കർണാടകയിൽ വീണ്ടും 'കെ സി മാജിക്'; സിദ്ധരാമയ്യ-ഡി.കെ. ശിവകുമാർ തർക്കം പരിഹരിച്ച് കോൺഗ്രസിൻ്റെ 'മൃതസഞ്ജീവിനി'

ന്യൂഡൽഹി: (KVARTHA) കർണാടകയിലെ കോൺഗ്രസ് സർക്കാരിനെ പിടിച്ചുലച്ചേക്കാമായിരുന്ന മുഖ്യമന്ത്രി സ്ഥാനാർത്ഥി തർക്കം വീണ്ടും പരിഹരിച്ചത് എം.പി. കെ.സി. വേണുഗോപാലിൻ്റെ സമയോചിതമായ കരുനീക്കങ്ങളിലൂടെ. കോൺഗ്രസ് സർക്കാരിനും പാർട്ടിക്കുമേൽ കാർമേഘങ്ങൾ ഉരുണ്ടുകൂടിയപ്പോഴെല്ലാം ഹൈക്കമാൻഡ് ആദ്യമായി തിരഞ്ഞ പേര് കെ.സി. വേണുഗോപാലിൻ്റേതായിരുന്നു. പ്രതിസന്ധികളിൽ കോൺഗ്രസിൻ്റെ മൃതസഞ്ജീവനിയായി മാറുകയാണ് അദ്ദേഹം.

കർണാടക നിയമസഭാ തിരഞ്ഞെടുപ്പിലെ വൻ വിജയത്തിന് തൊട്ടുപിന്നാലെ ഉടലെടുത്ത മുഖ്യമന്ത്രി സ്ഥാനാർത്ഥി തർക്കം കെ.സി. വേണുഗോപാലിൻ്റെ നയതന്ത്ര ഇടപെടലുകളിലൂടെയാണ് അന്ന് രമ്യമായി പരിഹരിച്ചത്. രാഹുൽ ഗാന്ധിയുടെ നിർദ്ദേശപ്രകാരം ദൗത്യം ഏറ്റെടുത്ത അദ്ദേഹം, ഡി.കെ. ശിവകുമാറിനോടും സിദ്ധരാമയ്യയോടും ആശയവിനിമയം നടത്തി ബി.ജെ.പി.ക്കെതിരെ നേടിയ വിജയത്തിൻ്റെ ശോഭ കെടുത്തുന്ന നീക്കത്തെ തകർക്കുകയായിരുന്നു

നയതന്ത്രത്തിലെ പ്രഭാതഭക്ഷണം

അന്ന് കർണാടകയിലും ഡൽഹിയിലും രാവും പകലും നീണ്ട ചർച്ചകൾക്കൊടുവിലാണ് മഞ്ഞുരുകിയത്. നയതന്ത്ര ഇടപെടലുകളിൽ ഭക്ഷണത്തിന് പ്രാധാന്യമുണ്ട് എന്ന് തിരിച്ചറിഞ്ഞ കെ.സി. വേണുഗോപാൽ, ഇരുനേതാക്കളെയും തൻ്റെ വസതിയിലേക്ക് വിളിച്ച് പ്രഭാതഭക്ഷണം നൽകിയാണ് അന്നത്തെ തർക്കത്തിന് പരിഹാരം കണ്ടത്. കെ.സി.ക്ക് ഇരുവശവും സൗഹൃദം പങ്കിട്ട് ഭക്ഷണം കഴിക്കുന്ന ആ ചിത്രം ഇന്നും ജനങ്ങളുടെ മനസ്സിലുണ്ടെന്ന് റിപ്പോർട്ടുകൾ സൂചിപ്പിക്കുന്നു.

കോൺഗ്രസ് സർക്കാരിനെ സൃഷ്ടിക്കുന്നതിലും അതിനെ നിലനിർത്തുന്നതിലും കെ.സി. കാട്ടിയ ജാഗ്രതയും കരുതലും അന്നേ തെളിയിക്കപ്പെട്ടതാണ്. അദ്ദേഹത്തിൻ്റെ ഈ സംഘടനാ വൈഭവവും വൈദഗ്ധ്യവും കോൺഗ്രസിന് എക്കാലവും മുതൽക്കൂട്ട് തന്നെയാകും.

