തിരുവനന്തപുരം: (KVARTHA) സിനിമയുടെ ഉള്ളടക്കത്തിൻ്റെ പേരിൽ ആരെയും വേട്ടയാടാൻ അനുവദിക്കില്ലെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി. ശിവൻകുട്ടി വ്യക്തമാക്കി. 'എമ്പുരാൻ' സിനിമയുമായി ബന്ധപ്പെട്ട് ഉയർന്നുവരുന്ന വിവാദങ്ങളുടെ പശ്ചാത്തലത്തിൽ നടി മല്ലിക സുകുമാരനുമായി ഫോണിൽ സംസാരിച്ച ശേഷമാണ് മന്ത്രി തൻ്റെ നിലപാട് അറിയിച്ചത്. മലയാള സിനിമ വ്യവസായത്തിലെ അവിഭാജ്യ ഘടകങ്ങളായ മോഹൻലാലിനും പൃഥ്വിരാജിനും അദ്ദേഹം പൂർണ്ണ പിന്തുണ അറിയിച്ചു.

സൈബർ ആക്രമണങ്ങളോ മറ്റേതെങ്കിലും തരത്തിലുള്ള സമ്മർദ്ദങ്ങളോ കേരളത്തിൽ വിലപ്പോവില്ലെന്ന് മന്ത്രി ഉറപ്പിച്ചു പറഞ്ഞു. ആവിഷ്കാര സ്വാതന്ത്ര്യത്തിന് വലിയ വില കൽപ്പിക്കുന്ന സംസ്ഥാനമാണ് കേരളം. ഈ പാരമ്പര്യം എന്നും കാത്തുസൂക്ഷിക്കും.

'എമ്പുരാൻ' ഒരു വാണിജ്യ സിനിമയാണെങ്കിലും ചില സുപ്രധാന കാര്യങ്ങൾ അതിൽ വ്യക്തമായി പറയുന്നുണ്ട്. ഗുജറാത്ത് കലാപവും ഗോധ്ര സംഭവവും ചരിത്രത്തിൽ രേഖപ്പെടുത്തിയിട്ടുള്ള യാഥാർത്ഥ്യങ്ങളാണ്. സത്യം തുറന്നു പറഞ്ഞതിൻ്റെ പേരിൽ ആരെയും ക്രൂശിക്കാൻ കേരളത്തിലെ ജനങ്ങൾ അനുവദിക്കില്ല. 

ഗുജറാത്ത് അല്ല കേരളം എന്ന് സംഘപരിവാർ മനസ്സിലാക്കണം. 'എമ്പുരാൻ' സിനിമയുടെ അണിയറ പ്രവർത്തകരെ ഒറ്റതിരിഞ്ഞ് ആക്രമിക്കാൻ അനുവദിക്കില്ലെന്നും അതിനുള്ള പ്രതിരോധം കേരളം തീർക്കുമെന്നും മന്ത്രി വി. ശിവൻകുട്ടി കൂട്ടിച്ചേർത്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Minister V. Shivankutty expressed support for 'Empuran' movie and the right to freedom of expression after discussing the issue with actress Mallika Sukumaran.

#Empuran #FreedomOfExpression #Shivankutty #MalayalamCinema #SupportForArtists #MovieControversy