നിലമ്പൂരിൽ ആര് തോൽക്കണം? ഉപതെരഞ്ഞെടുപ്പിലെ രാഷ്ട്രീയ സമവാക്യങ്ങൾ

സി കെ എ ജബ്ബാർ

(KVARTHA) രണ്ടാം പിണറായി സർക്കാർ വന്നതിനു ശേഷമുള്ള നാലാമത്തെ നിയമസഭാ ഉപതെരഞ്ഞെടുപ്പാണ് നിലമ്പൂരിൽ നടക്കാൻ പോകുന്നത്. ഇതുവരെ നടന്ന മൂന്ന് ഉപതെരഞ്ഞെടുപ്പ് ഫലങ്ങളും സ്വാഭാവിക രാഷ്ട്രീയ പാരമ്പര്യത്തിൻ്റെ തനിയാവർത്തനമായിരുന്നുവെങ്കിൽ, നിലമ്പൂരിൽ വലിയൊരു പ്രതിഫലനത്തിൻ്റെ ജനവിധിയുണ്ടാകണമെന്ന് കണക്കുകൂട്ടുന്നവർക്ക് ഒന്നാം ഘട്ടത്തിൽത്തന്നെ ആശയക്കുഴപ്പങ്ങളുണ്ട്.
 

ഈ ആശയക്കുഴപ്പത്തിലേക്ക് വലയെറിയുന്ന ഒരു സ്ഥാനാർത്ഥി നിർണ്ണയവുമായി ഇടതുമുന്നണി കടന്നുവരുന്നതോടെ നിലമ്പൂർ ഇരുമുന്നണികളുടെയും വലിയ ഭാഗ്യപരീക്ഷണമായി മാറും.

ഉമ്മൻചാണ്ടിയുടെ നിര്യാണത്തെത്തുടർന്ന് പുതുപ്പള്ളിയിൽ നടന്ന ഉപതെരഞ്ഞെടുപ്പ് സ്വാഭാവിക ജനവിധിയോടെയാണ് കടന്നുപോയത്. ഷാഫി പറമ്പിൽ പാർലമെൻ്റംഗമായതിനെത്തുടർന്ന് നടന്ന പാലക്കാട് ഉപതെരഞ്ഞെടുപ്പിലും ഏതെങ്കിലും ഒരു രാഷ്ട്രീയ ചലനം പ്രകടമായിരുന്നില്ല. കഴിഞ്ഞ 28 വർഷമായി എൽ.ഡി.എഫ്. കൈവശം വെച്ചിരുന്ന ചേലക്കര ഉപതെരഞ്ഞെടുപ്പിൽ കടുത്ത മത്സരം സൃഷ്ടിച്ച് യു.ഡി.എഫ്. രമ്യ ഹരിദാസിനെ നിർത്തി പോരാടിയെങ്കിലും ഇടതുമുന്നണി തന്നെ വിജയിച്ചു.

ചേലക്കരയിൽ രമ്യയെ പരീക്ഷിച്ചുണ്ടാക്കിയ അതേ രാഷ്ട്രീയ സമ്മർദ്ദം നിലമ്പൂരിലും ഉണ്ടാകണമെന്ന് പ്രതീക്ഷിച്ചവർക്ക് വലിയ നിരാശ നൽകിയാണ് യു.ഡി.എഫിൻ്റെ സ്ഥാനാർത്ഥി പ്രഖ്യാപനം നടന്നിട്ടുള്ളത്. 'പിണറായിസം' എന്നൊരു രാഷ്ട്രീയ മുദ്രാവാക്യം മുന്നിൽ വെച്ചുകൊണ്ട് നിലമ്പൂരിൽ സംസ്ഥാന സർക്കാരിനെതിരായ ജനവിധിയുടെ പ്രതിഫലനം സൃഷ്ടിക്കാൻ കാത്തിരിക്കുന്നവരാണ് യു.ഡി.എഫ്. ഏറെയും. അതിൻ്റെ സാധ്യത എത്രത്തോളമുണ്ടെന്ന് പരിശോധിക്കേണ്ട സന്ദർഭമാണിത്.

