അപകീർത്തി വാർത്ത; പി കെ ശ്രീമതിക്ക് കണ്ണൂരിൽ സ്വീകരണം, സുദിനം പത്രത്തിന് മുന്നിൽ മഹിളാ അസോസിയേഷൻ പ്രതിഷേധ മാർച്ച്

​​​​​​​

കണ്ണൂർ:(KVARTHA) മുൻ എംപിയും ജനാധിപത്യ മഹിളാ അസോസിയേഷൻ അഖിലേന്ത്യാ നേതാവുമായ പി കെ ശ്രീമതിക്കെതിരെ അപകീർത്തികരമായ വാർത്ത നൽകുകയും സമൂഹമാധ്യമങ്ങളിൽ പ്രചാരണം നടത്തുകയും ചെയ്തതിൽ പ്രതിഷേധിച്ച് ജനാധിപത്യ മഹിളാ അസോസിയേഷൻ കണ്ണൂർ നഗരത്തിൽ പ്രതിഷേധ മാർച്ച് നടത്തി. കണ്ണൂർ റെയിൽവേ സ്റ്റേഷനിൽ വന്നിറങ്ങിയ പി കെ ശ്രീമതിക്ക് പ്രവർത്തകർ ആവേശകരമായ മുദ്രാവാക്യം വിളികളോടെ സ്വീകരണം നൽകി.

പത്രം ഓഫീസിലേക്ക് ഇരച്ചുകയറി പ്രതിഷേധക്കാർ

പ്ലാസ ജങ്ഷനിൽ നിന്നാരംഭിച്ച പ്രതിഷേധ മാർച്ച് വാർത്ത പ്രസിദ്ധീകരിച്ച 'സുദിനം' പത്രത്തിന് മുൻപിൽ സമാപിച്ചു. പത്രഓഫീസിലേക്ക് കയറിയ നേതാക്കളും പ്രവർത്തകരും വാർത്തയുടെ വിശദീകരണം ആവശ്യപ്പെട്ടു. പി കെ ശ്രീമതിക്കെതിരെയുള്ള വാർത്തയിൽ പിശക് പറ്റിയിട്ടുണ്ടെന്നും തിരുത്ത് നൽകിയിട്ടുണ്ടെന്നും പത്രാധിപസമിതി അംഗങ്ങൾ അറിയിച്ചതോടെയാണ് പ്രതിഷേധക്കാർ അടങ്ങിയത്.

പത്രത്തിന് മുന്നിൽ പ്രതിഷേധ ധർണ

തുടർന്ന് നൂറോളം പേരടങ്ങുന്ന പ്രവർത്തകർ പത്രം ഓഫീസിന് മുൻപിൽ പ്രതിഷേധ ധർണ നടത്തി. ജനാധിപത്യ മഹിളാ അസോസിയേഷൻ അഖിലേന്ത്യാ സെക്രട്ടറി എൻ സുകന്യ ധർണാ സമരം ഉദ്ഘാടനം ചെയ്തു. ജില്ലാ പ്രസിഡൻ്റ് രജനി ടി അധ്യക്ഷത വഹിച്ചു. സെക്രട്ടറി പി കെ ശ്യാമള സ്വാഗതം പറഞ്ഞു. സംസ്ഥാന വൈസ് പ്രസിഡൻ്റ് എം വി സരള പ്രസംഗിച്ചു. കെ പി വി പ്രീത, സുലേഖ, ശോഭ, പ്രകാശിനി തുടങ്ങിയവർ മാർച്ചിന് നേതൃത്വം നൽകി.

പ്രാദേശിക വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ  പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Mahila Association protested in Kannur over fake news on P K Sreemathi.

#PKSreemathi #MahilaAssociation #KannurNews #SudinamNewspaper #MalayalamNews #AnjanaNews