കൊടുവള്ളി മേൽപ്പാലം യാഥാർത്ഥ്യമായി; തടസ്സങ്ങളില്ലാത്ത റോഡ് ഗതാഗതം ലക്ഷ്യമെന്ന് മുഖ്യമന്ത്രി

തലശ്ശേരി: (KVARTHA) കേരളത്തിൽ ലെവൽ ക്രോസുകളില്ലാത്ത റോഡ് ശൃംഖല എന്ന ലക്ഷ്യത്തിൻ്റെ ഭാഗമായി സംസ്ഥാനത്ത് 60 റെയിൽവേ മേൽപ്പാലങ്ങൾ നിർമ്മിക്കുന്നതിനായി 2028 കോടി രൂപ വകയിരുത്തിയിട്ടുണ്ടെന്ന് മുഖ്യമന്ത്രി പിണറായി വിജയൻ പറഞ്ഞു. തലശ്ശേരിയിലെ കൊടുവള്ളി റെയിൽവേ മേൽപ്പാലം നാടിന് സമർപ്പിച്ച് സംസാരിക്കുകയായിരുന്നു അദ്ദേഹം. ഈ തുകയിൽ 1800 കോടി രൂപയും കിഫ്ബി വഴിയാണ് ചെലവഴിക്കുന്നത്. റോഡ് ഗതാഗതത്തിന്റെ വേഗത വർദ്ധിപ്പിക്കുന്നതിന് റെയിൽവേ മേൽപ്പാലങ്ങൾ അത്യാവശ്യമാണെന്നും ഈ കാഴ്ചപ്പാടോടെയാണ് സർക്കാർ 'ലെവൽ ക്രോസ് ഇല്ലാത്ത കേരളം' എന്ന പദ്ധതി ആവിഷ്കരിച്ചതെന്നും മുഖ്യമന്ത്രി വ്യക്തമാക്കി.

വാഗ്ദാനങ്ങൾ സമയബന്ധിതമായി പൂർത്തീകരിക്കുന്ന ഒരു ഭരണസംവിധാനമാണ് കേരളത്തിലുള്ളതെന്നും, ജനങ്ങൾക്ക് സർക്കാരിൽ വിശ്വാസം വർധിച്ചുവരികയാണെന്നും അദ്ദേഹം ചൂണ്ടിക്കാട്ടി. ജനങ്ങളുടെ വിശ്വാസം ഒട്ടും മുറിയാതെ കാത്തുസൂക്ഷിക്കാൻ സർക്കാർ പ്രതിജ്ഞാബദ്ധമാണെന്നും മുഖ്യമന്ത്രി കൂട്ടിച്ചേർത്തു.

തലശ്ശേരിയിലെ ജനങ്ങളുടെ ദീർഘകാലത്തെ ആഗ്രഹമാണ് കൊടുവള്ളി മേൽപ്പാലത്തിലൂടെ യാഥാർത്ഥ്യമായത്. പദ്ധതിക്ക് വലിയ തടസ്സങ്ങൾ നേരിട്ടിരുന്നെങ്കിലും, എല്ലാവർക്കും സന്തോഷം നൽകും വിധം പൂർത്തീകരിക്കാൻ സാധിച്ചു. ജനങ്ങൾ ആഗ്രഹിക്കുന്ന വികസന പദ്ധതികൾക്ക് ആവശ്യമായത്ര പണം സംസ്ഥാന ഖജനാവിൽ ഉണ്ടായിരുന്നില്ല. ഈ പ്രതിസന്ധി മറികടക്കാനാണ് കിഫ്ബി പുനരുജ്ജീവിപ്പിച്ചത്.

ഇന്ത്യൻ റെയിൽവേയുടെയും കിഫ്ബിയുടെയും സഹായത്തോടെ 36 കോടി 37 ലക്ഷം രൂപ ചെലവഴിച്ചാണ് മേൽപ്പാലം നിർമ്മിച്ചത്. ഇതിൽ 26.31 കോടി രൂപ സംസ്ഥാന വിഹിതവും 10 കോടി രൂപ റെയിൽവേ വിഹിതവുമാണ്. സ്ഥലം ഏറ്റെടുക്കുന്നതിനായി 16.25 ലക്ഷം രൂപ ചെലവിട്ടു. 27 പേരിൽ നിന്ന് 123.6 സെന്റ് സ്ഥലമാണ് ഇതിനായി ഏറ്റെടുത്തത്. ഭൂമി ഏറ്റെടുക്കുന്നതുമായി ബന്ധപ്പെട്ട് പല പ്രശ്നങ്ങളുമുണ്ടായിരുന്നെന്നും, ചിലർ പദ്ധതി തടസ്സപ്പെടുത്താൻ ശ്രമിച്ചെന്നും മുഖ്യമന്ത്രി പറഞ്ഞു. എന്നാൽ ഈ പ്രതിസന്ധികളെല്ലാം മറികടന്ന് സമയബന്ധിതമായി പണി പൂർത്തിയാക്കാൻ സാധിച്ചു.

