ഇടംവലം ചാടിയ അൻവർ സ്വന്തം കുഴിയിൽ; നിലമ്പൂരിൽ രാഷ്ട്രീയ ഭാവി ചോദ്യചിഹ്നത്തിൽ

കനവ് കണ്ണൂർ
 

(KVARTHA) ഇടത്തും വലത്തും മാറി മാറി ചാഞ്ചാടി, മുൻ നിലമ്പൂർ എം.എൽ.എ പി.വി. അൻവർ സ്വന്തം കുഴിയിൽ തന്നെ വീണിരിക്കുന്നു. യു.ഡി.എഫിൽ പ്രവേശനം ലഭിക്കാത്തതിലുള്ള അദ്ദേഹത്തിന്റെ വിലാപങ്ങൾ രാഷ്ട്രീയ എതിരാളികൾക്ക് മാത്രമല്ല, നിഷ്പക്ഷരായ വോട്ടർമാർക്ക് പോലും ചിരിക്കാനുള്ള വക നൽകുന്നു.

രാഷ്ട്രീയപരമായ പക്വതയില്ലാത്തതും, മുൻപിൻ ആലോചിക്കാതെ എടുത്തുചാടുന്ന സ്വഭാവവും, 'ഞാൻ' എന്ന അഹങ്കാരവുമാണ് അൻവറിനെ ഈ ദുരവസ്ഥയിലേക്ക് തള്ളിവിട്ടത്. നിലമ്പൂർ ഉപതെരഞ്ഞെടുപ്പിന്റെ ഫലം എന്തുതന്നെയായാലും, രാഷ്ട്രീയ ഭിക്ഷാംദേഹിയായി പി.വി. അൻവർ അപ്രസക്തനാകും.
 

വ്യക്തിപ്രഭാവവും സോഷ്യൽ മീഡിയയിലെ പിന്തുണയും കൊണ്ട് രാഷ്ട്രീയത്തിൽ നേട്ടമുണ്ടാക്കാമെന്ന മിഥ്യാധാരണയാണ് അദ്ദേഹത്തിന് ഉണ്ടായിരുന്നത്. ആൾക്കൂട്ടം പാർട്ടിയാകുമെന്നും, കൈയടിക്കുന്നവർ വോട്ടുകളായി മാറുമെന്നും അൻവർ കണക്കുകൂട്ടി. എന്നാൽ, രണ്ടുതവണ നിലമ്പൂരിൽ കഷ്ടിച്ച് വിജയിച്ചതിന് പിന്നിൽ സി.പി.എമ്മിന്റെ സംഘടനാശേഷിയും, എണ്ണയിട്ട യന്ത്രം പോലെ പ്രവർത്തിക്കുന്ന പ്രവർത്തകരുമുണ്ടായിരുന്നുവെന്ന് അദ്ദേഹം തിരിച്ചറിഞ്ഞില്ല.
 

കേരളത്തിൽ പിണറായിസമെന്നത് അതിശക്തമായ ഭരണസംവിധാനവും അധികാരപ്രയോഗവുമാണെന്ന് എൽ.ഡി.എഫ് സ്വതന്ത്ര എം.എൽ.എ സ്ഥാനം രാജിവെച്ചപ്പോഴാണ് അൻവർക്ക് ബോധ്യമായത്. എൽ.ഡി.എഫ്, യു.ഡി.എഫ്, അല്ലെങ്കിൽ എൻ.ഡി.എ എന്നീ മൂന്ന് മുന്നണികളിൽ ഏതെങ്കിലും ഒന്നിൽ ചേക്കേറിയാൽ മാത്രമേ പിടിച്ചുനിൽക്കാൻ കഴിയൂ.

