ആര് നയിക്കും? മുഖ്യമന്ത്രിയെ നിശ്ചയിക്കാൻ എഐസിസി; തന്ത്രങ്ങൾ മെനഞ്ഞ് ഹൈകമാൻഡ്; വിവിധ വിഭാഗങ്ങൾക്കിടയിൽ ചർച്ച നീളുന്നു

തിരുവനന്തപുരം: (KVARTHA) യുഡിഎഫിൻ്റെ വിജയത്തിന് പിന്നാലെ മുഖ്യമന്ത്രി പദവിയെച്ചൊല്ലിയുള്ള ചർച്ചകൾ രാഷ്ട്രീയ കേരളത്തിൽ സജീവമാണ്. എഐസിസി ജനറൽ സെക്രട്ടറി കെ സി വേണുഗോപാലിൻ്റെ ആസൂത്രണ മികവിനെ പിന്തുണയ്ക്കുന്നവരും, പ്രതിപക്ഷ നേതാവ് വി ഡി സതീശൻ്റെ നേതൃപാടവത്തെ ഉയർത്തിക്കാട്ടുന്നവരും, രമേശ് ചെന്നിത്തലയുടെ ദീർഘകാല ഭരണപരിചയം വേണമെന്ന് വാദിക്കുന്നവരും കോൺഗ്രസ് അണികൾക്കിടയിലുണ്ട്. എന്നാൽ ഏതെങ്കിലും ഒരു നേതാവിനെ മാത്രം ഉയർത്തിക്കാട്ടിയല്ല ജനം വോട്ട് ചെയ്തതെന്നും, കൂട്ടായ പ്രവർത്തനത്തിൻ്റെ ഫലമാണ് ഈ വിജയമെന്നും എഐസിസി വക്താവ് ദീപ്തി മേരി വർഗീസ് വ്യക്തമാക്കി.

വിജയത്തിൽ നിർണായകമായ എഐസിസി ഘടകം

ഈ തിരഞ്ഞെടുപ്പിൽ മറ്റാരെക്കാളും കൂടുതൽ അധ്വാനിച്ചത് എഐസിസി നേതൃത്വമാണെന്ന് നിരീക്ഷിക്കപ്പെടുന്നു. എല്ലാ മണ്ഡലങ്ങളിലും നിരീക്ഷകരെ നിയമിക്കുകയും പ്രശ്നങ്ങൾ പഠിച്ച് പരിഹരിക്കുകയും ചെയ്തത് മുന്നണിക്ക് ഗുണകരമായി. കെ സി വേണുഗോപാൽ മുൻകൈയെടുത്ത് സിപിഎം വിട്ടുവന്ന നേതാക്കളായ ജി സുധാകരനെ അമ്പലപ്പുഴയിലും, വി കുഞ്ഞികൃഷ്ണനെ പയ്യന്നൂരിലും, ടി കെ ഗോവിന്ദനെ തളിപ്പറമ്പിലും യുഡിഎഫ് പക്ഷത്തെത്തിച്ച് മത്സരിപ്പിച്ചത് വലിയ വിജയമായി മാറി. ഇവർ പരാജയപ്പെടുമെന്ന് പാർട്ടിയിലെ ഒരു വിഭാഗം കരുതിയെങ്കിലും എഐസിസിയുടെ കണക്കുകൂട്ടലുകൾ തെറ്റില്ലെന്ന് ഫലം തെളിയിച്ചു.

