കണ്ണൂർ: (KVARTHA) ജില്ലയിലെ സി.പി.എം ശക്തികേന്ദ്രമായ മലപ്പട്ടത്ത് യൂത്ത് കോൺഗ്രസ് നടത്തിയ പദയാത്ര സംഘർഷത്തിൽ കലാശിച്ചു. യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിൽ എം.എൽ.എ നയിച്ച പദയാത്ര മലപ്പട്ടം ടൗണിലെത്തിയപ്പോഴാണ് സി.പി.എം, യൂത്ത് കോൺഗ്രസ് പ്രവർത്തകർ തമ്മിൽ വ്യാപകമായ കല്ലേറും വടിയേറുമുണ്ടായത്. 

സി.പി.എം ലോക്കൽ കമ്മിറ്റി ഓഫീസിന് മുന്നിൽ നടന്ന സംഘർഷത്തിൽ ഇരു വിഭാഗങ്ങളും പരസ്പരം കുപ്പികളും വടികളും ഉപയോഗിച്ച് ആക്രമിച്ചു. സമാപന സമ്മേളനം ഉദ്ഘാടനം ചെയ്യാനെത്തിയ കെ. സുധാകരൻ എം.പി, രാഹുൽ മാങ്കൂട്ടത്തിൽ എന്നിവർ ഇരുന്ന വേദിക്ക് നേരെയും കല്ലേറുണ്ടായെന്ന് കോൺഗ്രസ് നേതാക്കൾ ആരോപിച്ചു. പോലീസ് ഇടപെട്ടാണ് കൂടുതൽ സംഘർഷം ഒഴിവാക്കിയത്.

കഴിഞ്ഞ ആഴ്ച യൂത്ത് കോൺഗ്രസ് അടുവാപ്പുറത്ത് സ്ഥാപിച്ച ഗാന്ധി സ്തൂപം തകർത്തതിൽ പ്രതിഷേധിച്ചാണ് രാഹുൽ മാങ്കൂട്ടത്തിലിന്റെ നേതൃത്വത്തിൽ പദയാത്രയും പ്രതിഷേധ സമ്മേളനവും സംഘടിപ്പിച്ചത്. യൂത്ത് കോൺഗ്രസ് പ്രവർത്തകർ നേരത്തെ അനുമതി വാങ്ങി നടത്തിയ പരിപാടിക്ക് നേരെ സി.പി.എം പ്രവർത്തകരാണ് അക്രമം നടത്തിയതെന്ന് രാഹുൽ മാങ്കൂട്ടത്തിൽ ആരോപിച്ചു. 

എന്നാൽ, മനഃപൂർവം സംഘർഷമുണ്ടാക്കാനാണ് യൂത്ത് കോൺഗ്രസ് പരിപാടി സംഘടിപ്പിച്ചതെന്ന് സി.പി.എം ആരോപിച്ചു. ഓഫീസ് പൊളിക്കുമെന്ന് മുദ്രാവാക്യം വിളിച്ച് പ്രകോപനം സൃഷ്ടിക്കുകയായിരുന്നുവെന്നും സി.പി.എം പ്രാദേശിക നേതാക്കൾ പറഞ്ഞു.

സി.പി.എമ്മിന്റെ ശക്തികേന്ദ്രമായ മലപ്പട്ടത്ത് ഏറെ നാളായി സംഘർഷാവസ്ഥ നിലനിൽക്കുന്നുണ്ട്. കഴിഞ്ഞ ആഴ്ച യൂത്ത് കോൺഗ്രസ് തളിപ്പറമ്പ് നിയോജകമണ്ഡലം സെക്രട്ടറി സനീഷിന്റെ വീട് ആക്രമിക്കുകയും കോൺഗ്രസ് സ്ഥാപിച്ച ഗാന്ധി സ്തൂപം തകർക്കുകയും ചെയ്തിരുന്നു. സി.പി.എം മൃഗീയ ഭൂരിപക്ഷത്തിൽ പ്രതിപക്ഷമില്ലാതെ ഭരിക്കുന്ന പഞ്ചായത്തുകളിലൊന്നാണ് മലപ്പട്ടം. 

ഇവിടെ മറ്റു പാർട്ടികൾക്ക് പ്രവർത്തന സ്വാതന്ത്ര്യമില്ലെന്ന പരാതിയുണ്ട്. സി.പി.എം സംസ്ഥാന സെക്രട്ടറി എം.വി. ഗോവിന്ദൻ പ്രതിനിധാനം ചെയ്യുന്ന തളിപ്പറമ്പ് മണ്ഡലത്തിലാണ് മലപ്പട്ടം സ്ഥിതി ചെയ്യുന്നത്.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ രേഖപ്പെടുത്തുക. കൂടുതൽ പേരിലേക്ക് ഷെയർ ചെയ്യുക.

Article Summary: A Youth Congress march in Malappattam, a CPM stronghold in Kannur, turned violent with stone pelting and lathi charges between CPM and Youth Congress workers. The incident occurred near the CPM local committee office during a protest against the vandalization of a Gandhi statue.

#KeralaPolitics, #KannurViolence, #YouthCongress, #CPMClash, #Malappattam, #PoliticalTension