എൻസിപി അജിത് പവാർ വിഭാഗം നിലപാട് കടുപ്പിക്കുന്നു; എ കെ ശശീന്ദ്രനും തോമസ് കെ തോമസും രാജി ഭീഷണിയിൽ
● പാർട്ടിക്കൊപ്പം നിന്നില്ലെങ്കിൽ അയോഗ്യരാക്കുമെന്ന് ഭീഷണി.
● പ്രഫുൽ പട്ടേൽ ഇരുവർക്കും കാരണം കാണിക്കൽ നോട്ടീസ് അയച്ചു.
● ഇടതുമുന്നണിക്ക് നിയമസഭാ തെരഞ്ഞെടുപ്പിന് മുമ്പ് തിരിച്ചടിയാകും.
● ശശീന്ദ്രനും തോമസ് കെ തോമസും നോട്ടീസ് തള്ളി.
കണ്ണൂർ: (KVARTHA) ഇടതുമുന്നണിയിലെ രണ്ട് എംഎൽഎമാർ രാജി ഭീഷണിയിൽ. എൻസിപിയിൽ ദേശീയ തലത്തിലുണ്ടായ പിളർപ്പിനെ തുടർന്നുള്ള രാഷ്ട്രീയ വടംവലി ഇടതുമുന്നണിയെ പ്രതിസന്ധിയിലാക്കുകയാണ്. മന്ത്രി എ കെ ശശീന്ദ്രൻ, കുട്ടനാട് എംഎൽഎ തോമസ് കെ തോമസ് എന്നിവരാണ് അയോഗ്യതാ ഭീഷണി നേരിടുന്നത്.
എൻസിപിയിൽ പിളർപ്പുണ്ടാവുകയും അജിത് പവാറിന്റെ നേതൃത്വത്തിലുള്ള ഒരു വിഭാഗം ബിജെപിയുടെ നേതൃത്വത്തിലുള്ള എൻഡിഎയുടെ ഭാഗമാവുകയും ചെയ്തതോടെ മഹാരാഷ്ട്രയിൽ ബിജെപി ഭരണത്തിലെത്തി.
തിരഞ്ഞെടുപ്പിൽ വിജയം ആവർത്തിച്ചതോടെ എൻസിപി അജിത് പവാർ വിഭാഗം ശക്തി പ്രാപിച്ചു. അജിത് പവാർ ബിജെപി പാളയത്തിലേക്ക് നീങ്ങിയതോടെ കേരളത്തിലെ എൻസിപി വിഭാഗം ശരത് പവാറിനൊപ്പം ഉറച്ചുനിന്നു. എന്നാൽ ഇപ്പോൾ ഇതേ കേരള ഘടകമാണ് അയോഗ്യതാ ഭീഷണി നേരിടുന്നത്.
പിണറായി മന്ത്രിസഭയിൽ അംഗമായ എ കെ ശശീന്ദ്രനോടും കുട്ടനാട് എംഎൽഎ തോമസ് കെ തോമസിനോടും ഉടൻ രാജിവെക്കാനാണ് എൻസിപി ഔദ്യോഗിക വിഭാഗം വർക്കിംഗ് പ്രസിഡന്റ് പ്രഫുൽ പട്ടേൽ ആവശ്യപ്പെട്ടിരിക്കുന്നത്. പാർട്ടിയുടെ പേരും ചിഹ്നവും അനുവദിച്ചത് എൻസിപി അധ്യക്ഷനായ അജിത് പവാറിനാണ്.