പുതിയ പ്രതിസന്ധി, പഴയ പരിഹാരമാർഗ്ഗം

നേതൃമാറ്റം എന്ന ആശയം കർണാടകയിലും അവിടെനിന്ന് ഡൽഹിയിലേക്ക് നീണ്ടപ്പോഴും കോൺഗ്രസ് ഹൈക്കമാൻഡ് പക്വതയോടെയാണ് പ്രതികരിച്ചത്. ഡി.കെ.യെ അനുകൂലിക്കുന്ന ചില എം.എൽ.എ.മാർ ഡൽഹിയിലെത്തിയതും നേതൃമാറ്റമെന്ന ആവശ്യത്തിന് ശക്തി പ്രാപിച്ചതും ബി.ജെ.പി. രാഷ്ട്രീയ മുതലെടുപ്പിനുള്ള അവസരമായി കണ്ടു. എന്നാൽ, അവർക്ക് അതിന് അവസരം നൽകാതെയാണ് കെ.സി. വേണുഗോപാലിൻ്റെ ചടുലമായ നീക്കങ്ങളും ഇടപെടലും ഇപ്പോഴുമുണ്ടായത്.

കർണാടകയിൽ നിന്നുള്ള എ.ഐ.സി.സി. അധ്യക്ഷൻ മല്ലികാർജ്ജുൻ ഖാർഗെയ്ക്ക് അനുരഞ്ജന ചർച്ചകൾക്ക് കെ.സി. വേണുഗോപാലിനെ നിയോഗിക്കാൻ രണ്ടാമതൊന്ന് ആലോചിക്കേണ്ടി വന്നില്ല.

കർണാടക രാഷ്ട്രീയത്തിലെ വ്യക്തിബന്ധം

കർണാടക രാഷ്ട്രീയത്തിലെ ശക്തിദുർഗങ്ങളായ സിദ്ധരാമയ്യയോടും ഡി.കെ. ശിവകുമാറിനോടും നല്ല വ്യക്തിബന്ധം പുലർത്തുന്ന നേതാവാണ് കെ.സി. വേണുഗോപാൽ. മൂന്നര വർഷക്കാലം കർണാടകയുടെ ചുമതല വഹിച്ച ദേശീയ നേതാവെന്ന നിലയിൽ, അവരെ എങ്ങനെ സ്വാന്തനിപ്പിക്കണമെന്ന് അദ്ദേഹത്തിന് കൃത്യമായി അറിയാമായിരുന്നു.

കഴിഞ്ഞ രണ്ടു ദിവസമായി ഫോണിലൂടെ ഇരു നേതാക്കളുമായും അദ്ദേഹം ആശയവിനിമയം നടത്തി. പ്രശ്‌നപരിഹാരത്തിനായി ഹൈക്കമാൻഡിൻ്റെ നിർദേശങ്ങൾ കെ.സി. ഇരുവർക്കും കൈമാറി. ഇരുവരും പരസ്പരം കൂടിക്കാഴ്ച നടത്തി തർക്കരഹിതമായി സർക്കാരിനെ മുന്നോട്ട് കൊണ്ടുപോകേണ്ടതിൻ്റെ പ്രാധാന്യം കെ.സി. അവരെ ധരിപ്പിച്ചു.

സമയോചിതമായ നിർദ്ദേശങ്ങളും സമാധാനവും

പൊതുസ്വീകാര്യനായ കെ.സി. വേണുഗോപാലിനെ തള്ളാനോ, അദ്ദേഹത്തിൻ്റെ നിർദ്ദേശം നിരസിക്കാനോ കഴിയാതെ ധർമ്മസങ്കടത്തിലായ ഇരുനേതാക്കളും മഞ്ഞുരുക്കുന്നതിന് വാതിലുകൾ തുറന്നിട്ടു.

