കേന്ദ്രനിയമം പാലിച്ച് അപകടകരമല്ലാത്ത വാഹന മോഡിഫിക്കേഷനുകൾ അനുവദിക്കുമെന്ന് ഗതാഗത മന്ത്രി സി പി ജോൺ

തിരുവനന്തപുരം: (KVARTHA) അമിതമായ വെളിച്ചവും ശബ്ദവും പുറത്തേക്ക് വരുന്ന തരത്തിലുള്ള വാഹന മോഡിഫിക്കേഷനുകൾ അംഗീകരിക്കാൻ സാധ്യമല്ലെന്നും, എന്നാൽ കേന്ദ്ര നിയമങ്ങൾക്ക് വിധേയമായി അപകടകരമല്ലാത്ത മോഡിഫിക്കേഷനുകൾ അനുവദിക്കുമെന്നും ഗതാഗത മന്ത്രി സി പി ജോൺ നിയമസഭയിൽ വ്യക്തമാക്കി. വാഹനങ്ങളുടെ കളർകോഡ്, അപകടകരമല്ലാത്ത ഫിറ്റിങ്സുകൾ, വാഹനത്തിൻ്റെ പുറത്തേക്ക് തുറിച്ചുനിൽക്കാത്ത തരത്തിലുള്ള കൂട്ടിച്ചേർക്കലുകൾ എന്നിവ അനുവദിക്കുന്നതിനെക്കുറിച്ച് സർക്കാർ വിശദമായി പരിശോധിച്ചുവരികയാണ്. നിയമസഭയിൽ സജി ചെറിയാൻ എംഎൽഎ ഉന്നയിച്ച ചോദ്യത്തിന് മറുപടിയായാണ് മന്ത്രി ഇക്കാര്യം വ്യക്തമാക്കിയത്.

ഇതോടൊപ്പം പ്ലസ് ടു വിദ്യാർഥികൾക്ക് വിദ്യാഭ്യാസത്തോടൊപ്പം പ്രീ ലൈസൻസ് ലേണിങ് നൽകുന്ന പദ്ധതി സർക്കാരിൻ്റെ സജീവ പരിഗണനയിലുണ്ടെന്ന് സി പി ജോൺ വ്യക്തമാക്കി. വിദ്യാഭ്യാസ മന്ത്രിയുമായി ആലോചിച്ച് സ്കൂളുകളിലെ പാഠ്യപദ്ധതിയിൽ ഡ്രൈവിങ് നിയമങ്ങൾ കൂടി ഉൾപ്പെടുത്താനാണ് സർക്കാർ ലക്ഷ്യമിടുന്നത്. വിദ്യാർഥികൾക്ക് 18 വയസ്സ് പൂർത്തിയാകുമ്പോൾ തന്നെ ലൈസൻസ് ലഭിക്കുന്ന രീതിയിലായിരിക്കും ഈ പരിശീലനം ക്രമീകരിക്കുക. കെഎസ്ആർടിസിയുടെ നിയന്ത്രണത്തിൽ മാത്രം ഡ്രൈവിങ് സ്കൂളുകൾ വന്നതുകൊണ്ട് കാര്യമില്ലെന്നും, കൂടുതൽ പേരെ സുരക്ഷിതമായ ഡ്രൈവിങ്ങിലേക്ക് കൊണ്ടുവരികയാണ് ഈ പദ്ധതിയുടെ പ്രധാന ലക്ഷ്യമെന്നും മന്ത്രി വിശദീകരിച്ചു.

സ്വകാര്യ ബസ് മേഖല നേരിടുന്ന സാമ്പത്തിക പ്രതിസന്ധിയെ സർക്കാർ ഗൗരവത്തോടെയാണ് കാണുന്നതെന്നും നടപടികൾ ആലോചിച്ച് തീരുമാനിക്കുമെന്നും ഗതാഗത മന്ത്രി സഭയെ അറിയിച്ചു. സ്വകാര്യ മേഖല എന്നതിലുപരി പൊതുഗതാഗതം കൈകാര്യം ചെയ്യുന്ന വലിയൊരു നിക്ഷേപക മേഖലയായാണ് സ്വകാര്യ ബസ് വ്യവസായത്തെ സർക്കാർ കാണുന്നത്. അതുകൊണ്ടാണ് ബജറ്റിൽ ഇവരുടെ നികുതി പകുതിയായി കുറച്ചത്. ഇതുവഴി ഒരു ബസിന് വർഷത്തിൽ 50,000 രൂപയുടെ ആനുകൂല്യമാണ് ലഭിക്കുന്നത്. കെഎസ്ആർടിസിയും സ്വകാര്യ ബസുകളും ഒരുമിച്ചോടുന്ന മേഖലകളിൽ വരുമാന നഷ്ടം ഉണ്ടാകുന്നതായി സ്വകാര്യ ബസ് ഉടമകൾ അറിയിച്ചിട്ടുണ്ടെന്നും, ഈ പ്രശ്നം ഗൗരവത്തോടെ കണ്ട് ആവശ്യമായ നടപടികൾ സ്വീകരിക്കുമെന്നും മന്ത്രി വ്യക്തമാക്കി.

കേരളത്തിലെ വാർത്തകളും വിശേഷങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Transport Minister C.P. John stated in the Assembly that the government is considering allowing vehicle modifications that comply with central laws and are not hazardous. He also announced plans for pre-license driving training for Plus Two students and promised to address the financial crisis in the private bus sector.

#VehicleModification #KeralaMVD #TransportMinister #CPJohn #KSRTC #PrivateBusCrisis #KeralaPolitics #MalayalamNews #AnjanaNews