കൊല്ലം: (KVARTHA) സമരവീര്യമുള്ള മോറാഴയുടെ മണ്ണിൽ നിന്നും ഉയർന്നുവന്ന വ്യക്തിത്വമാണ് എം.വി. ഗോവിന്ദൻ മാസ്റ്റർ. സാമ്രാജ്യത്വ ശക്തികൾക്കെതിരെ കർഷക പോരാട്ടങ്ങൾ കൊടുമ്പിരി കൊണ്ട മണ്ണിൽ ജനിച്ച അദ്ദേഹം, ബാലസംഘത്തിലൂടെയും ഗ്രന്ഥശാല പ്രസ്ഥാനത്തിലൂടെയും പൊതുരംഗത്തേക്ക് കടന്നുവന്നു. പിന്നീട് സിപിഎം സംസ്ഥാന സെക്രട്ടറി വരെയായി അദ്ദേഹം വളർന്നു. അരനൂറ്റാണ്ടിൽ അധികം നീണ്ട പൊതുപ്രവർത്തന പാരമ്പര്യവുമായാണ് അദ്ദേഹം വീണ്ടും കേരള സിപിഎമ്മിന്റെ അമരത്ത് എത്തുന്നത്.

ബാല്യം, വിദ്യാർത്ഥി രാഷ്ട്രീയം, യുവജന പ്രസ്ഥാനങ്ങളിലെ പങ്ക്

1953 ഏപ്രിൽ 23-ന് കണ്ണൂർ ജില്ലയിലെ മോറാഴയിൽ കുഞ്ഞമ്പുവിന്റെയും മാധവിയമ്മയുടെയും മകനായിട്ടാണ് എം വി ഗോവിന്ദൻ മാസ്റ്റർ ജനിച്ചത്. വിദ്യാർത്ഥി രാഷ്ട്രീയത്തിലൂടെ വളർന്നു വന്ന അദ്ദേഹം, കണ്ണൂർ ജില്ലാ യൂത്ത് ഫെഡറേഷൻ ഭാരവാഹിയായിരുന്നു. പിന്നീട് കേരള സ്റ്റേറ്റ് യൂത്ത് ഫെഡറേഷൻ (കെഎസ്വൈഎഫ്) രൂപീകരിച്ചപ്പോൾ അതിന്റെ മുൻനിര നേതാവായി. 

ഡെമോക്രാറ്റിക് യൂത്ത് ഫെഡറേഷൻ ഓഫ് ഇന്ത്യയുടെ (DYFI) സ്ഥാപക നേതാക്കളിൽ ഒരാളും അഖിലേന്ത്യാ പ്രിപ്പറേറ്ററി കമ്മിറ്റിയിലും കേന്ദ്ര കമ്മിറ്റിയിലും അംഗവുമായിരുന്നു അദ്ദേഹം. ഡി.വൈ.എഫ്.ഐ. സംസ്ഥാന സെക്രട്ടറി, പ്രസിഡന്റ് എന്നീ നിലകളിലും അദ്ദേഹം പ്രവർത്തിച്ചു. അദ്ധ്യാപക ജോലി ഉപേക്ഷിച്ച് അദ്ദേഹം പൂർണ്ണസമയ രാഷ്ട്രീയ പ്രവർത്തകനായി മാറുകയായിരുന്നു.

അടിയന്തരാവസ്ഥയിലെയും തിരഞ്ഞെടുപ്പിലെയും പോരാട്ടങ്ങൾ 

അടിയന്തരാവസ്ഥക്കെതിരെ പ്രതിഷേധിച്ചതിന് നാല് മാസത്തോളം ജയിൽവാസം അനുഭവിച്ച ഗോവിന്ദൻ മാസ്റ്റർ പൊലീസിന്റെ ക്രൂരമായ മർദ്ദനങ്ങൾക്ക് ഇരയായി. ഗോവിന്ദൻ മാസ്റ്റർ പാർലമെന്ററി രംഗത്തും കഴിവ് തെളിയിച്ചു. 2021ൽ തളിപ്പറമ്പിൽ നിന്നും വൻ ഭൂരിപക്ഷത്തോടെ വിജയിച്ച് പതിനഞ്ചാം കേരള നിയമസഭയിൽ അംഗമായി. ഇതിനു മുൻപ് പത്ത് വർഷം എംഎൽഎ ആയിരുന്ന അദ്ദേഹം, 1996 മുതൽ 2006 വരെ തളിപ്പറമ്പ എംഎൽഎ ആയിരുന്നു.  

1980-കളുടെ ആദ്യ പകുതിയിൽ കാസർകോട് താലൂക്ക് സെക്രട്ടറിയായി പ്രവർത്തിച്ച അദ്ദേഹം, അവിഭക്ത കണ്ണൂർ ജില്ലയുടെ വടക്കൻ മലബാർ മേഖലയിൽ ഇടതുപക്ഷത്തിന് ശക്തമായ അടിത്തറ ഉണ്ടാക്കുന്നതിൽ പ്രധാന പങ്കുവഹിച്ചു. 2002-ൽ സിപിഎം കണ്ണൂർ ജില്ലാ സെക്രട്ടറിയായി. പിന്നീട് എറണാകുളം ജില്ലാ സെക്രട്ടറിയായപ്പോഴും അവിടെയും പാർട്ടിക്ക് അദ്ദേഹം കരുത്ത് പകർന്നു. 

