ശബരിമല യുവതീ പ്രവേശന സമയത്തെ ഗൂഢാലോചനകൾ ഇപ്പോൾ വ്യക്തമായി; തന്ത്രിയെ വിമർശിച്ച് മന്ത്രി എം ബി രാജേഷ്

പാലക്കാട്: (KVARTHA) ശബരിമല യുവതീ പ്രവേശന സമയത്ത് നടന്ന ഗൂഢാലോചനകൾ ഇപ്പോൾ വ്യക്തമായെന്ന് മന്ത്രി എം ബി രാജേഷ്. സർക്കാരിനെതിരെ തന്ത്രി നടത്തിയ വിമർശനത്തോട് പ്രതികരിക്കുകയായിരുന്നു അദ്ദേഹം. പാലക്കാട് മലബാർ ഡിസ്റ്റിലറിയുടെ ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി.

തന്ത്രിക്ക് എന്ത് പ്രത്യേകത

'തന്ത്രിക്ക് മാത്രം എന്താണ് പ്രത്യേകത', മന്ത്രി എം ബി രാജേഷ് ചോദിച്ചു. ശബരിമല യുവതീ പ്രവേശന സമയത്ത് എന്തെല്ലാം ഗൂഢാലോചന നടന്നുവെന്ന് ഇപ്പോൾ വ്യക്തമായിരിക്കുകയാണ്. ഇപ്പോൾ നടക്കുന്ന ഗൂഢാലോചനകൾ പിന്നീട് വ്യക്തമാകുമെന്നും അദ്ദേഹം കൂട്ടിച്ചേർത്തു. കുറ്റാരോപിതനായ ആളെയല്ല ഹൈക്കോടതിയെയാണ് താൻ വിശ്വസിക്കുന്നതെന്നും അദ്ദേഹം വ്യക്തമാക്കി.

പ്രതിപക്ഷത്തിന് പരാജയ ഭീതി

'ആരോഗ്യ മന്ത്രിക്കെതിരായ പ്രതിഷേധം രാഷ്ട്രീയ ലക്ഷ്യം വെച്ചുകൊണ്ടുള്ളതാണ്. പ്രതിപക്ഷത്തിന്‍റെ പരാജയ ഭീതിയാണ് റീത്ത് വെച്ചുള്ള പ്രതിഷേധത്തിന് കാരണം. ഇനിയും ഇതു പോലുള്ള നാടകങ്ങൾ പ്രതീക്ഷിക്കാം', മന്ത്രി പറഞ്ഞു. സർക്കാരിനെതിരെ ബോധപൂർവ്വം വിവാദങ്ങൾ സൃഷ്ടിക്കാനാണ് ചിലർ ശ്രമിക്കുന്നതെന്നും അദ്ദേഹം വിമർശിച്ചു.

എം പിയുടെ അസാന്നിധ്യം

മലബാർ ഡിസ്റ്റിലറിയുടെ ഉദ്ഘാടന ചടങ്ങിൽ വി കെ ശ്രീകണ്ഠൻ എം പിയുടെ അസാന്നിധ്യം നിരാശയുണ്ടാക്കുന്നതാണെന്ന് മന്ത്രി പറഞ്ഞു. തറക്കല്ലിടൽ ചടങ്ങിൽ എം പിയുടെ നിർദേശം പണി പെട്ടെന്ന് പൂർത്തിയാക്കണം എന്നതായിരുന്നു. ആ നിർദേശം സർക്കാർ നടപ്പാക്കിയിരിക്കുന്നു. 

അക്കാര്യം അദ്ദേഹം മാധ്യമങ്ങളിലൂടെ അറിയുമായിരിക്കുമെന്നും അദ്ദേഹം പറഞ്ഞു. എലപ്പുള്ളിയിൽ സ്വകാര്യ മദ്യ നിർമ്മാണശാലക്ക് അനുമതി നൽകിയപ്പോൾ സർക്കാർ ഡിസ്റ്റിലറി എവിടെ എന്ന് ചോദിച്ചവർക്കുള്ള മറുപടി കൂടിയാണിതെന്നും മന്ത്രി ഓർമ്മിപ്പിച്ചു.

ബാർ സമയമാറ്റം

ബാറിന്റെ സമയം വർധിപ്പിച്ചതിൽ വിവാദമുണ്ടാക്കാൻ ചിലർ ശ്രമിച്ചതായി അദ്ദേഹം കുറ്റപ്പെടുത്തി. സർക്കാർ എല്ലാം വളരെ സുതാര്യമായാണ് നടപ്പാക്കിയത്. ബാറുകളുടെ പ്രവർത്തന സമയം മാറ്റിയതിൽ വലിയ പിന്തുണയാണ് സർക്കാർ നടപടിക്ക് ലഭിച്ചത്. 

'ബംഗ്ളൂരിൽ രാവിലെ ഒമ്പത് മുതൽ രാത്രി ഒരു മണി വരെയാണ് ബാറുകൾ പ്രവർത്തിക്കുന്നത്. ആന്ധ്ര, തമിഴ്നാട്, തെലങ്കാന എന്നിവിടങ്ങളിൽ എല്ലാം രാത്രി 12 മണി വരെയാണ് സമയം. അവിടെ അത് ആകാം, ഇവിടെ ആകാൻ പറ്റില്ലെന്ന് പറയുന്നത് അംഗീകരിക്കാനാവില്ല', മന്ത്രി വ്യക്തമാക്കി.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Minister M.B. Rajesh states that Sabarimala conspiracies are now clear and justifies the bar timing extension in Kerala.

#MBRajesh #Sabarimala #KeralaPolitics #Palakkad #MalabarDistillery #ExcisePolicy #KVARTHA