ഇല്ലത്ത് നിന്ന് പുറപ്പെട്ടയാൾക്ക് അമ്മാനത്ത് എത്താൻ കഴിഞ്ഞില്ലെന്ന അവസ്ഥയിലാണ് ഇപ്പോൾ അൻവർ. എൽ.ഡി.എഫ് വിട്ട് യു.ഡി.എഫിലേക്ക് ചേക്കേറാൻ ശ്രമിച്ച അൻവർ ഇപ്പോൾ പെരുവഴിയിലായിരിക്കുകയാണ്. സ്വന്തം പ്രവർത്തികളുടെ ഫലമായി അദ്ദേഹം കുഴിയിൽ വീണു എന്ന് പറയാതെ വയ്യ.
 

പി.വി. അൻവർ എന്ന രാഷ്ട്രീയ നേതാവ് രാഷ്ട്രീയ കേരളത്തിന് മുൻപ് അത്ര പരിചിതനായിരുന്നില്ല. ദേശീയ പോരാട്ടങ്ങളിൽ കോൺഗ്രസിന് ശക്തി പകർന്ന ഒരു കുടുംബത്തിലെ അംഗമായിരുന്നു അൻവർ. അദ്ദേഹം പഠനകാലത്ത് കെ.എസ്.യുവിന്റെ സംഘടനാ പ്രവർത്തനങ്ങളിൽ പങ്കാളിയായിരുന്നു എന്നത് ഒഴിച്ചുനിർത്തിയാൽ, മലപ്പുറത്തെ കോൺഗ്രസുകാർക്ക് പോലും പി.വി. അൻവറിനെ അത്രയധികം പരിചയമുണ്ടായിരുന്നില്ല.
 

പഠനകാലം മുതൽ കെ. കരുണാകരന്റെ അടുത്ത അനുയായിയായിരുന്നു അൻവർ. കെ. മുരളീധരൻ കോഴിക്കോട് എം.പി.യായിരുന്ന കാലത്ത് അടുത്ത സുഹൃത്തുമായിരുന്നു. പരമ്പരാഗതമായി കോൺഗ്രസ് കുടുംബം എന്നതിനപ്പുറം അൻവറിന് രാഷ്ട്രീയത്തേക്കാൾ താല്പര്യം വ്യവസായത്തോടായിരുന്നു. റിയൽ എസ്റ്റേറ്റ് രംഗത്തും മറ്റും അദ്ദേഹം സജീവമായിരുന്നു. ഇതിനിടയിലാണ് കെ. കരുണാകരനും മുരളീധരനും ചേർന്ന് ഡി.ഐ.സി. രൂപീകരിക്കുന്നത്.

അതോടെ അൻവർ ഡി.ഐ.സി.യിൽ അംഗമായി. രാഷ്ട്രീയ പ്രവർത്തനത്തിലേക്കുള്ള അദ്ദേഹത്തിന്റെ ചുവടുവെപ്പ് അങ്ങനെയായിരുന്നു. 2011ൽ നടന്ന നിയമസഭാ തിരഞ്ഞെടുപ്പിൽ പി.വി. അൻവർ ഏറനാട് മണ്ഡലത്തിൽ സ്വതന്ത്ര സ്ഥാനാർത്ഥിയായി മത്സരിച്ചു. ഇത് തിരഞ്ഞെടുപ്പ് രാഷ്ട്രീയത്തിലേക്കുള്ള അൻവറിന്റെ ആദ്യ കാൽവെപ്പായിരുന്നു.

മുഖ്യ എതിരാളിയായ മുസ്ലിം ലീഗിലെ പി.കെ. ബഷീറിനെതിരെ ശക്തമായ പ്രതിരോധം തീർത്ത അൻവർ രണ്ടാം സ്ഥാനത്തെത്തി. അന്ന് സി.പി.എം. സ്ഥാനാർത്ഥിയായിരുന്ന അഷ്റഫ് കാളിയത്ത് നാലാം സ്ഥാനത്തേക്ക് പിന്തള്ളപ്പെട്ടു.
 

