ധനരാജ് രക്തസാക്ഷി ഫണ്ടിൽ നിന്നും നയാപ്പൈസ വകമാറ്റിയിട്ടില്ല; വി കുഞ്ഞികൃഷ്ണൻ വലതുപക്ഷത്തിന്റെ കോടാലിക്കൈയ്യായി പ്രവർത്തിക്കുന്നുവെന്ന് എംവി ജയരാജൻ

കണ്ണൂർ: (KVARTHA) പയ്യന്നൂർ എം.എൽ.എ ടി.ഐ. മധുസൂദനനെതിരെ ധനരാജ് രക്തസാക്ഷി ഫണ്ട് വെട്ടിച്ചുവെന്ന ആരോപണം പരസ്യമായി ഉന്നയിച്ച മുൻ ഏരിയാ സെക്രട്ടറിയും കണ്ണൂർ ജില്ലാ കമ്മിറ്റിയംഗവുമായ വി. കുഞ്ഞികൃഷ്ണനെതിരെ വിമർശനം കടുപ്പിച്ച് സി.പി.എം. 

വി. കുഞ്ഞികൃഷ്ണൻ പാർട്ടി ശത്രുക്കളുടെ കോടാലിക്കൈയ്യായി മാറിയെന്ന് സി.പി.എം സംസ്ഥാന സെക്രട്ടറിയേറ്റ് അംഗം എം.വി. ജയരാജൻ ആരോപിച്ചു. പാർട്ടി ജില്ലാ കമ്മിറ്റി ഓഫീസായ കണ്ണൂർ തളാപ്പിലെ അഴീക്കോടൻ മന്ദിരത്തിൽ മാധ്യമങ്ങളോട് പ്രതികരിക്കുകയായിരുന്നു അദ്ദേഹം.

ഞായറാഴ്ച രാവിലെ നടന്ന പാർട്ടി കണ്ണൂർ ജില്ലാ സെക്രട്ടറിയേറ്റ് യോഗത്തിൽ വി. കുഞ്ഞികൃഷ്ണനെതിരെ അതിശക്തമായ വിമർശനമാണ് ഉയർന്നത്. തുടർന്ന് ചേരുന്ന കണ്ണൂർ ജില്ലാ കമ്മിറ്റി യോഗത്തിൽ അദ്ദേഹത്തെ പുറത്താക്കാനുള്ള തീരുമാനമെടുക്കുമെന്നാണ് സൂചന. 

കുഞ്ഞികൃഷ്ണനോട് യോജിക്കുന്ന ആരും പാർട്ടിയിൽ ഉണ്ടാകില്ലെന്നും പയ്യന്നൂരിൽ യാതൊരു തരത്തിലുള്ള ധനാപഹരണവും നടന്നിട്ടില്ലെന്നും എം.വി. ജയരാജൻ വ്യക്തമാക്കി.

എം.വി. ജയരാജൻ പറഞ്ഞത്:

കണ്ണൂർ ജില്ലാ കമ്മിറ്റിയംഗമെന്ന നിലയിൽ വി. കുഞ്ഞികൃഷ്ണന്റെ പരസ്യപ്രസ്താവന ഒരുതരത്തിലും അംഗീകരിക്കാൻ കഴിയാത്തതാണ്. തനിക്കെതിരെ നടപടി ഉണ്ടാകുമെന്ന് കുഞ്ഞികൃഷ്ണൻ തന്നെ പറഞ്ഞിട്ടുണ്ട്. 

ബോധപൂർവ്വം പാർട്ടിയെ തകർത്തുകൊണ്ട് തിരുത്തുകയെന്നതാണ് കുഞ്ഞികൃഷ്ണന്റെ നിലപാട്. രക്തസാക്ഷി ഫണ്ടിൽ നിന്ന് ഒരു നയാപ്പൈസ പോലും പയ്യന്നൂരിലെ പാർട്ടിയോ നേതാക്കളോ ദുരുപയോഗം ചെയ്തിട്ടില്ല.

ഫണ്ടുമായി ബന്ധപ്പെട്ട കണക്ക് പാർട്ടിക്കകത്ത് പറഞ്ഞിട്ടുണ്ട്. എന്നാൽ ഇതെല്ലാം ബോധ്യപ്പെട്ടിട്ടും വ്യാജ ആരോപണം ഉന്നയിച്ച വി. കുഞ്ഞികൃഷ്ണനെതിരെ ഉചിതമായ തീരുമാനം പാർട്ടി ജില്ലാ കമ്മിറ്റി എടുക്കും. 