2006-ൽ സിപിഐഎം സംസ്ഥാന സെക്രട്ടറിയേറ്റിലേക്കും 2018-ൽ കേന്ദ്ര കമ്മിറ്റിയിലേക്കും തിരഞ്ഞെടുക്കപ്പെട്ടു. തുടർന്ന് പൊളിറ്റ് ബ്യൂറോ അംഗമായി. കണ്ണൂർ ജില്ലാ റെഡ് വളണ്ടിയർ ആർമിയുടെ ക്യാപ്റ്റനായും വളരെക്കാലം അദ്ദേഹം പ്രവർത്തിച്ചു. രണ്ടാം പിണറായി മന്ത്രിസഭയിൽ എക്സൈസ് തദ്ദേശ സ്വയംഭരണ വകുപ്പ് മന്ത്രിയായും അദ്ദേഹം സേവനമനുഷ്ഠിച്ചു. കോടിയേരി ബാലകൃഷ്ണന്റെ നിര്യാണത്തെ തുടർന്ന് 2022 ഓഗസ്റ്റ് 28നാണ് എം വി ഗോവിന്ദൻ ആദ്യമായി സിപിഎം സംസ്ഥാന സെക്രട്ടറി സ്ഥാനത്തേക്ക് എത്തുന്നത്. 

കർഷക തൊഴിലാളി യൂണിയൻ നേതൃത്വം 

കേരള സംസ്ഥാന കർഷക തൊഴിലാളി യൂണിയൻ സംസ്ഥാന പ്രസിഡന്റ് എന്ന നിലയിൽ സമൂഹത്തിലെ പാർശ്വവൽക്കരിക്കപ്പെട്ട വിഭാഗങ്ങൾക്ക് വേണ്ടി അദ്ദേഹം നിരവധി പോരാട്ടങ്ങൾ നയിച്ചു. നെൽവയലുകളും തണ്ണീർത്തടങ്ങളും സംരക്ഷിക്കുന്നതിന് വേണ്ടിയുള്ള പാരിസ്ഥിതിക സംരക്ഷണ പോരാട്ടങ്ങളിലും അദ്ദേഹം കർഷക തൊഴിലാളി പ്രസ്ഥാനത്തിന് നേതൃത്വം നൽകി. അഖിലേന്ത്യാ കർഷക തൊഴിലാളി യൂണിയൻ ദേശീയ വൈസ് പ്രസിഡന്റുമായിരുന്നു. ഇഎംഎസ് അക്കാദമിയുടെ ചുമതലയും വഹിച്ചു.

സാഹിത്യ സംഭാവനകൾ

മാർക്സിസ്റ്റ് സംവാദം മാസികയുടെ പത്രാധിപരായും ദേശാഭിമാനിയുടെ ചീഫ് എഡിറ്ററായും പ്രവർത്തിച്ചിട്ടുണ്ട്. സ്വത്വരാഷ്ട്രീയത്തെപ്പറ്റി (എഡിറ്റർ), വൈരുദ്ധ്യാത്മക ഭൗതികവാദം ഇന്ത്യൻ ദർശനത്തിൽ, ചൈനീസ് ഡയറി, യുവജനപ്രസ്ഥാനത്തിന്റെ ചരിത്രം:ആശയസമരങ്ങ ളുടെ പശ്ചാത്തലത്തിൽ, കർഷകത്തൊഴിലാളി യൂണിയൻ: ചരിത്രവും വർത്തമാനവും, മാർക്‌സിസ്റ്റ് ദർശനം ഇന്ത്യൻ പശ്ചാത്തലത്തിൽ, കാടുകയറുന്ന ഇന്ത്യൻ മാവോവാദം തുടങ്ങിയ നിരവധി ഗ്രന്ഥങ്ങൾ അദ്ദേഹം രചിച്ചിട്ടുണ്ട്.

എം.വി. ഗോവിന്ദൻ മാസ്റ്റർ, കേരള രാഷ്ട്രീയത്തിലും സാമൂഹ്യ പ്രസ്ഥാനങ്ങളിലും തൻ്റേതായ വ്യക്തിമുദ്ര പതിപ്പിച്ച ഒരു അതുല്യ വ്യക്തിത്വമാണ്. അദ്ദേഹത്തിൻ്റെ ജീവിതം സമരവീര്യത്തിൻ്റെയും പോരാട്ടത്തിൻ്റെയും പ്രതീകമാണ്. ആ കരുത്തിനുള്ള അംഗീകാരമായാണ് ഒരിക്കൽ കൂടി കേരളത്തിൽ സിപിഎമ്മിനെ നയിക്കാൻ നിയോഗം ലഭിച്ചത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

MV Govindan, a key CPM leader from Kannur, has been a prominent figure in Kerala's political and social movements, having led various organizations and movements over decades.

 #MVGovindan, #CPM, #KeralaPolitics, #SocialMovements, #PoliticalLeader, #CPMLegacy