നിലമ്പൂർ രാഷ്ട്രീയത്തിൽ അപ്രതീക്ഷിത നീക്കം: മത്സരിക്കാനില്ല, പിണറായിസത്തിനെതിരെ പോരാട്ടം തുടരും; യുഡിഎഫിലേക്കില്ലെന്നും പി വി അൻവർ

നിലമ്പൂർ: (KVARTHA) ഉപതെരഞ്ഞെടുപ്പിൽ മത്സരിക്കാനില്ലെന്ന് മുൻ എംഎൽഎ പി.വി. അൻവർ. സാമ്പത്തിക ബുദ്ധിമുട്ടുകൾ കാരണമാണ് മത്സരത്തിൽ നിന്ന് പിന്മാറുന്നതെന്ന് അദ്ദേഹം വാർത്താസമ്മേളനത്തിൽ അറിയിച്ചു. 

കോടികളുടെ കടബാധ്യതയുള്ളതിനാൽ മത്സരിക്കാനുള്ള പണമില്ല. യു.ഡി.എഫിലേക്ക് താനില്ലെന്നും പിണറായി വിജയന്റെ രാഷ്ട്രീയത്തിനെതിരായ പോരാട്ടം തുടരുമെന്നും അൻവർ വ്യക്തമാക്കി.

പ്രതിപക്ഷ നേതാവ് വി.ഡി. സതീശനെ അൻവർ രൂക്ഷമായി വിമർശിച്ചു. സതീശൻ അഹങ്കാരിയാണെന്നും കെ.സി. വേണുഗോപാലിനെ പോലും കാണാൻ അദ്ദേഹം സമ്മതിച്ചില്ലെന്നും അൻവർ ആരോപിച്ചു. യു.ഡി.എഫിലെ മറ്റ് നേതാക്കൾക്ക് തന്നോട് എതിർപ്പില്ലെന്നും അൻവർ പറഞ്ഞു. 

യു.ഡി.എഫിലെ ചിലർ തനിക്കെതിരെ പ്രവർത്തിച്ചതായും അൻവർ ആരോപിച്ചു. യു.ഡി.എഫുമായി സഹകരിക്കണമെന്ന് ആവശ്യപ്പെട്ടത് മുസ്‌ലിം ലീഗ് നേതാവ് പി.കെ. കുഞ്ഞാലിക്കുട്ടിയാണ്. സതീശനെ കണ്ടപ്പോൾ യു.ഡി.എഫ് പ്രവേശനം രണ്ട് ദിവസത്തിനകം പ്രഖ്യാപിക്കാമെന്ന് പറഞ്ഞിരുന്നു. എന്നാൽ, ഇതുവരെ ഒന്നും പ്രഖ്യാപിച്ചില്ല.

ആര്യാടൻ ഷൗക്കത്തിനെ സ്ഥാനാർഥിയാക്കാൻ പറ്റില്ലെന്ന് പറഞ്ഞതിന് കാരണമുണ്ടെന്നും അൻവർ വ്യക്തമാക്കി. മലയോര ജനതയുടെ പ്രശ്നങ്ങളാണ് പ്രധാനമെന്നും അതിനാൽ വി.എസ്. ജോയിയെ സ്ഥാനാർഥിയാക്കണമെന്നാണ് താൻ ആവശ്യപ്പെട്ടതെന്നും അൻവർ പറഞ്ഞു. 

ഷൗക്കത്ത് തോറ്റാൽ എന്ത് ചെയ്യുമെന്നതിനാലാണ് എതിർത്തത്. സ്വീകരിക്കേണ്ടവർ തന്നെ സ്വീകരിക്കുന്നില്ല. ചർച്ചകളിൽ വ്യക്തത വന്നിരുന്നില്ല. അതിനായി കാത്തിരുന്നു. പിണറായിസത്തിനെതിരെ നിൽക്കാതെ അൻവറിനെതിരെ അവർ തിരിഞ്ഞു. എൽ.ഡി.എഫിൽ നിന്ന് എം.എൽ.എ സ്ഥാനം രാജിവെച്ച് ഇറങ്ങി വന്നത് ആരെയും കണ്ടല്ല. സാധാരണക്കാരെ കണ്ടാണ് തൻ്റെ പ്രവർത്തനം. ഒരുപാട് ശത്രുക്കളെ താൻ ഉണ്ടാക്കിയിട്ടുണ്ട്.

സോഷ്യലിസവും മതേതരത്വവുമാണ് കമ്യൂണിസ്റ്റ് പാർട്ടിയിലേക്ക് ആകർഷിച്ചത്. എന്നാൽ സി.പി.എം വർഗീയ നിലപാടുകളിലേക്ക് മാറി. സോഷ്യലിസം പാർട്ടി കൈവിട്ടു. സാധാരണക്കാർക്ക് വേണ്ടി സംസാരിച്ചപ്പോഴാണ് താൻ അധികപ്രസംഗിയായത്. ആ അധികപ്രസംഗം തുടരും. ഭൂരിപക്ഷത്തെ കണ്ട് ഭയപ്പെട്ട് പിന്നോട്ട് പോകാൻ ഉദ്ദേശിക്കുന്നില്ലെന്നും പോരാട്ടം തുടരുമെന്നും അൻവർ വ്യക്തമാക്കി.

നിലമ്പൂരിലെ പി.വി. അൻവറിന്റെ നിർണ്ണായക രാഷ്ട്രീയ നിലപാടുകളെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Summary: PV Anvar MLA announced he won't contest the Nilambur by-election due to financial difficulties. He stated he won't join UDF and will continue his fight against 'Pinarayism'.

#PVAnvar #NilamburPolitics #KeralaPolitics #ByElection #Pinarayism #UDF