'ഫയൽനീക്കം വേഗത്തിലാക്കാൻ ഡാറ്റാ ഡ്രിവൺ ഭരണം; ഹിന്ദു ഐക്യവേദിയുമായുള്ള കൂടിക്കാഴ്ച രഹസ്യമായിരുന്നില്ല': മുഖ്യമന്ത്രി വി ഡി സതീശൻ

തിരുവനന്തപുരം: (KVARTHA) സർക്കാർ ഓഫീസുകളിലെ ഫയൽനീക്കം വേഗത്തിലാക്കാൻ ഡാറ്റാ ഡ്രിവൺ ഭരണത്തിലേക്ക് സംസ്ഥാനം നീങ്ങുകയാണെന്ന് മുഖ്യമന്ത്രി വി ഡി സതീശൻ. വിവിധ വകുപ്പുകളിലെ ഫയൽനീക്കം സംബന്ധിച്ച് അറിയാൻ പുതിയ സംവിധാനം നടപ്പാക്കുമെന്ന് മുഖ്യമന്ത്രി വ്യക്തമാക്കി. സംസ്ഥാനത്തുടനീളം നടക്കുന്ന വിവിധ പദ്ധതികളുടെ തൽസ്ഥിതി കൃത്യമായി അറിയാനുള്ള 'പ്രോജക്ട് മാപ്പിങ്' സംവിധാനവും ഉടൻ ഏർപ്പെടുത്തും. പദ്ധതി നടത്തിപ്പ് വൈകുന്നത് മൂലം കോടിക്കണക്കിന് രൂപയാണ് സംസ്ഥാനത്തിന് ഓരോ വർഷവും നഷ്ടമാകുന്നതെന്നും ഇത് പരിഹരിക്കാനാണ് പുതിയ സാങ്കേതികവിദ്യയുടെ സഹായം തേടുന്നതെന്നും അദ്ദേഹം കൂട്ടിച്ചേർത്തു. 2027-ലെ പത്മപുരസ്കാരങ്ങൾക്കുള്ള നാമനിർദേശം കേന്ദ്രസർക്കാരിന് സമർപ്പിക്കാനും മന്ത്രിസഭാ യോഗത്തിൽ തീരുമാനമായിട്ടുണ്ട്.

ഡി എം ആർ സി റിപ്പോർട്ട് അപൂർണം; വിഴിഞ്ഞത്ത് വിട്ടുവീഴ്ചയില്ല

അതിവേഗ റെയിൽപാതയുമായി ബന്ധപ്പെട്ട് ഡൽഹി മെട്രോ റെയിൽ കോർപറേഷൻ സമർപ്പിച്ച റിപ്പോർട്ട് പൂർണമല്ലെന്നാണ് വിദഗ്ധ സമിതി സർക്കാരിനെ അറിയിച്ചിരിക്കുന്നത്. സാമ്പത്തികമായ സാധ്യത സംബന്ധിച്ചും പാരിസ്ഥിതികമായും ഒരു തരത്തിലുള്ള പഠനവും നടത്താത്തതിനാൽ ഈ രൂപത്തിൽ പദ്ധതി ഏറ്റെടുക്കാൻ കഴിയില്ല. ഭൂതല നിർമാണവുമായി ബന്ധപ്പെട്ട ഒരു കാര്യങ്ങളും ആദ്യഘട്ടത്തിൽ നടപ്പാക്കരുതെന്ന് വിദഗ്ധ സമിതി ശുപാർശ ചെയ്തിട്ടുണ്ട്. ചരക്കു ഗതാഗത സാധ്യത, ബദൽ മാർഗങ്ങൾ, ഭൂമി ലഭ്യത തുടങ്ങിയ കാര്യങ്ങൾ പഠിച്ച ശേഷം മാത്രമേ ഡി പി ആർ തയാറാക്കാൻ പാടുള്ളൂവെന്നും നിലവിൽ സമർപ്പിച്ചിരിക്കുന്നത് മികച്ച സാമ്പത്തിക മോഡൽ അല്ലെന്നും മുഖ്യമന്ത്രി ചൂണ്ടിക്കാട്ടി.

വിഴിഞ്ഞം ഓഹരി കൈമാറ്റത്തിൽ സംസ്ഥാന താൽപര്യം ഹനിക്കുന്ന ഒരു നടപടിയും സർക്കാരിൻ്റെ ഭാഗത്തുനിന്നും ഉണ്ടാകില്ല. കൺസഷൻ കരാർ ഭേദഗതി ചെയ്ത് അഞ്ച് വർഷത്തേക്ക് നീട്ടിക്കൊടുത്തത് മുൻ ഇടതുപക്ഷ സർക്കാരാണ്. പദ്ധതി വൈകിയതിന് അദാനി പോർട്ട് സർക്കാരിന് നൽകേണ്ടിയിരുന്ന 219 കോടി രൂപയുടെ പിഴ ഒഴിവാക്കിക്കൊടുത്തതും അവരാണ്. എന്നിട്ടാണ് ഈ സർക്കാരിനെ അധിക്ഷേപിക്കുന്നതെന്ന് അദ്ദേഹം വിമർശിച്ചു. വിഴിഞ്ഞത്തെ തുടർനടപടികൾ എംപവേഡ് കമ്മിറ്റി പരിശോധിച്ച ശേഷം തീരുമാനിക്കുമെന്നും മുഖ്യമന്ത്രി അറിയിച്ചു.