കുഞ്ഞികൃഷ്ണന്റെ പുസ്തകം ഇറങ്ങുന്നത് പാർട്ടി അശേഷം ഭയപ്പെടുന്നില്ല. പയ്യന്നൂരിൽ പാർട്ടി കരുത്തോടെ മുൻപോട്ടു പോകുമെന്നും കുഞ്ഞികൃഷ്ണന്റെ വ്യാജ ആരോപണങ്ങൾ അർഹിക്കുന്ന ഗൗരവത്തോടെ ജനങ്ങൾ തള്ളിക്കളയുമെന്നും ജയരാജൻ പറഞ്ഞു.

കോടിയേരിയുടെ സാന്നിധ്യത്തിൽ ചർച്ച ചെയ്തു

അന്തരിച്ച സംസ്ഥാന സെക്രട്ടറി കോടിയേരി ബാലകൃഷ്ണനോട് പറഞ്ഞിട്ടും നടപടിയുണ്ടായില്ലെന്നാണ് കുഞ്ഞികൃഷ്ണൻ പറയുന്നത്. എന്നാൽ കോടിയേരിയുടെ സാന്നിധ്യത്തിൽ ചേർന്ന ജില്ലാ കമ്മിറ്റി യോഗത്തിൽ പയ്യന്നൂർ വിഷയം ചർച്ച ചെയ്തിട്ടുണ്ട്. അങ്ങനെയൊരു ധനാപഹരണം പാർട്ടി കണ്ടെത്തിയിട്ടില്ല. 

കണക്കുകൾ പാർട്ടി കമ്മിറ്റിക്ക് മുൻപിൽ അവതരിപ്പിക്കാൻ വൈകിയതിനാണ് അന്ന് നടപടി സ്വീകരിച്ചത്. വി. കുഞ്ഞികൃഷ്ണൻ പാർട്ടി ജില്ലാ കമ്മിറ്റിയംഗമാണ്. അദ്ദേഹത്തിന്റെ സാന്നിധ്യത്തിലും ഈ വിഷയം ചർച്ച ചെയ്തിട്ടുള്ളതാണ്.

ഇപ്പോൾ വലതുപക്ഷ മാധ്യമങ്ങളെ കൂട്ടുപിടിച്ച് അടിസ്ഥാനരഹിതമായ ആരോപണങ്ങളാണ് കുഞ്ഞികൃഷ്ണൻ ഉന്നയിക്കുന്നത്. അദ്ദേഹം നടത്തിയ പരസ്യ പ്രസ്താവന ഒരിക്കലും അംഗീകരിക്കാൻ കഴിയാത്തതാണ്. ഈ കാര്യങ്ങൾ പാർട്ടി കണ്ണൂർ ജില്ലാ സെക്രട്ടറിക്ക് വ്യക്തമായി അറിയാം. 

ധനാപഹരണം നടത്തിയെന്ന് പറയുമ്പോൾ ആരുടെയെങ്കിലും കൈയ്യിലോ വീട്ടിലോ ആ ധനം കാണേണ്ടതല്ലേയെന്നും ജയരാജൻ ചോദിച്ചു. ആരെങ്കിലും കണക്കിലില്ലാത്ത വിധം സ്വത്തു വാങ്ങിയതിനോ തെളിവില്ല. അങ്ങനെയെന്തെങ്കിലും ഉണ്ടെങ്കിൽ മാത്രമേ ധനാപഹരണം ഉണ്ടെന്ന് പറയാൻ കഴിയുകയുള്ളൂ.

ധനരാജ് രക്തസാക്ഷി കുടുംബ സഹായ ഫണ്ടിന്റെ കണക്കുകൾ പുറത്തുവിടുന്ന കാര്യം തീരുമാനിച്ചിട്ടില്ലെന്നും അങ്ങനെയെന്തെങ്കിലും ധനാപഹരണം നടന്നെങ്കിൽ മാത്രമേ അതിന്റെ ആവശ്യമുള്ളുവെന്നും എം.വി. ജയരാജൻ കൂട്ടിച്ചേർത്തു.

വാർത്തയെകുറിച്ച് നിങ്ങളുടെ അഭിപ്രായം കമന്റായി രേഖപ്പെടുത്താൻ മറക്കരുത്.

Article Summary: CPM leader MV Jayarajan slammed V Kunhikrishnan for his allegations regarding the Dhanraj martyr fund, stating that not a single penny was misappropriated and accusing Kunhikrishnan of acting as a tool for party enemies.

#MVJayarajan #VKunhikrishnan #CPM #Payyannur #Kannur #Politics #MartyrFund