തിരുവനന്തപുരം: (KVARTHA) മുൻ കേന്ദ്രമന്ത്രി രാജീവ് ചന്ദ്രശേഖറിനെ ബിജെപി കേരള സംസ്ഥാന അധ്യക്ഷനായി ദേശീയ നേതൃത്വം തിരഞ്ഞെടുത്തു. നിലവിലെ സംസ്ഥാന അധ്യക്ഷനായ കെ സുരേന്ദ്രൻ അഞ്ച് വർഷത്തെ കാലാവധി പൂർത്തിയാക്കിയതിനെ തുടർന്നാണ് ഈ മാറ്റം. ഞായറാഴ്ച ചേർന്ന ബിജെപി കോർ കമ്മിറ്റി യോഗത്തിലാണ് രാജീവ് ചന്ദ്രശേഖറിൻ്റെ പേര് അധ്യക്ഷ സ്ഥാനത്തേക്ക് നിർദേശിക്കപ്പെട്ടത്. ഇതു  സംബന്ധിച്ച ഔദ്യോഗിക പ്രഖ്യാപനം ബിജെപി നേതൃത്വം തിങ്കളാഴ്ച നടത്തും. 

തിങ്കളാഴ്ച നടക്കുന്ന സംസ്ഥാന കൗൺസിൽ യോഗത്തിൽ പുതിയ അധ്യക്ഷൻ ചുമതലയേൽക്കും. കേരളത്തിൽ ഒരു പുതിയ മുഖം നേതൃത്വത്തിലേക്ക് വരണമെന്ന ദേശീയ നേതൃത്വത്തിൻ്റെ താല്പര്യമാണ് രാജീവ് ചന്ദ്രശേഖറിൻ്റെ നിയമനത്തിന് പിന്നിലെ പ്രധാന കാരണം. വിവിധ സാമുദായിക നേതാക്കളുമായി രാജീവ് ചന്ദ്രശേഖറിനുള്ള അടുത്ത ബന്ധവും കേന്ദ്ര നേതൃത്വം പരിഗണിച്ചു. കഴിഞ്ഞ ലോക്സഭാ തിരഞ്ഞെടുപ്പിൽ തിരുവനന്തപുരം മണ്ഡലത്തിൽ വലിയ പോരാട്ടം കാഴ്ചവെച്ചിരുന്നു.

1964 മെയ് 31ന് ജനിച്ച രാജീവ് ചന്ദ്രശേഖർ രണ്ടാം മോദി മന്തിസഭയിൽ കേന്ദ്ര നൈപുണ്യ വികസന സംരംഭകത്വ സഹമന്ത്രി, ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി സഹമന്ത്രി, ജലശക്തി മന്ത്രാലയത്തിലെ സഹമന്ത്രി എന്നീ സ്ഥാനങ്ങൾ വഹിച്ചിരുന്നു. കർണാടകയിൽ നിന്നുള്ള രാജ്യസഭാംഗമായ അദ്ദേഹം സംരംഭകൻ, സാങ്കേതിക വിദഗ്ദ്ധൻ എന്നീ നിലകളിലും ശ്രദ്ധേയനാണ്. അഹമ്മദാബാദിൽ എയർ കൊമോഡോർ എം.കെ. ചന്ദ്രശേഖറിൻ്റെയും വല്ലി ചന്ദ്രശേഖറിൻ്റെയും മകനായി ജനിച്ച രാജീവ്, ഇന്ത്യയിലെ വിവിധ സ്കൂളുകളിൽ പഠനം നടത്തി.

മണിപ്പാൽ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ നിന്ന് ഇലക്ട്രിക്കൽ എഞ്ചിനീയറിംഗിൽ ബിരുദം നേടിയ ശേഷം, ചിക്കാഗോയിലെ ഇല്ലിനോയിസ് ഇൻസ്റ്റിറ്റ്യൂട്ട് ഓഫ് ടെക്നോളജിയിൽ നിന്ന് കമ്പ്യൂട്ടർ സയൻസിൽ ബിരുദാനന്തര ബിരുദവും നേടി. ഇന്റലിൽ വിനോദ് ധാം തിരഞ്ഞെടുത്ത അദ്ദേഹത്തിന്റെ ടീം ഐ486 പ്രോസസ്സർ രൂപകൽപ്പന ചെയ്തവരിൽ പ്രധാനിയാണ്. ഹാർവാർഡ് യൂണിവേഴ്സിറ്റിയിൽ നിന്ന് അഡ്വാൻസ്ഡ് മാനേജ്മെൻ്റ് പ്രോഗ്രാമും അദ്ദേഹം പൂർത്തിയാക്കിയിട്ടുണ്ട്. 1991ൽ ഇന്ത്യയിൽ തിരിച്ചെത്തിയ ശേഷം ബിപിഎൽ ഗ്രൂപ്പിൻ്റെ ഭാഗമായി. പിന്നീട് 2005 വരെ മൊബൈൽ കമ്യൂണിക്കേഷൻ രംഗത്ത് പ്രവർത്തിച്ചു. 2006 മുതൽ 2018 വരെ കർണാടകയിൽ നിന്ന് രാജ്യസഭാംഗമായി സേവനമനുഷ്ഠിച്ചു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Rajeev Chandrashekhar is appointed as the new Kerala BJP State President, replacing K. Surendran after his five-year tenure. Official announcement soon.

#BJP #Leadership #RajeevChandrashekhar #Kerala #StatePresident #KSurendran