അൻവറിന്റെ സ്ഥാനാർഥിത്വം ബാധിക്കില്ല; ആത്മവിശ്വാസം ആകാശത്തോളം- എം സ്വരാജ്

മലപ്പുറം: (KVARTHA) നിലമ്പൂർ നിയമസഭാ മണ്ഡലത്തിൽ പി.വി. അൻവർ സ്വതന്ത്ര സ്ഥാനാർഥിയായി മത്സരിച്ചേക്കുമെന്ന വാർത്തകളോട് പ്രതികരിച്ച് ഇടതുമുന്നണി സ്ഥാനാർഥി എം. സ്വരാജ്. അൻവറിന്റെ സ്ഥാനാർഥിത്വം എൽ.ഡി.എഫിനെ ബാധിക്കില്ലെന്ന് അദ്ദേഹം വ്യക്തമാക്കി. ഒരു വോട്ടർ എന്ന നിലയിൽ ആർക്കും തിരഞ്ഞെടുപ്പിൽ മത്സരിക്കാൻ അവകാശമുണ്ടെന്നും സ്വരാജ് കൂട്ടിച്ചേർത്തു. നിലമ്പൂരിൽ മാധ്യമപ്രവർത്തകരുമായി സംസാരിക്കുകയായിരുന്നു അദ്ദേഹം.

നിലമ്പൂരിലെ തിരഞ്ഞെടുപ്പ് വിജയത്തിൽ തനിക്ക് ആത്മവിശ്വാസം ആകാശത്തോളമുണ്ടെന്ന് സ്വരാജ് പറഞ്ഞു. ഷൊർണ്ണൂരിൽ നിന്ന് നിലമ്പൂരിലേക്കുള്ള യാത്രയ്ക്ക് വലിയ പ്രചാരണം നൽകിയിരുന്നില്ലെങ്കിലും, പിന്നിട്ട ഓരോ സ്റ്റേഷനിലും ആളുകൾ ആശംസ അറിയിക്കാനെത്തിയിരുന്നു. നിലമ്പൂരിലും വലിയ ജനക്കൂട്ടം സ്വീകരിക്കാൻ എത്തിയിരുന്നു. എൽ.ഡി.എഫ് പ്രവർത്തകർക്ക് പുറമെയും ആളുകളുണ്ടായത് ആത്മവിശ്വാസം വർദ്ധിപ്പിച്ചതായും എം. സ്വരാജ് അറിയിച്ചു. മത്സരിക്കാൻ ആഗ്രഹിക്കുന്നവരെയെല്ലാം സ്വാഗതം ചെയ്യുന്നുവെന്നും അദ്ദേഹം പറഞ്ഞു.

അർധരാത്രിയിൽ പി.വി. അൻവറിന്റെ വീട്ടിലെത്തി രാഹുൽ മാങ്കൂട്ടത്തിൽ നടത്തിയ കൂടിക്കാഴ്ചയെക്കുറിച്ചുള്ള ചോദ്യത്തിന്, 'ഓരോരുത്തരും അവരവരുടെ നിലവാരത്തിനനുസരിച്ചുള്ള രാഷ്ട്രീയപ്രവർത്തനമാണ് നടത്തുക' എന്നായിരുന്നു സ്വരാജിന്റെ മറുപടി. അതിൽ തനിക്ക് അഭിപ്രായം പറയാനാകില്ലെന്നും, ഒരു ആഗ്രഹവും വെച്ചുപുലർത്താനാകില്ലെന്നും അദ്ദേഹം കൂട്ടിച്ചേർത്തു. ഓരോ വ്യക്തിയും അവർക്ക് ചേർന്ന രീതിയിലുള്ള രാഷ്ട്രീയ പ്രവർത്തനവും സംഘടനാ പ്രവർത്തനവും തുടരുമെന്നും എം. സ്വരാജ് പറഞ്ഞു.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കുക.

Article Summary: M. Swaraj confident Anwar's candidacy won't affect LDF in Nilambur.

#MSwaraj #PVAhwar #Nilambur #KeralaElections #LDF #KeralaPolitics