ഡി.കെ.യെ പ്രഭാതഭക്ഷണത്തിന് ക്ഷണിക്കാൻ സിദ്ധരാമയ്യയോട് കെ.സി. ആവശ്യപ്പെട്ടു. സമയക്കുറവുണ്ടെങ്കിൽ ഉച്ചഭക്ഷണം ഡി.കെ.യുടെ വീട്ടിലാക്കാൻ സിദ്ധരാമയ്യയ്ക്ക് കെ.സി. നിർദ്ദേശം നൽകി. ഇതിനിടെ കർണാടകയിലെ ഓരോ നീക്കങ്ങളും കെ.സി. ഡൽഹിയിലെ കോൺഗ്രസ് നേതൃത്വത്തെ അറിയിക്കുകയും അവിടുത്തെ നിർദ്ദേശങ്ങൾ ഉൾക്കൊണ്ട് കരുനീക്കങ്ങൾ വേഗത്തിലാക്കുകയും ചെയ്തു.

തർക്കത്തിന് വിരാമം

നേതാക്കൾക്കിടയിലെ ഭിന്നത മുതലാക്കി രാഷ്ട്രീയ നേട്ടം കൊയ്യാമെന്ന് കരുതിയ ബി.ജെ.പി.യെയും കുത്തിത്തിരിപ്പിനിറങ്ങിയ ചില മാധ്യമങ്ങളെയും നിരാശരാക്കി സിദ്ധരാമയ്യയുടെ ഫോൺ ഡി.കെ. ശിവകുമാറിനെത്തി. രാവിലെ തൻ്റെ വീട്ടിൽ കാവേരിയിൽ ഒരുമിച്ച് പ്രഭാതഭക്ഷണം, അതിനുശേഷം മാധ്യമങ്ങളെ കാണാം എന്നതായിരുന്നു സന്ദേശം. കാര്യങ്ങൾ കെ.സി. വേണുഗോപാൽ കണക്കുകൂട്ടിയത് പോലെ കൃത്യമായി നടന്നു.

സിദ്ധരാമയ്യയുടെ വീട്ടിലെത്തിയ ഡി.കെ. ഊഷ്മളമായ സൗഹൃദം പങ്കിട്ടശേഷം, ഒരുമിച്ചുള്ള പ്രാതലിന് പിന്നാലെ ഇരുവരും മാധ്യമങ്ങളെ കണ്ട് ഹൈക്കമാൻഡിൻ്റെ നിർദ്ദേശങ്ങൾ ശിരസ്സാവഹിക്കുമെന്ന് അറിയിച്ചു. കോൺഗ്രസിനെ ദുർബലപ്പെടുത്താനില്ലെന്നും ഒറ്റക്കെട്ടായി മുന്നോട്ട് പോകുമെന്നും ഇരുവരും നിലപാട് വ്യക്തമാക്കിയതോടെ കുറച്ച് ദിവസമായി നിലനിന്ന സംഘർഷഭരിതമായ അന്തരീക്ഷത്തിനും അനിശ്ചിതത്വത്തിനും അഭ്യൂഹങ്ങൾക്കും പൂർണ്ണ വിരാമമായി.

ഒരു സർക്കാരിൻ്റെ അടിവേര് അറുക്കുന്ന തർക്കം ലളിതമായി പരിഹരിച്ച കെ.സി. വേണുഗോപാൽ ഒരിക്കൽക്കൂടി തൻ്റെ സംഘടനാ വൈഭവവും വൈദഗ്ധ്യവും അടയാളപ്പെടുത്തുകയാണ്. അഹമ്മദ് പട്ടേലിന് ശേഷം കോൺഗ്രസിന് കിട്ടിയ മികച്ച ആയുധമാണ് കെ.സി. വേണുഗോപാൽ എന്ന വിലയിരുത്തലാണ് രാഷ്ട്രീയ നിരീക്ഷകർ നൽകുന്നത്. കെ.സി.യുടെ നയതന്ത്രമികവും സംഘടനാ മികവും കോൺഗ്രസിന് എക്കാലവും മുതൽക്കൂട്ട് തന്നെയാകും.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: KC Venugopal successfully resolved the latest power struggle between Siddaramaiah and DK Shivakumar in the Karnataka Congress.

#KCVenugopal #KarnatakaPolitics #CongressCrisis #Siddaramaiah #DKShivakumar #IndianNationalCongress