ഉപതെരഞ്ഞെടുപ്പിൻ്റെ സിദ്ധാന്തം
 

രണ്ടാം പിണറായി സർക്കാർ അഭിമുഖീകരിച്ച മറ്റ് മൂന്ന് ഉപതെരഞ്ഞെടുപ്പുകളിൽ നിന്ന് നിലമ്പൂരിനെ വേർതിരിക്കുന്ന ഘടകം തിരഞ്ഞെടുപ്പിലേക്ക് നയിച്ച രാഷ്ട്രീയ സാഹചര്യമാണ്. ഏതെങ്കിലും ഒരു അനിവാര്യതയിൽ നിന്നുണ്ടായ ഉപതെരഞ്ഞെടുപ്പല്ല നിലമ്പൂരിലേത്. നിലവിലെ എം.എൽ.എ. എന്ന നിലയിൽ പി.വി. അൻവർ ഇടത് സർക്കാരിനെതിരായി ഉയർത്തിയ രാഷ്ട്രീയപരമായ ചോദ്യങ്ങളുടെ തീവ്രമായ പരിണിതഫലമാണിത്.

അതുകൊണ്ടുതന്നെ മറ്റ് ഉപതെരഞ്ഞെടുപ്പുകളിൽ നിന്ന് നിലമ്പൂരിനെ ഇത് ഏറെ വ്യത്യസ്തമാക്കുന്നുണ്ട്. എന്താണോ ഉപതെരഞ്ഞെടുപ്പിന് കാരണമായ രാഷ്ട്രീയം, അത് ഉയർത്തിപ്പിടിക്കേണ്ടതും ജനങ്ങൾ വിധിയെഴുതേണ്ടതുമായ ഒരു പ്രധാന വിഷയമാണിത്. അതുകൊണ്ടാണ് യു.ഡി.എഫിൻ്റെ സ്ഥാനാർത്ഥി നിർണ്ണയം തുടക്കം മുതലേ ആശയക്കുഴപ്പമായി എന്ന് രാഷ്ട്രീയ നിരീക്ഷകർ ചൂണ്ടിക്കാണിക്കുന്നത്.

പി.വി. അൻവറിൻ്റെ വെടിക്കെട്ടുകൾ:
 

ഏകദേശം കാൽനൂറ്റാണ്ട് നീണ്ടുനിന്ന കോൺഗ്രസ് ആധിപത്യം തകർത്ത് സി.പി.എം. സ്വതന്ത്രനായി മത്സരിച്ച് നിലമ്പൂർ പിടിച്ചെടുത്ത പി.വി. അൻവറിൻ്റെ വ്യക്തിപ്രഭാവം ശ്രദ്ധേയമായിരുന്നു. അദ്ദേഹം രാജിവെക്കാനിടയായ വിവാദങ്ങൾ സർക്കാരിനെ പ്രതിരോധത്തിലാക്കി. പിണറായി സർക്കാരിൽ പിടിമുറുക്കിയ അധികാര കേന്ദ്രങ്ങളെ അദ്ദേഹം തുറന്നുകാട്ടി.

എ.ഡി.ജി.പി. എം.ആർ. അജിത്കുമാറിനെതിരായ ആരോപണങ്ങൾ പല വഴികളിലൂടെയും വികസിച്ചു. തുടക്കത്തിൽ അൻവറിനെ അനുനയിപ്പിക്കാൻ പിണറായി വിജയൻ നേരിട്ട് ഇടപെട്ടു. ഒടുവിൽ എല്ലാം താളം തെറ്റിയപ്പോൾ ഇടതുമുന്നണി അദ്ദേഹത്തെ കൈയൊഴിഞ്ഞു. ഇതിനെത്തുടർന്നാണ് എം.എൽ.എ. സ്ഥാനം രാജിവെച്ച് ശക്തമായ ഒരു രാഷ്ട്രീയ വെല്ലുവിളിയുമായി അൻവർ തുറന്ന പോരാട്ടത്തിനിറങ്ങിയത്.

അൻവറിൻ്റെ ജീവന് ഭീഷണിയുണ്ടെന്ന വാർത്തകൾ പരന്നു. നാല് ഗൺമാൻമാരെയും അൻവറിൻ്റെ വീടിന് പോലീസ് സംരക്ഷണവും നൽകി. പി. ശശി ഉൾപ്പെടെ നൽകിയ 28 ഓളം കേസുകളിൽ അൻവർ കുടുങ്ങി. പാസ്പോർട്ടിന് അപേക്ഷിക്കാൻ പോലും കഴിയാതെ 1.86 ലക്ഷം പെറ്റിക്കേസുകളിൽ കുരുങ്ങിപ്പോയ യുവാക്കളുടെ കഥ പറഞ്ഞാണ് അൻവർ മലപ്പുറത്തെ ജനശ്രദ്ധ നേടിയത്. സംഘപരിവാർ നേതൃത്വത്തിൻ്റെ മറ്റൊരു മനസ്സാണ് മലപ്പുറത്തിൻ്റെ കാര്യത്തിൽ സി.പി.എമ്മിലെ ചിലർക്കെന്ന് അദ്ദേഹം കാര്യകാരണസഹിതം തുറന്നുകാട്ടി.