2016ൽ അൻവർ തന്റെ തട്ടകം മാറ്റി. നിലമ്പൂരിൽ സിറ്റിംഗ് എം.എൽ.എ.യായിരുന്ന ആര്യാടൻ മുഹമ്മദ് മാറി, പകരം ആര്യാടൻ ഷൗക്കത്ത് മത്സരിക്കാനെത്തിയതോടെ അൻവർ എതിരാളിയായി രംഗത്തെത്തി. നിലമ്പൂരിൽ സ്വന്തം സ്ഥാനാർത്ഥിയെ നിർത്തുന്നതിന് പകരം ഇടതുപക്ഷം അൻവറിനെ പിന്തുണയ്ക്കാൻ തീരുമാനിച്ചു. സിനിമാ നിർമ്മാതാവായിരുന്ന ഷൗക്കത്ത് നേരത്തെ നിലമ്പൂർ നഗരസഭാ ചെയർമാനായിരുന്നു. ഇക്കാലത്ത് ഷൗക്കത്തിനെതിരെ ചില ആരോപണങ്ങൾ എതിരാളികൾ ഉയർത്തിയിരുന്നു.
 

കെ.പി.സി.സി. കലാവിഭാഗത്തിന്റെ ചുമതല വഹിച്ചിരുന്ന ഷൗക്കത്ത് കേവലം ആര്യാടന്റെ ഒഴിവില്‍ മകൻ എന്ന നിലയിൽ മത്സരിക്കാൻ എത്തിയതായിരുന്നില്ല. മണ്ഡലത്തിൽ സജീവമായിരുന്ന നേതാവായിരുന്നിട്ടും, അൻവർ ആര്യാടൻമാരുടെ കുടുംബാധിപത്യത്തിനെതിരെ നടത്തിയ പ്രചാരണം ഫലം കണ്ടു. ആദിവാസി പിന്നോക്ക മേഖലകൾ ഏറെയുള്ള മണ്ഡലം കൂടിയായിരുന്നു നിലമ്പൂർ. ഈ മേഖലകളിൽ ഉണ്ടായിരുന്ന യു.ഡി.എഫ്. വോട്ടുകളായിരുന്നു അൻവർ പ്രധാനമായും ലക്ഷ്യമിട്ടിരുന്നത്.
 

അൻവർ വളരെ വ്യക്തതയോടെ തിരഞ്ഞെടുപ്പ് പ്രചാരണം നടത്തി. അമിതമായ വിജയപ്രതീക്ഷകൾ വെച്ചുപുലർത്തിയ കോൺഗ്രസ് നേതൃത്വത്തിന് ഏറ്റ വലിയ തിരിച്ചടിയായിരുന്നു നിലമ്പൂരിലെ തോൽവി. അൻവറിന്റെ വിജയത്തോടെ നിലമ്പൂരിലെ കോൺഗ്രസ് കുത്തക അവസാനിച്ചുവെന്നായിരുന്നു എതിരാളികൾ പ്രചരിപ്പിച്ചത്. അത് ശരിവയ്ക്കുന്നതായിരുന്നു 2021ലെ തിരഞ്ഞെടുപ്പ് ഫലം.
 

ഡി.സി.സി. അധ്യക്ഷനായിരുന്ന വി.വി. പ്രകാശിനെയായിരുന്നു അൻവറിനെ പിടിച്ചുകെട്ടാനായി കോൺഗ്രസ് രംഗത്തിറക്കിയത്. എല്ലാ വിഭാഗം ജനങ്ങളുമായും അടുത്ത ബന്ധം കാത്തുസൂക്ഷിച്ചിരുന്ന നേതാവായിരുന്നു വി.വി. പ്രകാശ്. കടുത്ത മത്സരം അരങ്ങേറിയെങ്കിലും 2700 വോട്ടിന്റെ ഭൂരിപക്ഷത്തിൽ അൻവർ വിജയിച്ചു കയറി.
 

കക്കാടംപൊയിൽ അമ്യൂസ്മെന്റ് പാർക്കുമായി ബന്ധപ്പെട്ട വിവാദം അൻവറിനെ വിവാദ നായകനാക്കി. നിരവധി ആരോപണങ്ങൾ പിന്നീട് അൻവറിനെതിരെ ഉയർന്നു. അപ്പോഴെല്ലാം സി.പി.ഐ.എം., വിശേഷിച്ച് മുഖ്യമന്ത്രി പിണറായി വിജയൻ അൻവറിന്റെ രക്ഷകനായി എത്തി.