അപ്രതീക്ഷിത വിജയങ്ങളും മാധ്യമ വാർത്തകളും

വിജയസാധ്യത കുറവാണെന്ന് പലരും വിലയിരുത്തിയ മണ്ഡലങ്ങളിൽ യുഡിഎഫ് സ്ഥാനാർഥികൾ മികച്ച വിജയം നേടി. തൃക്കരിപ്പൂരിൽ സന്ദീപ് വാര്യർ, കണ്ണൂരിൽ ടി ഒ മോഹനൻ, എലത്തൂരിൽ വിദ്യാ ബാലകൃഷ്ണൻ, ബാലുശ്ശേരിയിൽ വി ടി സൂരജ്, നാദാപുരത്ത് കെ എം അഭിജിത്ത്, കോഴിക്കോട് നോർത്തിൽ കെ ജയന്ത്, തവനൂരിൽ വി എസ് ജോയ്, ആലപ്പുഴയിൽ എ ഡി തോമസ്, പാലക്കാട് രമേഷ് പിഷാരടി, ചിറ്റൂരിൽ സുമേഷ് അച്യുതൻ, തൃശ്ശൂരിൽ രാജൻ പല്ലൻ, കൊടുങ്ങല്ലൂരിൽ ഒ ജെ ജനീഷ്, പെരുമ്പാവൂരിൽ മനോജ് മൂത്തേടൻ, തൃപ്പൂണിത്തുറയിൽ ദീപക് ജോയ്, കൊച്ചിയിൽ മുഹമ്മദ് ഷിയാസ്, ഏറ്റുമാനൂരിൽ നാട്ടകം സുരേഷ്, വൈക്കത്ത് കെ ബിനിമോൻ, പൂഞ്ഞാറിൽ എം ജെ സെബാസ്റ്റ്യൻ, കായംകുളത്ത് എം ലിജു, റാന്നിയിൽ പഴകുളം മധു, ചടയമംഗലത്ത് എം എം നസീർ, വാമനപുരത്ത് സുധീർഷാ പാലോട്, നെയ്യാറ്റിൻകരയിൽ എൻ ശക്തൻ, ചിറയിൻകീഴിൽ രമ്യ ഹരിദാസ്, കൊല്ലത്ത് ബിന്ദു കൃഷ്ണ തുടങ്ങിയവരുടെ വിജയം ഹൈകമാൻഡിൻ്റെ കൃത്യമായ ആസൂത്രണത്തിൻ്റെ ഫലമാണെന്നാണ് ഒരു വിഭാഗം കോൺഗ്രസ് പ്രവർത്തകരും നേതാക്കളും പറയുന്നത്.

മാധ്യമങ്ങൾ ഒരു നേതാവിനെ മാത്രം പർവതീകരിച്ചു കാണിക്കുന്നത് ശരിയല്ലെന്നും, കോൺഗ്രസിനുള്ളിലെ വസ്തുതകൾ അറിയാതെയാണ് പല വാർത്തകളും വരുന്നതെന്നും ദീപ്തി മേരി വർഗീസ് കൂട്ടിച്ചേർത്തു. 95 മുതൽ 100-ലധികം സീറ്റുകൾ യുഡിഎഫ് നേടുമെന്ന എഐസിസിയുടെ കണക്കുകൂട്ടലുകൾ പൂർണമായും ശരിയായി.

മുഖ്യമന്ത്രി പദവി: മാനദണ്ഡങ്ങൾ കർശനം

പ്രതിപക്ഷ നേതൃസ്ഥാനത്തേക്കാൾ ഭാരിച്ച ഉത്തരവാദിത്തമുള്ള മുഖ്യമന്ത്രി പദവിയിലേക്ക് ഒരാളെ നിശ്ചയിക്കുമ്പോൾ എഐസിസി വിശാലമായ കാഴ്ചപ്പാടാകും സ്വീകരിക്കുക. 2021-ൽ പുതിയൊരു പ്രതിപക്ഷ നേതാവിനെ നിശ്ചയിച്ചപ്പോൾ എടുത്ത തീരുമാനങ്ങൾ അന്നത്തെ സാഹചര്യത്തിൽ ശരിയായിരുന്നു. എന്നാൽ മുഖ്യമന്ത്രിയെ തീരുമാനിക്കുമ്പോൾ ഭരണപരിചയം, സംഘടനാ വൈദഗ്ധ്യം, സോഷ്യൽ എൻജിനീയറിങ് മികവ്, മുന്നണിയിലെ ഏകോപനം എന്നിവ പ്രധാന മാനദണ്ഡങ്ങളാകും.