അൻവറിൻ്റെ രംഗപ്രവേശം യു.ഡി.എഫിന് ഏറെ രാഷ്ട്രീയ നേട്ടം നൽകുന്ന ഒന്നായിരുന്നു. പക്ഷേ, അത് സ്വന്തം രാഷ്ട്രീയ പക്ഷത്ത് മുതലെടുക്കുന്നതിന് യു.ഡി.എഫിന് മുന്നിൽ തടസ്സങ്ങളുണ്ടായി. അൻവർ തൃണമൂൽ കോൺഗ്രസിൽ ചേർന്ന് അതിൻ്റെ സംസ്ഥാന ഘടകം കേരളത്തിൽ രൂപീകരിച്ചപ്പോഴും യു.ഡി.എഫുമായി യോജിച്ച മുന്നേറ്റം ഉണ്ടാകുമെന്നാണ് പ്രതീക്ഷിക്കപ്പെട്ടത്. പക്ഷേ, ആര്യാടൻ ഷൗക്കത്തിനെ സ്ഥാനാർത്ഥിയായി പ്രഖ്യാപിച്ചതോടെ കാര്യങ്ങൾ മാറിമറിഞ്ഞു.

യു.ഡി.എഫ്. നേതൃത്വവുമായി കൂടിക്കാഴ്ച നടത്തി മൂന്നു മാസമായിട്ടും കൂടിക്കാഴ്ചയുടെ ഉള്ളടക്കം പ്രഖ്യാപിക്കാതെ തന്നോട് വഞ്ചനാപരമായ സമീപനമാണ് സ്വീകരിച്ചിരിക്കുന്നതെന്ന് അൻവർ ബുധനാഴ്ച നടത്തിയ വാർത്താ സമ്മേളനത്തിൽ പ്രഖ്യാപിച്ചു. മുസ്ലിം ലീഗ് നേതൃത്വം അൻവറിനെ അനുനയിപ്പിക്കാൻ മുൻകൈയെടുത്തുവെങ്കിലും കെ.പി.സി.സി. തലത്തിൽ ഇതിൻ്റെ തുടർച്ച ഉണ്ടായിട്ടില്ല. കെ.സി. വേണുഗോപാലുമായി സംസാരിച്ച ശേഷമായിരിക്കും ഉപതെരഞ്ഞെടുപ്പിലെ തൻ്റെ നിലപാടെന്ന് അൻവർ വെളിപ്പെടുത്തിക്കഴിഞ്ഞു.
 

അൻവറിനെ നിലമ്പൂരിൽ നിന്ന് ഉയർത്തിക്കൊണ്ടുവന്ന സി.പി.എമ്മിന് പരമ്പരാഗത രാഷ്ട്രീയ പൈതൃകത്തിൻ്റെ ആത്മീയത കൂടിയുണ്ടായിരുന്നു.

നിലമ്പൂർ മണ്ഡലം രൂപീകരിച്ച ശേഷം 1965ൽ നടന്ന ആദ്യ പൊതുതിരഞ്ഞെടുപ്പിൽ സി.പി.ഐ. ഉൾപ്പെട്ട കോൺഗ്രസ് മുന്നണിയുടെ സ്ഥാനാർത്ഥിയായിരുന്ന ആര്യാടനെ തോൽപ്പിച്ച് സി.പി.എമ്മിലെ കെ. കുഞ്ഞാലി വിജയിച്ച പാരമ്പര്യമുള്ള മണ്ഡലമാണിത്. പിന്നീട് മാറിമാറി വിജയപരാജയങ്ങൾ അനുഭവിച്ച ശേഷം ആര്യാടൻ മുഹമ്മദ് പടുത്തുയർത്തിയ കോട്ടയെ തകർത്തത് അൻവറാണ്.