മലപ്പുറം ജില്ലാ പോലീസ് സൂപ്രണ്ടിന്റെ ക്യാമ്പ് ഓഫീസ് പരിസരത്തുനിന്നും മരങ്ങൾ വെട്ടിമാറ്റിയ സംഭവത്തിൽ സമരം പ്രഖ്യാപിച്ചതോടെ സി.പി.ഐ.എം. നേതൃത്വം അൻവറുമായി അകന്നു. വലിയ വിവാദങ്ങൾക്കുള്ള തയ്യാറെടുപ്പായിരുന്നു മലപ്പുറം എസ്.പി. ഓഫീസിനു മുന്നിൽ അൻവർ നടത്തിയ ഒറ്റയാൾ സമരം.

ഇടത് സഹയാത്രികനായ പി.വി. അൻവർ പാർട്ടിയെയും മുഖ്യമന്ത്രിയെയും വെല്ലുവിളിച്ച് മുന്നണിയിൽ നിന്ന് ഇറങ്ങിപ്പോയത് സി.പി.ഐ.എമ്മിന് രാഷ്ട്രീയമായി വലിയ തിരിച്ചടിയേറ്റ ഒരു സംഭവമായിരുന്നു. പലപ്പോഴും അവ്യക്തതയാണ് പി.വി. അൻവറിന്റെ നിലപാടുകളിൽ തെളിഞ്ഞത്. കോൺഗ്രസുമായി സഹകരിച്ചുപോകാൻ നീക്കങ്ങൾ നടത്തി, യു.ഡി.എഫിൽ ഘടകകക്ഷിയാകാനുള്ള വഴികൾ അന്വേഷിച്ചു. ഒടുവിൽ കോൺഗ്രസുമായി ദേശീയതലത്തിൽ അത്ര നല്ല ബന്ധമില്ലാത്ത തൃണമൂൽ കോൺഗ്രസിൽ അഭയം തേടി. ഇതോടെ യു.ഡി.എഫിലെത്തുക എളുപ്പമല്ലാതായി. മമതാ ബാനർജിയുമായി പോരാടുന്ന കോൺഗ്രസിന് അൻവറിനെ തള്ളാനും കൊള്ളാനും പറ്റാത്ത അവസ്ഥയായി.
 

മുന്നണി പ്രവേശനത്തിനായി അൻവർ കണ്ടെത്തിയ മാർഗ്ഗങ്ങളെല്ലാം അപ്രായോഗികമായി. നിലവിൽ ഉണ്ടായിരുന്ന സ്വീകാര്യതയ്ക്ക് പോലും മങ്ങലേൽപ്പിക്കുന്ന നിലയിലേക്കാണ് അൻവറിന്റെ രാഷ്ട്രീയം മുന്നോട്ട് പോകുന്നത്. നിലമ്പൂരിൽ നിരുപാധിക പിന്തുണ നൽകി, പിന്നീട് മുന്നണിയിൽ കയറിക്കൂടാനുള്ള സാധ്യത ആരായാതെ, ബ്ലാക്ക്മെയിൽ രാഷ്ട്രീയമായിരുന്നു അൻവർ സ്വീകരിച്ചത്. സി.പി.എമ്മിനെ തകർക്കുകയാണ് തന്റെ ലക്ഷ്യമെന്ന് പ്രഖ്യാപിച്ച് പോരാട്ടത്തിനിറങ്ങിയ അൻവറിപ്പോൾ യു.ഡി.എഫിൽ കയറിക്കൂടുകയാണ് ലക്ഷ്യമെന്ന് പ്രഖ്യാപിക്കുന്നു.
 