പാർട്ടി ചിഹ്നത്തിൽ തിരഞ്ഞെടുക്കപ്പെട്ട എംഎൽഎമാരായ എ കെ ശശീന്ദ്രനും തോമസ് കെ തോമസും പാർട്ടി നിർദേശം പാലിക്കാൻ ബാധ്യസ്ഥരാണ്. പാർട്ടിയിലെ പിളർപ്പിന് ശേഷം ശരത് പവാറിനൊപ്പം നിലയുറപ്പിച്ച ഈ രണ്ട് എംഎൽഎമാരും പാർട്ടി വിരുദ്ധ പ്രവർത്തനം നടത്തുന്നുവെന്നാണ് വർക്കിംഗ് പ്രസിഡന്റ് പ്രഫുൽ പട്ടേലിന്റെ ആരോപണം. അജിത് പവാർ നേതൃത്വം നൽകുന്ന പാർട്ടിയുടെ ഭാഗമായി നിന്നാൽ മാത്രമേ ഇരുവർക്കും എംഎൽഎമാരായി തുടരാൻ കഴിയൂ.
പാർട്ടി വിരുദ്ധ പ്രവർത്തനം നടത്തുന്ന എംഎൽഎമാരെ ആറു വർഷത്തേക്ക് അയോഗ്യരാക്കാനാണ് നീക്കം. ജൂലൈ നാലിനാണ് എൻസിപി ദേശീയ വർക്കിംഗ് പ്രസിഡന്റ് എ കെ ശശീന്ദ്രനും തോമസ് കെ തോമസിനും കാരണം കാണിക്കൽ നോട്ടീസ് അയച്ചത്. പ്രഫുൽ പട്ടേലിന്റെ അപ്രതീക്ഷിത നീക്കത്തിൽ ഇരുനേതാക്കളും ഞെട്ടിയിരിക്കുകയാണ്.
പാർട്ടി അധ്യക്ഷൻ എന്ന നിലയിൽ അജിത് പവാർ നിലപാട് കടുപ്പിച്ചാൽ രണ്ട് എംഎൽഎമാരും രാജിവെക്കേണ്ടിവരും. രാജിവച്ചില്ലെങ്കിൽ പാർട്ടി അധ്യക്ഷന്റെ നിർദേശപ്രകാരം ആറു വർഷത്തേക്ക് തിരഞ്ഞെടുപ്പ് കമ്മീഷൻ ഇവരെ അയോഗ്യരാക്കും. ഇത് എ കെ ശശീന്ദ്രനേയും തോമസ് കെ തോമസിനേയും രാഷ്ട്രീയമായി തകർക്കും.
ഇടതുമുന്നണിയിലെ പ്രധാന ഘടകകക്ഷിയായ എൻസിപി എംഎൽഎമാർ സാങ്കേതികമായി അജിത് പവാറിന്റെ നേതൃത്വത്തിലുള്ള എൻസിപിയുടെ പ്രതിനിധികളായി തുടരുകയാണ്. തങ്ങൾ പാർട്ടി അധ്യക്ഷനെ അംഗീകരിക്കുന്നില്ലെന്ന് തിരഞ്ഞെടുപ്പ് കമ്മീഷനെ അറിയിച്ചാലും കൂറുമാറ്റ നിയമപ്രകാരം എംഎൽഎ സ്ഥാനം നഷ്ടമാവും. എൻസിപി അജിത് പവാർ വിഭാഗത്തിന്റെ നീക്കം കേരളത്തിലെ ഇടതുമുന്നണിയേയും പ്രതിരോധത്തിലാക്കിയിരിക്കുകയാണ്.
തിരഞ്ഞെടുപ്പിന് ഏതാനും മാസങ്ങൾ മാത്രം ബാക്കി നിൽക്കെ രണ്ട് എംഎൽഎമാർ രാജിവച്ചൊഴിയേണ്ടി വന്നാൽ ഇടതുമുന്നണിക്കും ക്ഷീണമാകും. നിയമപരമായി വിഷയത്തെ നേരിടണമെന്ന സന്ദേശമാണ് ഇടതുമുന്നണി നേതാക്കൾ എൻസിപി സംസ്ഥാന നേതൃത്വത്തെ അറിയിച്ചിരിക്കുന്നത്.