അതിനാൽ, അൻവറിൻ്റെ പിന്മാറ്റം നിലമ്പൂരിൽ സി.പി.എമ്മിന് വലിയ തിരിച്ചടിയാണ്. ഈ സാഹചര്യത്തിലാണ് ഉപതെരഞ്ഞെടുപ്പ് കേരള രാഷ്ട്രീയത്തെത്തന്നെ സ്വാധീനിക്കുന്ന ഘടകമുണ്ടെന്ന് വിലയിരുത്തപ്പെടുന്നത്.

മുസ്ലിം ലീഗിൻ്റെ ദൗത്യം

മതേതരത്വത്തിൻ്റെ പേരിൽ ആര്യാടൻ മുഹമ്മദ് മുസ്ലിം രാഷ്ട്രീയത്തോട് പൊതുവെ വെച്ചുപുലർത്തിയ സമീപനത്തിൽ എക്കാലത്തും വർഗീയതയുടെ മുദ്രകുത്തലിന് വിധേയമായ സംഘടനയാണ് മുസ്ലിം ലീഗ്. കെ. കുഞ്ഞാലിക്ക് ശേഷം നിലമ്പൂരിൽ ജനപ്രതിനിധിയായി ഉയർന്നുവന്ന ആര്യാടൻ്റെ മതേതര നിലപാട് മണ്ഡലത്തിലെ കമ്മ്യൂണിസ്റ്റ് അനുഭാവികളെയും സംഘപരിവാർ മനസ്സുള്ളവരെപ്പോലും തൃപ്തിപ്പെടുത്തുന്നതായിരുന്നു.

ഒരല്പം സാംസ്കാരിക പരിവേഷത്തിൻ്റെ ചേരുവകൂടി ചേർത്ത് ബാപ്പയുടെ സമീപനത്തിൻ്റെ മൂർച്ചയുള്ള നാവായിട്ടാണ് ഷൗക്കത്തും മുന്നോട്ടുപോയത്. വിശ്വാസപരമായ ശീലങ്ങളോട് പോലും പരിഹാസ്യമായ രീതിയിൽ അദ്ദേഹം പ്രതികരിച്ചു. കൊടപ്പനക്കൽ തറവാട് പോലും ഷൗക്കത്തിൻ്റെ ലക്ഷ്മണരേഖയ്ക്ക് പുറത്തായിരുന്നില്ല.

മതേതര സർട്ടിഫിക്കറ്റിനുവേണ്ടി സ്വന്തം സമുദായത്തെ കിട്ടാവുന്നിടത്തൊക്കെ ആക്രമിക്കുകയും കരിവാരിത്തേക്കുകയും ചെയ്യുന്ന പ്രവണത എന്നും അദ്ദേഹം പിന്തുടർന്നു. ഇങ്ങനെയൊരാളെ വിജയിപ്പിക്കുക എന്നത് മാത്രമല്ല, മുന്നണി മര്യാദയുടെ പേരിൽ മുസ്ലിം ലീഗ് ഇപ്പോൾ ദൗത്യമായി ഏറ്റെടുത്തിരിക്കുന്നത്.

പി.വി. അൻവർ ഉന്നയിച്ച പരാതികളിൽ മുഖ്യം ഷൗക്കത്തിൻ്റെ സ്ഥാനാർത്ഥിത്വമാണ്. എല്ലാം പൊറുക്കണം, ഒരുമിച്ച് നിൽക്കണം എന്ന ക്ഷമാപണ രീതിയിൽ അൻവറിനെ അനുനയിപ്പിക്കേണ്ട ചുമതലകൂടി മുസ്ലിം ലീഗ് നേതൃത്വത്തിന് മുന്നിലുണ്ട്. കഴിഞ്ഞ ദിവസങ്ങളിൽ കുഞ്ഞാലിക്കുട്ടിയും അൻവറും തമ്മിൽ പല ഘട്ടങ്ങളിൽ നടന്ന ആശയവിനിമയം അതിൻ്റെ ഭാഗമായിരുന്നു.

മക്കൾ രാഷ്ട്രീയമല്ലാത്ത മറുപുറം

മക്കൾ രാഷ്ട്രീയം കേരളത്തിന് പുതുമയുള്ള ഒന്നല്ല. നേതാക്കളുടെ മക്കളെക്കാൾ പിതാക്കളുടെ മക്കൾ നേതാവായി വാണിരുന്ന രാഷ്ട്രീയ പാരമ്പര്യമുണ്ട് കേരളത്തിൽ. സി.കെ. ചന്ദ്രപ്പൻ തിരുകൊച്ചി നിയമസഭാംഗമായ സി.കെ. കുമാരപ്പണിക്കരുടെ മകനായിരുന്നു. ബിനോയ് വിശ്വം കേരള രാഷ്ട്രീയത്തിൽ ഇന്ന് അറിയപ്പെടുന്ന നേതാവാണ്.

