നവീൻ ബാബുവിൻ്റെ മരണം; കേസ് സിബിഐ അന്വേഷിച്ചേക്കും, സത്യം പുറത്തുവരുമോ എന്ന് ഉറ്റുനോക്കി കേരളം

കണ്ണൂർ: (KVARTHA) മുൻ എഡിഎം നവീൻ ബാബുവിൻ്റെ മരണം സംബന്ധിച്ച അന്വേഷണം സിബിഐക്ക് വിടാൻ സംസ്ഥാന സർക്കാർ നീക്കം തുടങ്ങിയതോടെ, മറ്റൊരു കേന്ദ്ര ഏജൻസി കൂടി കണ്ണൂരിലെത്തുന്നത് സിപിഎം നേതൃത്വത്തിന് തലവേദനയാകാൻ സാധ്യത. സിബിഐ അന്വേഷണത്തിനായുള്ള വിജ്ഞാപനം ഉടൻ ഇറക്കുമെന്നാണ് ആഭ്യന്തര വകുപ്പിൽ നിന്നും ലഭിക്കുന്ന സൂചനകൾ. നവീൻ ബാബുവിൻ്റെ കുടുംബത്തിൻ്റെ ആവശ്യം പരിഗണിച്ചാണ് സർക്കാരിൻ്റെ ഈ പുതിയ നടപടി.

പോലീസ് അന്വേഷണത്തിൽ അതൃപ്തി

സിബിഐ അന്വേഷണം ആവശ്യപ്പെട്ട് കുടുംബം കഴിഞ്ഞ ദിവസം മുഖ്യമന്ത്രി വി ഡി സതീശനെ കണ്ടിരുന്നു. നിലവിൽ പോലീസ് നടത്തിയ അന്വേഷണത്തിൽ കുടുംബം കടുത്ത അതൃപ്തി പ്രകടിപ്പിച്ചിരുന്നു. പുതുതായി അധികാരത്തിലെത്തിയ യുഡിഎഫ് സർക്കാർ ഒരു മാസം പിന്നിടും മുൻപ് സിബിഐക്ക് വിടുന്ന ആദ്യത്തെ കേസാണിത്. പോലീസ് പ്രത്യേക അന്വേഷണ സംഘം കുറ്റപത്രം സമർപ്പിച്ച കേസിൽ പി പി ദിവ്യ മാത്രമാണ് ഏക പ്രതി. കേസിൽ ഇനി സിബിഐ ആയിരിക്കും അന്തിമ തീരുമാനമെടുക്കേണ്ടത്.

കഴിഞ്ഞ ദിവസം മുഖ്യമന്ത്രി വി ഡി സതീശനെ നവീൻ ബാബുവിൻ്റെ ഭാര്യ മഞ്ജുഷ, സഹോദരൻ പ്രവീൺ, കോൺഗ്രസ് എംഎൽഎമാരായ ടി ഒ മോഹനൻ, പഴങ്കുളം മധു എന്നിവരടങ്ങുന്ന സംഘം സന്ദർശിച്ചിരുന്നു. പ്രത്യേക അന്വേഷണ സംഘം നടത്തിയ അന്വേഷണത്തിൽ തൃപ്തിയില്ലെന്നും സിബിഐ അന്വേഷണത്തിൽ മാത്രമേ സത്യം പുറത്തുവരികയുള്ളുവെന്നുമാണ് ഇവർ മുഖ്യമന്ത്രിയെ ധരിപ്പിച്ചത്.

മുൻ സർക്കാരിൻ്റെ നിലപാട്

നവീൻ ബാബുവിൻ്റെ മരണത്തിൽ പ്രത്യേക അന്വേഷണ സംഘത്തിൻ്റെ അന്വേഷണം തൃപ്തികരമാണെന്നായിരുന്നു ഹൈക്കോടതിയിൽ മുൻ സർക്കാർ സ്വീകരിച്ചിരുന്ന നിലപാട്. സിബിഐ അന്വേഷണത്തെ രണ്ടാം പിണറായി സർക്കാർ അതിശക്തമായി എതിർത്തിരുന്നു. നവീൻ ബാബുവിന് കൈക്കൂലി നൽകിയെന്ന് അവകാശപ്പെടുന്ന ചെങ്ങളായിയിലെ പെട്രോൾ പമ്പ് വ്യവസായ സംരഭകൻ കെ വി പ്രശാന്തനെ കേസിൽ പ്രതിയാക്കുകയും ചെയ്തിരുന്നില്ല.

സംഭവത്തിൻ്റെ പശ്ചാത്തലം

2024 ഒക്ടോബർ 15-ന് പുലർച്ചെയാണ് നവീൻ ബാബുവിനെ പള്ളിക്കുന്നിലെ ഔദ്യോഗിക ക്വാർട്ടേഴ്സിൽ മരിച്ച നിലയിൽ കണ്ടെത്തിയത്. കുടുംബവും മാധ്യമങ്ങളും പൊതുസമൂഹത്തിന് മുൻപിൽ ഉന്നയിച്ച ഒരുപാട് ചോദ്യങ്ങൾക്ക് വ്യക്തത വരുത്താതെയാണ്, യാത്രയയപ്പ് യോഗത്തിൽ നവീൻ ബാബുവിനെ പരസ്യമായി അധിക്ഷേപിക്കുകയും ഭീഷണിപ്പെടുത്തുകയും ചെയ്ത പി പി ദിവ്യയെ മാത്രം ഒന്നാം പ്രതിയാക്കി കോടതിയിൽ കുറ്റപത്രം സമർപ്പിച്ചത്.

കണ്ണൂർ റേഞ്ച് ഡിഐജി ജി എച്ച് യതീഷ് ചന്ദ്ര, സിറ്റി പോലീസ് കമ്മീഷണർ പി നിധിൻരാജ്, അന്നത്തെ എസിപി ടി കെ രത്നകുമാർ, കണ്ണൂർ പോലീസ് ഇൻസ്പെക്ടർ ശ്രീജിത്ത് കോടേരി എന്നിവരുടെ നേതൃത്വത്തിലുള്ള സംഘമാണ് കേസ് അന്വേഷിച്ചത്.

രാഷ്ട്രീയ വാർത്തകൾ നിങ്ങളുടെ സുഹൃത്തുക്കൾക്കും ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിവരങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: The new UDF government is moving to transfer the investigation of former Kannur ADM Naveen Babu's death to the CBI following family demands.

#NaveenBabu #KannurNews #CBICase #KeralaPolitics #PPDivya #UDFGovernment #MalayalamNews