കണ്ണൂർ: (KVARTHA) തളിപ്പറമ്പിൽ നടന്ന സിപിഎം കണ്ണൂർ ജില്ലാ സമ്മേളനത്തിൽ ജില്ലാ കമ്മിറ്റി അംഗത്വത്തിൽ നിന്നും ആന്തൂർ നഗരസഭാ ചെയർമാൻ പി മുകുന്ദനെ ഒഴിവാക്കിയതിൽ അതൃപ്തി പടരുന്നു. സിപിഎം സംസ്ഥാന സെക്രട്ടറി എം വി ഗോവിന്ദൻ്റെ വിശ്വസ്തനും മുൻ ജില്ലാ കമ്മിറ്റിയംഗവും ദീർഘകാലം ഏരിയാ സെക്രട്ടറിയുമായിരുന്ന നേതാവിനെയാണ് ഒരു ടേം ബാക്കി നിൽക്കവെ ജില്ലാ കമ്മിറ്റിയിൽ നിന്നും വെട്ടി നിരത്തിയത്. 

പ്രായപരിധി കവിയാത്ത പി മുകുന്ദനെ ഒഴിവാക്കിയത് ആന്തൂർ നഗരസഭാ ഭരണവുമായി ബന്ധപ്പെട്ട വിവാദങ്ങളാണെന്നാണ് സൂചന. സംസ്ഥാന കമ്മിറ്റിയംഗങ്ങളെയും പ്രായപരിധി കഴിഞ്ഞവരെയും. ഒഴിവാക്കുന്ന കൂട്ടത്തിൽ പി മുകുന്ദനെയും ഒഴിവാക്കുകയായിരുന്നു. ആന്തൂർ നഗരസഭാ ചെയർമാനായ പി. മുകുന്ദൻ തളിപ്പറമ്പ് മേഖലയിലെ മുതിർന്ന നേതാക്കളിൽ ഒരാളാണ്. ഇദ്ദേഹത്തിന് പകരമാണ് തളിപ്പറമ്പിൽ നിന്നുള്ള സി എം കൃഷ്ണനെ ജില്ലാ കമ്മിറ്റിയിലെടുത്തത്. 

പി കെ ശ്യാമളയ്ക്കു ശേഷം ആന്തൂർ നഗരസഭയിലെ ചെയർമാനാണ് പി മുകുന്ദൻ. ഭരണതലത്തിൽ ഉദ്യോഗസ്ഥ തലത്തിലുണ്ടായ വീഴ്ചയിൽ നേരത്തെ പി മുകുന്ദനെതിരെ പാർട്ടിക്കുള്ളിൽ ചർച്ച നടന്നിരുന്നു. ഫ്‌ലക്‌സ് ബോർഡുകൾ നീക്കുന്നതുമായി ബന്ധപ്പെട്ട തർക്കത്തിൽ സോഷ്യൽ മീഡിയയിലും പാർട്ടി അനുഭാവികൾ രംഗത്തുവന്നിരുന്നു. ആന്തൂർ നഗരസഭയിലെ ഭരണപരാജയത്തെ കുറിച്ചു കഴിഞ്ഞ ഏരിയ സമ്മേളനത്തിലും ചർച്ചയായി. 

ഇതേ തുടർന്നാണ് മുകുന്ദനെ ജില്ലാ കമ്മിറ്റിയിൽ നിന്നും നീക്കിയതെന്നാണ് വിവരം. പ്രതിപക്ഷമില്ലാതെ സിപിഎം ഭരിക്കുന്ന കേരളത്തിലെ ഏക നഗരസഭയാണ് ആന്തൂർ. തദ്ദേശ സ്വയംഭരണ തെരഞ്ഞെടുപ്പിൽ പല വാർഡുകളിലും ഇവിടെ മത്സരിക്കാൻ പോലും മറ്റു പാർട്ടിക്കാർ തയ്യാറാകാറില്ല. പി മുകുന്ദനെ തരംതാഴ്ത്തിയത് പാർട്ടിക്കുള്ളിൽ ചൂടേറിയ ചർച്ചയായിട്ടുണ്ട്. എന്നാൽ ഈ കാര്യത്തിൽ പരസ്യ പ്രതികരണത്തിന് ആരും തയ്യാറായിട്ടില്ല. പാർട്ടി തീരുമാനം വേദനാജനകമാണെങ്കിലും അംഗീകരിച്ചു മുൻപോട്ടു പോകുമെന്ന് അദ്ദേഹം അടുത്ത വൃത്തങ്ങളോട് പ്രതികരിച്ചു.

 ഈ വാർത്ത പങ്കുവെച്ച് അഭിപ്രായങ്ങൾ രേഖപ്പെടുത്തുക.

 Antoor Municipality Chairman, P Mukundan, was removed from CPM district committee after controversy regarding the administration's failure.

#CPMControversy #KasaragodNews #KannurPolitics #CPMRemoval #Pimukundan #PoliticalDebate