വോട്ടർ പട്ടിക പരിഷ്കരണത്തിൽ ദുരൂഹത; എൽഡിഎഫ് ജില്ലാ ഇലക്ഷൻ ഓഫീസിലേക്ക് പ്രതിഷേധ മാർച്ച് നടത്തി

കണ്ണൂർ: (KVARTHA) തീവ്ര വോട്ടർപട്ടിക പരിഷ്കരണ (എസ്.ഐ.ആർ) നടപടിക്രമങ്ങളിൽ അടിമുടി ദുരൂഹതയാണെന്ന് സി.പി.എം ജില്ലാ സെക്രട്ടറി കെ.കെ രാഗേഷ് ആരോപിച്ചു. 

എസ്.ഐ.ആർ അപാകതകളും പ്രശ്നങ്ങളും പരിഹരിക്കണമെന്നാവശ്യപ്പെട്ട് എൽ.ഡി.എഫിന്റെ നേതൃത്വത്തിൽ ജില്ലാ ഇലക്ഷൻ ഓഫീസിലേക്ക് നടത്തിയ പ്രതിഷേധ മാർച്ചും ധർണയും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

പ്രവാസി വോട്ടുകളിൽ സംശയം

കേരളത്തിൽ പ്രവാസി വോട്ടർമാരുടെ എണ്ണത്തിൽ എട്ടാം സ്ഥാനത്തുള്ള കണ്ണൂർ ജില്ലയിലാണ് ഇപ്പോൾ ഏറ്റവും കൂടുതൽ പ്രവാസി വോട്ടുകൾ ചേർക്കപ്പെട്ടിരിക്കുന്നത്. ഇത് പരിശോധിക്കേണ്ട കാര്യമാണെന്ന് കെ.കെ രാഗേഷ് ചൂണ്ടിക്കാട്ടി. 

സമഗ്ര വോട്ടർ പട്ടിക പരിഷ്കരണം ജനങ്ങളിൽ വലിയ ആശങ്കകൾ ഉയർത്തിയിരിക്കുകയാണ്. ലക്ഷക്കണക്കിന് ആളുകൾ പട്ടികയിൽ നിന്ന് പുറത്തുപോകുമെന്ന ഭീതി നിലനിൽക്കുന്നുണ്ട്.

സമയം നീട്ടി നൽകണം

പുതുതായി പേരുകൾ ഉൾപ്പെടുത്തുന്നത് സംബന്ധിച്ചും വ്യാപക പരാതികൾ ഉയർന്നു വന്നിട്ടുണ്ട്. ഇക്കാര്യങ്ങളിൽ വ്യക്തത വരുത്താൻ ഇലക്ഷൻ കമ്മീഷൻ തയ്യാറാവണം. ഇതര സംസ്ഥാനങ്ങളിലെ ആളുകളടക്കം പട്ടികയിൽ കടന്നുവരുന്ന സ്ഥിതിയുണ്ട്. 

ഇത്തരത്തിൽ ഫെബ്രുവരി 21-ന് പട്ടിക പ്രസിദ്ധീകരിച്ചാൽ ഒട്ടേറെ അപാകതകൾ ഉണ്ടാകും. അതിനാൽ ഫെബ്രുവരി 21-ന് ശേഷം രണ്ടാഴ്ചയെങ്കിലും അപാകതകൾ പരിഹരിക്കുന്നതിന് സമയം അനുവദിക്കണമെന്നും അദ്ദേഹം ആവശ്യപ്പെട്ടു. കൂടാതെ, ബി.എ.ൽഒമാർ അറിയാതെ തന്നെ പട്ടികയിൽ പേര് ഉൾപ്പെടുത്തുന്ന സാഹചര്യം ഒരു കാരണവശാലും ഉണ്ടാകരുതെന്നും രാഗേഷ് പറഞ്ഞു.

പങ്കെടുത്ത നേതാക്കൾ

എൽ.ഡി.എഫ് പ്രതിഷേധ സമരത്തിൽ സി.പി.ഐ ജില്ലാ സെക്രട്ടറി സി.പി സന്തോഷ് കുമാർ അധ്യക്ഷത വഹിച്ചു. എൽ.ഡി.എഫ് ജില്ലാ കൺവീനർ എൻ. ചന്ദ്രൻ സ്വാഗതം പറഞ്ഞു. വിവിധ കക്ഷി നേതാക്കളായ കെ.പി സഹദേവൻ, വി.കെ ഗിരിജൻ, എം. ഉണ്ണികൃഷ്ണൻ, എം.പി മുരളി, ടി.വി രാജേഷ്, എം. പ്രകാശൻ, ഇഖ്ബാൽ പോപ്പുലർ തുടങ്ങിയവർ നേതൃത്വം നൽകി. എം. പ്രകാശൻ മാസ്റ്റർ നന്ദി പറഞ്ഞു.

ഈ വാർത്ത വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്

Article Summary: LDF staged a protest march to the District Election Office in Kannur, alleging irregularities in the voter list revision. CPM District Secretary K.K. Ragesh highlighted suspicious increases in NRI voters and demanded an extension for rectifying errors.

#Kannur #LDF #VoterList #ElectionCommission #KKRagesh #Politics #KeralaNews #Protest