കേരളത്തിൽ ആദ്യമായി സ്റ്റീൽ കോൺക്രീറ്റ് കോമ്പോസിറ്റ് സ്ട്രക്ചർ മാതൃക ഉപയോഗിച്ചാണ് റെയിൽവേ ഗേറ്റിന് മുകളിലൂടെ 314 മീറ്റർ നീളമുള്ള പാലം നിർമ്മിച്ചത്. പാലത്തിന് 10.05 മീറ്റർ വീതിയുണ്ട്. പൈൽ, പൈൽ ക്യാപ്പ് എന്നിവ കോൺക്രീറ്റും, പിയർ, പിയർ ക്യാപ്പ്, ഗർഡർ എന്നിവ സ്റ്റീലും ഉപയോഗിച്ചാണ് നിർമ്മിച്ചിരിക്കുന്നത്. ഡെക്ക് സ്ലാബ് കോൺക്രീറ്റിലാണ് നിർമ്മിച്ചത്.

പൊതുമരാമത്ത്, ടൂറിസം വകുപ്പ് മന്ത്രി പി.എ. മുഹമ്മദ് റിയാസ് അധ്യക്ഷനായിരുന്നു. ഈ സർക്കാർ അധികാരത്തിലെത്തിയ ശേഷം നിർമ്മാണം പൂർത്തിയാക്കിയ 147-ാമത് പാലമാണ് കൊടുവള്ളിയിലേതെന്ന് മന്ത്രി പറഞ്ഞു. അഞ്ച് വർഷം കൊണ്ട് 100 പാലങ്ങൾ എന്ന ലക്ഷ്യം മൂന്ന് വർഷവും എട്ട് മാസവും കൊണ്ട് പൂർത്തിയാക്കി. 200 പാലങ്ങൾ പൂർത്തിയാക്കാനാണ് ഇപ്പോൾ ശ്രമിക്കുന്നതെന്നും അദ്ദേഹം പറഞ്ഞു.

നിയമസഭ സ്പീക്കർ അഡ്വ. എ.എൻ. ഷംസീർ വിശിഷ്ടാതിഥിയായി പങ്കെടുത്തു. അടിസ്ഥാന സൗകര്യ വികസന രംഗത്ത് സർക്കാർ വലിയ കുതിച്ചുചാട്ടമാണ് നടത്തുന്നത്. പ്രതിസന്ധികൾക്കിടയിലും ഭൂമി ഏറ്റെടുക്കൽ വേഗത്തിൽ പൂർത്തിയാക്കി. നാടിൻ്റെ വികസനം ത്വരിതപ്പെടുത്താൻ ഇച്ഛാശക്തിയോടെ സർക്കാർ പ്രവർത്തിച്ചെന്നും തലശ്ശേരിക്ക് ലഭിച്ച അംഗീകാരമാണിതെന്നും സ്പീക്കർ പറഞ്ഞു.

ഉദ്ഘാടനത്തിനു ശേഷം മുഖ്യമന്ത്രിയും സ്പീക്കറും മന്ത്രിയും തുറന്ന വാഹനത്തിൽ പാലത്തിലൂടെ സഞ്ചരിച്ചു. തലശ്ശേരി നഗരസഭ ചെയർപേഴ്സൺ കെ.എം. ജമുനാറാണി ടീച്ചർ, കൗൺസിലർ ടി.കെ. സാഹിറ, ആർ.ബി.ഡി.സി.കെ മാനേജിംഗ് ഡയറക്ടർ എസ്. സുഹാസ്, ഡെപ്യൂട്ടി ജനറൽ മാനേജർ സി. ദേവേശൻ, രാഷ്ട്രീയ പാർട്ടി പ്രതിനിധികളായ സി.കെ. രമേശൻ, സജീവ് മാറോളി, സി.പി. ഷൈജൻ, അഡ്വ. കെ.എ. ലത്തീഫ്, കെ. സുരേശൻ, സന്തോഷ് വി. കരിയാട്, ബി.പി. മുസ്തഫ, കെ. മനോജ്, വി.കെ. ഗിരിജൻ എന്നിവർ ചടങ്ങിൽ സംസാരിച്ചു.

കൊടുവള്ളി മേൽപ്പാലം യാഥാർത്ഥ്യമായതിനെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Inauguration of Koduvalli Overpass in Thalassery, Kerala.

#KoduvalliOverpass #KeralaInfrastructure #Thalassery #KIFBIfunded #PinarayiVijayan #DevelopmentNews