ആരോപണങ്ങൾക്ക് അക്കമിട്ട് മറുപടി

ഹിന്ദു ഐക്യവേദി കൂടിക്കാഴ്ച 

‘ഹിന്ദു ഐക്യവേദി നേതാക്കൾ ആവശ്യപ്പെട്ടത് പ്രകാരമാണ് അവരെ കണ്ടത്. നിവേദനം നൽകാനാണ് അവർ വന്നത്. ഞാൻ എല്ലാവരുടെയും മുഖ്യമന്ത്രിയാണ്. ബി ജെ പി നേതാക്കൾ സെക്രട്ടേറിയറ്റിൽ കയറിയിറങ്ങുന്നുവെന്നാണ് മുഹമ്മദ് റിയാസ് ആരോപണം ഉന്നയിച്ചത്. പ്രതിപക്ഷ നേതാവ് പിണറായി വിജയൻ ചെയ്തതുപോലെ മറ്റൊരു കാറിൽ മാസ്കറ്റ് ഹോട്ടലിൽ പോയി രഹസ്യമായല്ല അവരെ കണ്ടത്. 37 വർഷമായി മൂകാംബിക ക്ഷേത്രത്തിൽ പോകുന്നയാളാണ് ഞാൻ, അതുകൊണ്ട് മൃദുഹിന്ദുത്വവാദിയാണെന്ന് പറയുന്നത് അടിസ്ഥാനരഹിതമാണ്’.

എൻ എസ് എസ് ജനറൽ സെക്രട്ടറിയുടെ കോൾ

‘ബജറ്റ് തയാറാക്കുന്ന സമയത്ത് എൻ എസ് എസ് ജനറൽ സെക്രട്ടറി ജി സുകുമാരൻ നായർ ഫോണിൽ വിളിച്ചിരുന്നു. തിരിച്ചുവിളിച്ച് സംസാരിച്ച് കാണാമെന്ന് പറയുകയും ചെയ്തു. ഇതിനിടയിലാണ് അദ്ദേഹത്തിന് കാണാൻ അനുമതി കൊടുത്തില്ലെന്ന തെറ്റായ വാർത്തകൾ പ്രചരിച്ചത്’.

സർക്കാർ പ്ലീഡർ നിയമനം

‘പ്ലീഡർമാരുടെ നിയമനത്തിലെ വിവാദങ്ങൾ മുഖ്യമന്ത്രി തള്ളി. ഇന്ത്യൻ ലോയേഴ്സ് കോൺഗ്രസ് സംസ്ഥാന കമ്മിറ്റിയാണ് നിയമനത്തിനായി ശുപാർശ നൽകിയത്. വിവാദത്തിൽപ്പെട്ട രണ്ട് പേരുടെ പേരും പട്ടികയിലുണ്ട്. അവരുടെ പശ്ചാത്തലം കൂടി പരിശോധിച്ച് അഡ്വക്കേറ്റ് ജനറലുമായി ചർച്ച ചെയ്ത ശേഷമാണ് നിയമനം നടത്തിയത്’.

എ ഡി ജി പിക്കെതിരായ അന്വേഷണം

‘ആലപ്പുഴയിൽ യൂത്ത് കോൺഗ്രസ് പ്രവർത്തകരെ പ്രതിപക്ഷ നേതാവിൻ്റെ സുരക്ഷാ ജീവനക്കാർ മർദിച്ച സംഭവത്തിലെ റിപ്പോർട്ട് തിരുത്താൻ എ ഡി ജി പി ഇടപെട്ടുവെന്ന കേസിൽ സർക്കാരിന് ഇതുവരെ റിപ്പോർട്ട് ലഭിച്ചിട്ടില്ല. അത് ഡി ജി പിയുടെ അടുത്താണുള്ളത്. റിപ്പോർട്ട് ലഭിക്കാതെ ആഭ്യന്തര മന്ത്രിക്കും മുഖ്യമന്ത്രിക്കും തീരുമാനമെടുക്കാൻ കഴിയില്ല. മാധ്യമ വാർത്തകളുടെ അടിസ്ഥാനത്തിൽ മാത്രം നടപടിയെടുത്താൽ അത് കോടതിയിൽ ചോദ്യം ചെയ്യപ്പെടും. നടപടിക്രമങ്ങൾ പൂർത്തിയാക്കാതെ തുടർനടപടി സ്വീകരിക്കാനാകില്ല’.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: CM VD Satheesan introduces data-driven governance in Kerala.

#VDSatheesan #KeralaCM #KeralaPolitics #TrivandrumNews #DataDrivenGovernance #MalayalamNews #AnjanaNews