ഇല്ലെങ്കിൽ കോൺഗ്രസ് സ്ഥാനാർത്ഥിയെ പരാജയപ്പെടുത്തുമെന്ന് വ്യക്തമാക്കുന്നു. അത് ഭീഷണിയുടെ സ്വരമാണ്. യു.ഡി.എഫ്. സ്ഥാനാർത്ഥി തന്റെ പഴയ എതിരാളിയാണ് എന്നതാണ് അൻവറിന്റെ പ്രധാന ന്യായം. രാഷ്ട്രീയത്തിൽ സ്ഥിരം ശത്രുവും മിത്രവുമില്ലെന്ന ആപ്തവാക്യം അൻവറിന് ഒരുപക്ഷേ അജ്ഞാതമായിരിക്കാം. എന്നാൽ രാഷ്ട്രീയ വിജയത്തിന് അൻവർ തിരഞ്ഞെടുത്ത വഴി തെറ്റിയിരിക്കുന്നു. കോൺഗ്രസ് സ്ഥാനാർത്ഥി തോറ്റാൽ അത് അൻവറിന്റെ രാഷ്ട്രീയത്തിന് ഏൽക്കുന്ന തിരിച്ചടിയാകും. ഇനി നിലമ്പൂരിൽ അൻവർ മത്സരിച്ച് പരാജയപ്പെട്ടാലും സ്ഥിതി അതുതന്നെ.

അൻവർ അമിതാവേശം കാണിച്ച് സ്വയം എരിഞ്ഞടങ്ങുമോ എന്നാണ് ഇനി കാണേണ്ടത്. കോൺഗ്രസിന്റെ ദേശീയ നേതാവായ കെ.സി. വേണുഗോപാലിലാണ് ഇനിയുള്ള പ്രതീക്ഷ. കെ. സുധാകരനും കെ. മുരളീധരനും അൻവറിനെ ന്യായീകരിച്ച് രംഗത്തെത്തിയതോടെ ചെറിയ പ്രതീക്ഷയിലാണ് അൻവർ. മുന്നണി പ്രവേശനമല്ലാതെ മറ്റൊരു അജണ്ടയിലും നിലമ്പൂരിന്റെ മുൻ എം.എൽ.എ.യ്ക്ക് താല്പര്യമില്ലെന്ന് വ്യക്തം.
 

അൻവർ തന്നെ ഉണ്ടാക്കിയ ഒരു ഉപതിരഞ്ഞെടുപ്പിൽ അൻവർ നായകനും പ്രതിനായകനുമായി മാറിയിരിക്കുകയാണ്. താന്‍ തന്നെ കുഴിച്ച കുഴിയില്‍ താന്‍ തന്നെ വീണുവെന്ന് പറയുന്നതുപോലെ, സ്വന്തം തട്ടകമൊഴിഞ്ഞ് എതിരാളികൾക്ക് ചുവപ്പ് പരവതാനി വിരിച്ച അൻവർ തോൽപ്പിക്കുന്നത് പിണറായി സത്തെയല്ല, സ്വയം തന്നെയാണെന്നാണ് ഇപ്പോൾ നടന്നുകൊണ്ടിരിക്കുന്ന സംഭവവികാസങ്ങൾ തെളിയിക്കുന്നത്.

ഈ രാഷ്ട്രീയ ലേഖനം വായിച്ചതിന് ശേഷം നിങ്ങളുടെ അഭിപ്രായങ്ങൾ പങ്കുവെക്കുക. അൻവറിൻ്റെ രാഷ്ട്രീയ ഭാവി എന്തായിരിക്കും? നിങ്ങളുടെ സുഹൃത്തുക്കളുമായി ഇത് പങ്കുവെക്കുക.

Summary: Former Nilambur MLA PV Anwar's attempts to join the UDF have failed, leaving him in a political limbo. His inconsistent political stances and confrontational approach have led to his isolation after leaving the LDF. The article analyzes his political journey and current predicament.

#PVAanwar, #NilamburPolitics, #KeralaPolitics, #UDF, #LDF, #PoliticalCrisis