Controversy | പശ്ചിമഘട്ടത്തിലെ പരിസ്ഥിതിലോല മേഖല കരട് റിപ്പോർട്ട്: കേന്ദ്ര പ്രഖ്യാപനത്തിൽ കേരളത്തിന് മുറുമുറുപ്പ്

ഭാമനാവത്ത്  

കണ്ണൂർ: (KVARTHA) പശ്ചിമഘട്ടത്തിലെ 131 വില്ലേജുകൾ പരിസ്ഥിതിലോല മേഖലയായി പ്രഖ്യാപിക്കാനുള്ള കരട്‌ വിജ്ഞാപനം കേന്ദ്ര സർക്കാർ ഏകപക്ഷീയമായി പുറത്തിറക്കിയത്‌ ഫെഡറൽ സംവിധാനത്തോടുള്ള വെല്ലുവിളിയാണെന്ന നിലപാടുമായി കേരള സർക്കാർ. കേരളത്തിന്റെ ആവശ്യം പരിഗണിക്കാതെയാണ് കരട് പുറത്തിറക്കിയതെന്നാണ് ആരോപണം. 

പരിസ്ഥിതിലോല മേഖല വില്ലേജുകളായി നിജപ്പെടുത്തണമെന്ന ശുപാർശ വിദഗ്‌ധ സമിതിയുടെ പരിഗണനയിലാണുള്ളത്‌. ഇതിനിടെയിൽ കരട് പുറത്തിറക്കിയത് രാഷ്ട്രീയ മുതലെടുപ്പിനാണെന്നാണ് സി.പി.എം ആരോപണം. കേന്ദ്ര വനം, പരിസ്ഥിതി മന്ത്രാലയം 2022 ജൂലൈ ഏഴിന്‌ ഇറക്കിയ കരട്‌ വിജ്ഞാപനത്തിന്റെ കാലാവധി അവസാനിച്ച സാഹചര്യത്തിലാണ്‌ പുനർവിജ്ഞാപനം ഇറക്കിയത്‌. 

സംസ്ഥാന നിർദേശങ്ങളും ശുപാർശകളും പരിശോധിക്കാൻ മുൻ വനം ഡയറക്ടർ ജനറൽ സഞ്ജയ്‌ കുമാറിനെ നിയോഗിച്ചതായും പറയുന്നു. മുൻ വിജ്ഞാപനത്തിലുള്ളതുപോലെ 9993.7 ചതുരശ്ര കിലോമീറ്ററാണ്‌ പരിസ്ഥിതിലോല മേഖലയായി പുതിയതിലും നിലനിർത്തിയിരിക്കുന്നത്‌.
വില്ലേജുകളുടെ എണ്ണം 123 എന്നത്‌ 131 ആയി കൂട്ടിയിട്ടുണ്ട്. 

ചില വില്ലേജുകൾ വിഭജിച്ച്‌ പുതിയത്‌ രൂപീകരിച്ചിട്ടുണ്ട്. 98 വില്ലേജുകളിലായി 8711.98 ചതുരശ്ര കിലോമീറ്റർ ആയി പരിസ്ഥിതിലോല മേഖല നിജപ്പെടുത്തണമെന്നാണ്‌ കേരളത്തിന്റെ മുൻ ശുപാർശ. ഇക്കാര്യമാണ്‌ വിദഗ്ധ സമിതിയുടെ പരിശോധനയിലുള്ളത്

അന്തിമ വിജ്ഞാപനത്തിന്‌ മുന്നോടിയായി ഹിയറിങ്‌ നടത്തുമ്പോൾ കുടിയേറ്റ കർഷകർ തങ്ങളുടെ വൈഷമ്യം ബോധ്യപ്പെടുത്തും. ഈ ഘട്ടത്തിൽ സമിതിക്കുമുന്നിൽ കാര്യങ്ങൾ അവതരിപ്പിക്കാൻ അവസരമുണ്ടാകും. ജനവാസ മേഖലകളെയും കൃഷിയിടങ്ങളെയും ഒഴിവാക്കിവേണം അന്തിമ വിജ്ഞാപനം ഇറക്കാൻ എന്നതാണ്‌ കേരളത്തിന്റെ നിലപാട്‌.