എൻസിപിയുടെ ഔദ്യോഗിക പേരും ചിഹ്നവും അനുവദിച്ചത് അജിത് പവാർ വിഭാഗത്തിനാണ്. അതിനാൽ അധ്യക്ഷന്റെ നിലപാട് ചട്ടപ്രകാരം തള്ളാനാകില്ല. അധ്യക്ഷനെ അംഗീകരിക്കാതെ എംഎൽഎമാർക്ക് സ്വതന്ത്ര നിലപാട് സ്വീകരിക്കാൻ കഴിയില്ലെന്നിരിക്കെ അജിത് പവാർ വിഭാഗത്തിന്റെ നീക്കം തിരിച്ചടിയാകും.
നിലവിലെ നീക്കം തള്ളിയ എ കെ ശശീന്ദ്രനും തോമസ് കെ തോമസും പ്രഫുൽ പട്ടേലിന് നോട്ടീസ് നൽകാൻ അധികാരമില്ലെന്ന മറുവാദവുമായി രംഗത്തെത്തിയിരിക്കുകയാണ്. പാർട്ടി ഭരണഘടനപ്രകാരം ദേശീയ വർക്കിംഗ് പ്രസിഡന്റ് എന്നൊരു പോസ്റ്റില്ലെന്നാണ് മന്ത്രി എ കെ ശശീന്ദ്രന്റെ ആരോപണം.
പാർട്ടിയുടെ അംഗീകാരം സംബന്ധിച്ചുള്ള തർക്കം കോടതിയുടെ പരിഗണനയിലാണെന്നും, കോടതിയുടെ അന്തിമ തീരുമാനം വരുന്നതുവരെ ഇക്കാര്യത്തിൽ ഒരു നടപടിയും സ്വീകരിക്കാൻ കഴിയില്ലെന്നുമായിരുന്നു ശശീന്ദ്രന്റേയും തോമസ് കെ തോമസിന്റെയും പ്രതികരണം.
ഇരുവർക്കും എംഎൽഎയായി തുടരണമെങ്കിൽ ഔദ്യോഗിക വിഭാഗത്തിനൊപ്പം ചേരണം. എന്നാൽ കേരളത്തിലെ രണ്ട് എംഎൽഎമാരും ശരത് പവാർ നേതൃത്വം നൽകുന്ന പാർട്ടിക്കൊപ്പമാണെന്ന് ആവർത്തിച്ചതോടെ നടപടിയിലേക്ക് പോകാനാണ് അജിത് പവാർ വിഭാഗത്തിന്റെ നീക്കം. ഒരു എംഎൽഎ മന്ത്രിയും മറ്റൊരു എംഎൽഎ ശരത് പവാർ വിഭാഗത്തിന്റെ സംസ്ഥാന അധ്യക്ഷനുമായതിനാൽ നിലപാട് കടുപ്പിക്കാനാണ് സാധ്യത.
ഇതോടെ മന്ത്രിയുടെയും എംഎൽഎയുടെയും രാജി സാധ്യതയാണ് നിലനിൽക്കുന്നത്. നിയമസഭാ തിരഞ്ഞെടുപ്പിന് ഇനി എട്ട് മാസം മാത്രമേ ബാക്കിയുള്ളൂ. അതിനിടെയിൽ രാജിയുണ്ടാകാതിരിക്കാൻ വിഷയം കോടതിയിലെത്തിക്കാനാണ് ശശീന്ദ്രൻ പക്ഷത്തിൻ്റെ നീക്കം.
എൻസിപിയിലെ ഈ പ്രതിസന്ധി കേരള രാഷ്ട്രീയത്തെ എങ്ങനെ ബാധിക്കും? നിങ്ങളുടെ അഭിപ്രായം പങ്കുവെക്കൂ.
Article Summary: NCP Ajit Pawar faction firm on stance; Saseendran, Thomas face resignation threat.
#NCP #KeralaPolitics #AjitPawar #SharadPawar #AKSaseendran #ThomasKThomas