എന്നാൽ, ബിനോയ് വിശ്വം മുൻ നിയമസഭാംഗം സി.കെ. വിശ്വനാഥൻ്റെ മകനായിരുന്നു. അങ്ങനെ മകൻ, അച്ഛൻ, സഹോദരൻ, മകളുടെ ഭർത്താവ്, ഭാര്യയുടെ പിതാവ്, ഭാര്യയുടെ സഹോദരി, സഹോദരി, അനന്തരവളുടെ ഭർത്താവ് തുടങ്ങി പാരമ്പര്യമായും അല്ലാതെയും പലരും നിയമസഭാംഗങ്ങളും നേതാക്കളുമൊക്കെയായിട്ടുണ്ട്.

ആര്യാടൻ ഷൗക്കത്തിൻ്റെ വിഷയം മക്കൾ രാഷ്ട്രീയം മാത്രമല്ല. അതിനപ്പുറമാണ് കാര്യം. പി.വി. അൻവർ ഷൗക്കത്തിനെതിരായി ഉന്നയിച്ച പരാതികളിൽ മുഖ്യം അദ്ദേഹം കഴിഞ്ഞ കാലങ്ങളിൽ എപ്പോഴെങ്കിലും സി.പി.എമ്മിൻ്റെ വർഗീയ നിലപാടിനെതിരെ ശബ്ദിച്ചിട്ടുണ്ടോ എന്നതായിരുന്നു. ഇന്ത്യയിലെ രാഷ്ട്രീയ സാഹചര്യങ്ങളിലുണ്ടായ മാറ്റങ്ങളിൽ സവിശേഷമായത് സെക്യുലറിസ്റ്റുകൾ എന്ന് സ്വയം വിളിച്ചിരുന്ന മുസ്ലിം വ്യക്തിത്വങ്ങളിലെ പുനരാലോചനകളായിരുന്നു.

മുസ്ലിം സ്വത്വമുള്ള മുഴുവൻ മനുഷ്യരെയും അവരുടെ ചിന്തകൾ പുതുക്കാൻ ഇത് പ്രേരിപ്പിച്ചു. പലരും മുസ്ലിം അസ്തിത്വവാദത്തിനിടയിലേക്ക് മറയില്ലാതെ കടന്നുവന്നു. കെ.എം. ഷാജിയെപ്പോലെയുള്ളവർ പോലും വർഗീയതയുടെ ഉപമയിൽ ചില സംഘടനകളെ ചേർത്തുപറയുന്നത് മാറ്റിവെച്ചു. കാരണം, അത്രത്തോളം ഇന്ത്യ മാറിക്കൊണ്ടിരിക്കുകയാണെന്ന് അവർ തിരിച്ചറിഞ്ഞു.

യു.പി.യിൽ അഞ്ഞൂറോളം മുസ്ലിം പള്ളികളും മദ്രസകളും ബുൾഡോസർ വെച്ച് തകർത്ത വാർത്ത ഏതാനും ദിവസങ്ങൾക്ക് മുമ്പാണ് വന്നത്. ന്യൂനപക്ഷങ്ങൾക്ക് പരിമിതമായ അവകാശങ്ങളുള്ള, രണ്ടാംതരം പൗരന്മാരായി വേണമെങ്കിൽ ഭാരതത്തിൽ തുടരാം എന്ന് സവർക്കർ എഴുതിവെച്ച ഇന്ത്യ യാഥാർത്ഥ്യമായിക്കഴിഞ്ഞു എന്നും ആ ഇന്ത്യയിലാണ് ജീവിച്ചുകൊണ്ടിരിക്കുന്നത് എന്നും ബോധ്യപ്പെട്ടതുകൊണ്ടാണ് പലരിലും രാഷ്ട്രീയപരമായ നിലപാട് മാറ്റമുണ്ടായത്. ബജ്റംഗിമാരെയും മുന്നാമാരെയും തിരിച്ചറിയുന്ന ഈ കാലത്തും ഷൗക്കത്തിൻ്റെ വാക്കും പ്രവർത്തിയും എത്രത്തോളം മാറ്റമുണ്ടായി എന്ന് ചോദിക്കപ്പെടും. പി.വി. അൻവർ ഉന്നയിക്കുന്ന വിഷയവും ഇതാണ്.

