ന്യൂഡൽഹി: (KVARTHA) സുപ്രീം കോടതിയിൽ നിന്ന് ജാമ്യം ലഭിച്ചതിന് പിന്നാലെഡൽഹി മുഖ്യമന്ത്രി അരവിന്ദ് കേജ്രിവാൾ ജയിലിൽ നിന്ന് പുറത്തിറങ്ങി. ഭാര്യ സുനിത, പഞ്ചാബ് മുഖ്യമന്ത്രി ഭഗവന്ത് മന്‍, അതിഷി, മനീഷ് സിസോദിയ തുടങ്ങിയ നേതാക്കളും നിരവധി പ്രവര്‍ത്തകരും ഡല്‍ഹി മുഖ്യമന്ത്രിയെ സ്വീകരിക്കാനെത്തി. കനത്ത മഴയിൽ തിഹാറിലെത്തിയ അനുയായികളെ അദ്ദേഹം അഭിവാദ്യം ചെയ്തു.

ജയിലിലടച്ചതോടെ തന്റെ പോരാട്ടവീര്യം നൂറുമടങ്ങ് വര്‍ധിക്കുകയാണ് ഉണ്ടായതെന്ന് കേജ്‌രിവാൾ പറഞ്ഞു. എന്നെ ജയിലിൽ അടച്ച് എൻ്റെ മനോവീര്യം തകർക്കുമെന്നാണ് ഇവർ കരുതിയത്. ഇന്ന് ഞാൻ ജയിലിൽ നിന്ന് പുറത്തിറങ്ങി, എൻ്റെ ധൈര്യം 100 മടങ്ങ് വർദ്ധിച്ചു. ദൈവം തന്നെ പിന്തുണച്ചു. അവരുടെ ജയിലറകൾക്ക് കേജ്‌രിവാളിൻ്റെ മനോവീര്യം കെടുത്താൻ കഴിയില്ലെന്ന് അദ്ദേഹം കൂട്ടിച്ചേർത്തു. 

जेल से बाहर आने के बाद पार्टी कार्यकर्ताओं के बीच पहुँचा। https://t.co/BVeL8mlR5j

— Arvind Kejriwal (@ArvindKejriwal) September 13, 2024

ദൈവം കാണിച്ചുതന്ന പാതയിൽ ഞാൻ സഞ്ചരിക്കും. ദേശവിരുദ്ധ ശക്തികളെല്ലാം രാജ്യത്തെ നശിപ്പിക്കാൻ ശ്രമിക്കുന്നു. അവർ വികസനം തടയുന്നു, അവർ രാജ്യത്തെ വിഭജിക്കാൻ ശ്രമിക്കുന്നു, അവർ രാജ്യത്തെ ഉള്ളിൽ നിന്ന് ദുർബലപ്പെടുത്താൻ ശ്രമിക്കുന്നു, അവർക്കെതിരെ ഞാൻ എൻ്റെ ജീവിതകാലം മുഴുവൻ പോരാടി, ഭാവിയിലും ഞാൻ ഇതുപോലെ പോരാടിക്കൊണ്ടേയിരിക്കുമെന്നും കേജ്‌രിവാൾ പറഞ്ഞു. 

साज़िश पर सत्य की जीत हुई। तिहाड़ जेल से बाहर आए CM अरविंद केजरीवाल। LIVE https://t.co/1eVNK559Lb

— Arvind Kejriwal (@ArvindKejriwal) September 13, 2024

10 ലക്ഷം രൂപയുടെ ബോണ്ടിലാണ് കേജ്‌രിവാളിന് ജാമ്യം അനുവദിച്ചത്. ഡൽഹി മദ്യ നയത്തിലെ അഴിമതിക്കേസിൽ ഈ വർഷം മാർച്ച് 21നാണ് കേജ്‌രിവാളിനെ ഇഡി അറസ്റ്റ് ചെയ്തത്. ഈ കേസിൽ ജൂലൈയിൽ സുപ്രീം കോടതി ജാമ്യം അനുവദിച്ചു. എന്നാൽ കസ്റ്റഡിയിലിരിക്കെ, ജൂൺ 26-ന് അരവിന്ദ് കേജ്രിവാളിനെ സിബിഐ വീണ്ടും അറസ്റ്റ് ചെയ്തു, അതിനാൽ ജയിലിൽ നിന്ന് പുറത്തിറങ്ങാനായില്ല. ഈ കേസിൽ കൂടി വെള്ളിയാഴ്ച ജാമ്യം ലഭിച്ചതോടെയാണ് ജയിൽ മോചിതനായത്.

#Kejriwal #DelhiPolitics #IndiaPolitics #Arrest #Bail #Corruption