശ്യപ്പെടുകയും ചെയ്‌തു. ഡിവിഷനിൽ 269 അംഗങ്ങൾ ബില്ലിൻ്റെ അവതരണത്തെ അനുകൂലിച്ചും 196 പേർ എതിർത്തും വോട്ട് ചെയ്തു. ബില്ലിൻ്റെ അവതരണത്തെ സംബന്ധിച്ചിടത്തോളം ഇത് ബിജെപിക്ക് ഭീഷണിയായില്ലെങ്കിലും സുപ്രധാന ദിനത്തിൽ ചിലർ ഹാജരാകാതിരുന്നത് പ്രതിപക്ഷം ഉയർത്തിക്കാട്ടി.

#BJP, #LokSabha, #OneNationOneElection, #MPAbsence, #ParliamentaryProcedure, #BJPWhip