കണ്ണൂർ: (KVARTHA) കെ.പി.സി.സി പുനഃസംഘടനയിൽ മുതിർന്ന നേതാക്കളെ തഴഞ്ഞതിൽ കോൺഗ്രസിനുള്ളിൽ ശക്തമായ പ്രതിഷേധം ഉയരുന്നു. യു.ഡി.എഫ് കൺവീനറും മുൻ മന്ത്രിയുമായിരുന്ന എം.എം. ഹസ്സൻ, ബെന്നി ബെഹനാൻ, കെ. മുരളീധരൻ തുടങ്ങിയ പ്രമുഖരെ ഒഴിവാക്കിയാണ് ഹൈക്കമാൻഡ് സാമുദായിക പരിഗണന നൽകി പുനഃസംഘടന നടത്തിയത്.

യു.ഡി.എഫ് കൺവീനർ സ്ഥാനത്തുനിന്ന് മുതിർന്ന നേതാവായ ഹസ്സനെ മാറ്റിയത് മുൻകൂട്ടി അറിയിക്കാതെയാണെന്ന പരാതിയും ഉണ്ട്. അഞ്ച് തവണ എം.എൽ.എയും മുൻ മന്ത്രിയുമായിരുന്ന ഹസ്സൻ 1970-കളിൽ കെ.എസ്.യുവിനെയും പിന്നീട് യൂത്ത് കോൺഗ്രസിനെയും നയിച്ച നേതാവാണ്. ഹസ്സനെ ഒഴിവാക്കി ഷാഫി പറമ്പിലിന് അവസരം നൽകിയത് തലമുറ മാറ്റമായി വ്യാഖ്യാനിക്കാമെങ്കിലും, ഇത് പാർട്ടിയെ ദുർബലപ്പെടുത്തുകയാണ് ചെയ്തതെന്ന ആരോപണവും ശക്തമാണ്.

കെ.പി.സി.സി പുനഃസംഘടനയിൽ എ.ഐ.സി.സി സംഘടനാ ജനറൽ സെക്രട്ടറി കെ.സി. വേണുഗോപാലിന്റെ താൽപ്പര്യമാണ് പൂർണ്ണമായും സംരക്ഷിക്കപ്പെട്ടതെന്ന പരാതി ഗ്രൂപ്പ് ഭേദമില്ലാതെ ഉയരുന്നുണ്ട്. വർക്കിംഗ് പ്രസിഡന്റായി നിയോഗിക്കപ്പെട്ട അനിൽകുമാർ കെ.സിയുടെ അടുത്ത അനുയായിയാണ്. 

സുധാകര പക്ഷത്തുനിന്ന് സണ്ണി ജോസഫിനെ അടർത്തിയെടുത്ത് കെ.പി.സി.സി അധ്യക്ഷനാക്കിയതിലൂടെ കണ്ണൂരിൽ സുധാകര വിഭാഗത്തിൽ ഭിന്നത വരുത്താൻ കെ.സി. വേണുഗോപാലിന് കഴിഞ്ഞു. മുസ്‌ലിം പ്രാതിനിധ്യത്തിന്റെ പേരിൽ ഷാഫി പറമ്പിലിനെ വർക്കിംഗ് പ്രസിഡന്റാക്കിയപ്പോൾ, ഇരട്ട പദവികൾ പ്രോത്സാഹിപ്പിക്കരുതെന്ന ദേശീയ നേതൃത്വത്തിന്റെ നിർദ്ദേശം അവഗണിക്കപ്പെട്ടു.

കോൺഗ്രസ് പ്രവർത്തക സമിതിയിൽ സ്ഥിരം ക്ഷണിതാവെന്ന ആലങ്കാരിക പദവി നൽകി കെ. സുധാകരനെ ഒതുക്കിയതിൽ കണ്ണൂരിൽ ഉൾപ്പെടെ വലിയ പ്രതിഷേധമുണ്ട്. സംസ്ഥാനത്തെ 14 ജില്ലകളിലും സുധാകരനെ പിന്തുണയ്ക്കുന്ന നേതാക്കളും പ്രവർത്തകരുമുണ്ട്. 