പിണറായിസത്തെ തോൽപ്പിക്കുക എന്ന പൊതുവായ മുദ്രാവാക്യം ഉയർത്തിപ്പിടിക്കാവുന്ന വിധത്തിലുള്ള സി.പി.എം. വിരുദ്ധ വികാരമല്ല യു.ഡി.എഫ്. പ്രഖ്യാപിച്ച സ്ഥാനാർത്ഥിക്കുള്ളതെന്നാണ് അൻവർ ഉന്നയിക്കുന്നത്.

മണ്ഡലത്തിലെ അടിയൊഴുക്കുകൾ

നിലമ്പൂരിൽ കഴിഞ്ഞ തിരഞ്ഞെടുപ്പിൽ കോൺഗ്രസിലെ അടിയൊഴുക്കുകൾ ഉണ്ടായിരുന്നില്ലെങ്കിൽ അൻവറിന് വിജയം ആവർത്തിക്കാനാവില്ലായിരുന്നു എന്ന് വിശ്വസിക്കുന്നവരുണ്ട്. മൊത്തം പോൾ ചെയ്തതിൻ്റെ 46.90 ശതമാനം വോട്ട് പി.വി. അൻവർ കഴിഞ്ഞ തവണ നേടിയപ്പോൾ തൊട്ടടുത്ത സ്ഥാനാർത്ഥി വി.വി. പ്രകാശ് 45.34 ശതമാനം വോട്ട് നേടി ഇഞ്ചോടിഞ്ച് ഒപ്പമുണ്ടായിരുന്നു.

2016ൽ ആര്യാടൻ ഷൗക്കത്തിന് കിട്ടിയത് മൊത്തം പോൾ ചെയ്തതിൻ്റെ 40.83 ശതമാനം മാത്രമായിരുന്നു. 2011ൽ ആര്യാടൻ മുഹമ്മദ് നേടിയ വോട്ട് പോൾ ചെയ്തതിൻ്റെ 48.60 ശതമാനമായിരുന്നു. അതായത്, ആര്യാടന് കിട്ടുന്ന വോട്ട് ശതമാനം അതിനുശേഷം മകൻ മത്സരിച്ചിട്ടും, കഴിഞ്ഞ തവണ വി.വി. പ്രകാശ് മത്സരിച്ചിട്ടും കിട്ടിയില്ല.

ആര്യാടൻ മുഹമ്മദ് മത്സരിച്ച 2016ൽ ബി.ജെ.പി. 3120 വോട്ട് നേടിയ നിലമ്പൂരിൽ പി.വി. അൻവറിനെയും ആര്യാടൻ ഷൗക്കത്തിനെയും മുസ്ലിം ഐക്കണായി ഉയർത്തിക്കാട്ടി 2016ൽ ബി.ഡി.ജെ.എസ്. 12284 വോട്ട് നേടി തങ്ങളുടെ ഗ്രാഫ് ഉയർത്തി. കഴിഞ്ഞ തവണ യു.ഡി.എഫ്. സ്ഥാനാർത്ഥി വി.വി. പ്രകാശമായപ്പോൾ ആ വോട്ട് ബി.ജെ.പി.ക്ക് 8595 ആയി ചുരുങ്ങി.

ഇത്തവണ ഇടതുമുന്നണി ആര്യാടൻ ഷൗക്കത്തിനെതിരെ മുസ്ലിം സ്ഥാനാർത്ഥിയെ നിർത്തുമോ? അതോ കഴിഞ്ഞ തവണ കോൺഗ്രസ് സ്ഥാനാർത്ഥിയെപ്പോലെ മുസ്ലിം ലേബലില്ലാതെ നോക്കുമോ? ബി.ഡി.ജെ.എസ്സിൻ്റെ മേൽവിലാസത്തിൽ ബി.ജെ.പി. വീണ്ടും രംഗം ഉപയോഗിക്കാൻ ഒരുങ്ങുമ്പോൾ ഇടത് സ്ഥാനാർത്ഥിയുടെ പൈതൃകം വലിയ കൗതുകം തന്നെയായിരിക്കും.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: Nilambur by-election triggered by PV Anwar's resignation; UDF faces candidate selection issues.
 

#Nilambur, #ByElection, #KeralaPolitics, #PVAnwar, #UDF, #LDF