കോഴിക്കോട്: (KVARTHA) മുനമ്പം വഖഫ് ഭൂമി വിവാദം കേരളത്തിൽ വലിയ ചർച്ചയായി. പ്രതിപക്ഷ നേതാവ് വി ഡി സതീശൻ മുനമ്പത്തെ ഭൂമി വഖഫ് ഭൂമിയല്ലെന്ന വാദം ഉന്നയിച്ചത് വലിയ വിവാദങ്ങൾക്ക് തിരി കൊളുത്തിയിട്ടുണ്ട്. സതീശന്റെ ഈ പ്രസ്താവന വസ്തുതാ വിരുദ്ധവും സംഘപരിവാർ-കാസ കൂട്ടുകെട്ടിനെ പ്രീതിപ്പെടുത്താനുള്ള വിലകുറഞ്ഞ രാഷ്ട്രീയ നീക്കമാണെന്ന് ഐ എൻ എൽ ആരോപിച്ചു.

‘ചെറായിയിലെ ഭൂമി വഖഫാണെന്ന് അറിയാതെ പണം നൽകി സ്ഥലം വാങ്ങിയ നിരപരാധികളായ സാധാരണക്കാരുടെ ആശങ്ക അകറ്റാനല്ല, മറിച്ച് സ്ഥലം അനധികൃതമായി കയ്യേറിയ വൻകിട മാഫിയയുടെയും റിസോർട്ട് ഉടമകളുടെയും താൽപര്യം സംരക്ഷിക്കാനുള്ള വ്യഗ്രതയാണ് സതീശന്റെ നിലപാടിന് പിന്നിൽ’.ഐ എൻ എൽ സംസ്ഥാന ജനറൽ സെക്രട്ടറി കാസിം ഇരിക്കൂർ പ്രസ്താവനയിൽ പറഞ്ഞു.

1902 ൽ തിരുവിതാംകൂർ രാജാവ് ഗുജറാത്തിൽ നിന്നെത്തിയ അബ്ദുസ്സത്താർ മൂസ ഹാജി സേട്ടിന് 404 ഏക്കർ ഭൂമിയും 60 ഏക്കർ വെള്ളക്കെട്ടും പാട്ടത്തിന് കൊടുത്തതിന്റെ രേഖകൾ ഉണ്ടെന്നും, 1948 ൽ തന്റെ പിൻഗാമി മുഹമ്മദ് സിദ്ദീഖ് സേട്ടിന് മൂസ സേട്ട് സ്വത്ത് കൈമാറുകയായിരുന്നെന്നും, 1950 ൽ  2115-ാം നമ്പർ ആധാരമായി ഈ ഭൂമി ഫാറൂഖ് കോളേജിന് വഖഫ് ചെയ്തതിൻ്റെ പ്രമാണം ഉണ്ടെന്നും ഐ എൻ എൽ വാദിക്കുന്നു. 

ചെറായിയിലെ വഖഫ് ഭൂമിയിൽ വ്യാപകമായ കൈയേറ്റവും അനധികൃത ഇടപാടുകളും നടന്നതായി പരാതി ഉയർന്നതിനെ തുടർന്ന്, 2008-ൽ വി.എസ്. അച്യുതാനന്ദൻ സർക്കാർ ജസ്റ്റിസ് നിസാറിനെ അന്വേഷണ കമ്മീഷനായി നിയമിച്ചു. കമ്മീഷൻ റിപ്പോർട്ട് സമർപ്പിച്ചതിനെ തുടർന്ന് സർക്കാർ രണ്ട് ഉത്തരവുകൾ പുറപ്പെടുവിച്ചു. എന്നാൽ, ഈ വിഷയത്തിൽ കാര്യമായ നടപടികൾ ഉണ്ടായില്ല.

2019-ൽ പാണക്കാട് റഷീദലി ശിഹാബ് തങ്ങൾ വഖഫ് ബോർഡ് ചെയർമാനായതോടെ മുനമ്പം സ്വത്ത് തിരിച്ചുപിടിക്കാനുള്ള ശ്രമങ്ങൾ ശക്തമാക്കി. ഇത് റിസോർട്ട് മാഫിയയുടെ ശക്തമായ പ്രതിഷേധത്തിന് ഇടയാക്കുകയും വർഗീയ ധ്രുവീകരണത്തിന് ശ്രമങ്ങൾ ആരംഭിക്കുകയും ചെയ്തു.

നിലവിലെ വഖഫ് നിയമത്തിലെ അപാകതകളാണ് ഈ പ്രശ്‌നങ്ങൾക്ക് കാരണമെന്ന് ചൂണ്ടിക്കാട്ടി, ഹിന്ദു ഐക്യവേദിയും കാസയും മോദി സർക്കാർ കൊണ്ടു വരുന്ന പുതിയ വഖഫ് നിയമ ഭേദഗതിക്ക് വേണ്ടി നടത്തുന്ന പ്രചാരണമാണ് വി ഡി സതീശനും ഏറ്റെടുത്തിരിക്കുന്നതെന്നും കാസിം ഇരിക്കൂർ പറഞ്ഞു.

#WaqfLand #VDSatheesan #INL #KeralaPolitics #MunambamWaqf #PoliticalDispute