പല മണ്ഡലങ്ങളിലും യുഡിഎഫിന് ലഭിച്ച സിപിഎം വോട്ടുകൾ വി ഡി സതീശനെ മാത്രം കണ്ടുള്ളതല്ലെന്നും, മറിച്ച് ഒരു ഭരണമാറ്റം ആഗ്രഹിച്ച ജനവികാരമാണെന്നും ഒരു വിഭാഗം പ്രവർത്തകർ ചൂണ്ടിക്കാട്ടുന്നു. സമ്മർദ തന്ത്രങ്ങളിലൂടെ ഹൈകമാൻഡിനെ വരുതിയിലാക്കാൻ കഴിയില്ലെന്ന് കെ സുധാകരൻ്റെ കാര്യത്തിൽ മുമ്പ് തെളിയിക്കപ്പെട്ടതാണ്. ചില മാധ്യമങ്ങളെയും സോഷ്യൽ മീഡിയ ഇൻഫ്ലുവൻസർമാരെയും ഉപയോഗിച്ച് നിരന്തരമായി ഓരോ ആളുകളെ ഉയർത്തിക്കാട്ടി ഹൈകമാൻഡിൽ സ്വാധീനം ചെലുത്താനൊന്നും ആരും മെനക്കെടേണ്ടതില്ലെന്നുമുള്ള സൂചനയും ദീപ്തി മേരി വർഗീസിനെപ്പോലുള്ളവർ നൽകുന്നു.

ഇത്രയും മൃഗീയ ഭൂരിപക്ഷം കേരള ജനത യുഡിഎഫിന് നൽകിയപ്പോൾ അതനുസരിച്ച് പ്രവർത്തിക്കാനുള്ള ബാധ്യത യുഡിഎഫിനുണ്ടെന്നും ജനങ്ങളുടെ പ്രതീക്ഷയ്ക്ക് ഉയർന്ന് ടീം യുഡിഎഫ് എന്ന നിലയിൽ മുന്നോട്ട് പോകാൻ ഞാനുൾപ്പെടെയുള്ള നേതാക്കൾ ശ്രദ്ധിക്കണമെന്നുമാണ് ചൊവ്വാഴ്ച കെ മുരളീധരൻ മാധ്യമങ്ങളോട് പറഞ്ഞത്.. 

ഏതായാലും വൈകാതെ തന്നെ മുഖ്യമന്ത്രി ആരാകുമെന്നത് സംബന്ധിച്ച് ഹൈകമാൻഡ് തീരുമാനം ഉണ്ടാകുമെന്നാണ് രാഷ്ട്രീയ കേരളം പ്രതീക്ഷിക്കുന്നത്.

ഓർത്തഡോക്സ് സഭയുടെ വിശദീകരണം

കെ സി വേണുഗോപാലിനെതിരെ ഓർത്തഡോക്സ് സഭ നിലപാടെടുത്തു എന്ന തരത്തിൽ പ്രചരിക്കുന്ന വാർത്തകൾ അവാസ്തവമാണെന്ന് സഭയുടെ മാധ്യമ വിഭാഗം അധ്യക്ഷൻ ഡോ. യൂഹാനോൻ മാർ ദീയസ്ക്കോറോസ് മെത്രാപ്പോലീത്താ വ്യക്തമാക്കി.

രാഷ്ട്രീയ കേരളം ഉറ്റുനോക്കുന്ന ഇത്തരം വാർത്തകളും വിവരങ്ങളും നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലേക്കും ഷെയർ ചെയ്യുക. ഇതിനെക്കുറിച്ചുള്ള നിങ്ങളുടെ അഭിപ്രായങ്ങൾ ഈ വാർത്തയുടെ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ പുതിയ വാർത്തകൾ അറിയാൻ ഞങ്ങളുടെ ഫേസ്ബുക്ക് പേജ് ഫോളോ ചെയ്യുക.

Article Summary: Discussions intensify within Congress and UDF over the next Kerala Chief Minister, with the AICC and High Command expected to make a final decision based on experience and strategic skills.

#KeralaPolitics #AICC #CongressKerala #KCVenugopal #VDSatheesan #UDFWin #BreakingNews