നേരത്തെ സുധാകര പക്ഷത്തുണ്ടായിരുന്ന സണ്ണി ജോസഫ് കെ.സി. വേണുഗോപാലിന്റെ താൽപ്പര്യങ്ങൾ സംരക്ഷിക്കാൻ ഇറങ്ങിയാൽ മുന്നോട്ടുള്ള യാത്ര ദുഷ്കരമാകും. ഇപ്പോൾ തന്നെ കണ്ണൂർ ഡി.സി.സി അധ്യക്ഷനായി സുധാകര ഗ്രൂപ്പിലെ മാർട്ടിൻ ജോർജിനെ നിലനിർത്തണമെന്ന ആവശ്യം പാർട്ടിക്കുള്ളിൽ നിന്ന് ഉയർന്നിട്ടുണ്ട്. 

സുധാകര പക്ഷത്തോടൊപ്പം നിന്ന് വളർന്ന നേതാവല്ലാതെ സ്വന്തമായി ഒരു അടിത്തറയില്ലാത്ത വ്യക്തിയാണ് സണ്ണി ജോസഫ്. മൂന്ന് തവണ പേരാവൂർ എം.എൽ.എയും മുൻ മന്ത്രിയുമായിരുന്ന സണ്ണി ജോസഫിന് മണ്ഡലത്തിലോ പുറത്തോ പാർട്ടിക്കുള്ളിൽ പത്ത് ആളുകളുടെ പിന്തുണ പോലുമില്ല. കത്തോലിക്കാ സഭയുടെ തണലിലാണ് സണ്ണി ജോസഫ് രാഷ്ട്രീയത്തിൽ വളർന്നത്. 

സുധാകരനും അദ്ദേഹത്തോടൊപ്പമുള്ള ശക്തമായ ഗ്രൂപ്പുമാണ് അദ്ദേഹത്തിന്റെ ബലം. കെ.സി. വേണുഗോപാലിന്റെ താൽപ്പര്യങ്ങൾ സംരക്ഷിക്കാൻ കെ.പി.സി.സി അധ്യക്ഷ സ്ഥാനം ഉപയോഗിച്ചാൽ ആദ്യം തിരിച്ചടി നൽകുക സുധാകരനായിരിക്കും. നിലമ്പൂർ ഉപതെരഞ്ഞെടുപ്പും തദ്ദേശ സ്വയംഭരണ തെരഞ്ഞെടുപ്പുമാണ് പുതിയ കെ.പി.സി.സി നേതൃത്വം നേരിടാൻ പോകുന്ന പ്രധാന വെല്ലുവിളികൾ. 

അതിനുമുമ്പ് ഡി.സി.സി, കെ.പി.സി.സി പുനഃസംഘടന നടക്കേണ്ടതുണ്ട്. ഇതിലും കെ.സി. വേണുഗോപാലിന്റെ ഇടപെടലുണ്ടായാൽ അർഹമായ അംഗീകാരം കിട്ടാത്ത വിവിധ ഗ്രൂപ്പുകൾ പരസ്യമായി രംഗത്തിറങ്ങുമെന്നത് ഉറപ്പാണ്.

കെപിസിസി പുനഃസംഘടനയെക്കുറിച്ചുള്ള നിങ്ങളുടെ അഭിപ്രായങ്ങളും പ്രതികരണങ്ങളും പങ്കുവെക്കുക. 

Summary: Strong protests erupt within the Congress party in Kerala over the omission of senior leaders like M.M. Hassan, Benny Behanan, and K. Muraleedharan in the KPCC reorganization. Allegations arise that AICC General Secretary K.C. Venugopal's interests heavily influenced the reshuffle, potentially weakening the party.

#KPCCReorganization, #KeralaCongress, #KCVenugopal, #MMHassan, #BennyBehanan, #KSudhakaran