രാജ്യത്ത് ക്രൈസ്തവർക്കെതിരായ ആക്രമണം വർധിക്കുന്നു; പ്രധാനമന്ത്രി അടിയന്തരമായി ഇടപെടണമെന്ന് കെ സി വേണുഗോപാൽ

ന്യൂഡെൽഹി: (KVARTHA) രാജ്യത്ത് ക്രൈസ്തവ ന്യൂനപക്ഷ സമൂഹത്തിനെതിരായി വർധിച്ചുവരുന്ന അക്രമങ്ങൾ ഇന്ത്യയുടെ ഭരണഘടന ഉറപ്പുനൽകുന്ന മതസ്വാതന്ത്ര്യത്തിനും സമത്വത്തിനും നേരെയുള്ള ഗുരുതരമായ വെല്ലുവിളിയാണെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ എംപി. 

തിങ്കളാഴ്ച, (2025 ഡിസംബർ 29) പ്രധാനമന്ത്രി നരേന്ദ്ര മോദിക്ക് അയച്ച കത്തിലാണ് അദ്ദേഹം ഈ ആവശ്യം ഉന്നയിച്ചത്. വിവിധ സംസ്ഥാനങ്ങളിലുണ്ടായ അതിക്രമങ്ങളുടെ പശ്ചാത്തലത്തിൽ കേന്ദ്ര സർക്കാർ അടിയന്തരമായി ഇടപെടണമെന്നും അദ്ദേഹം ആവശ്യപ്പെട്ടു.

ഇതൊന്നും ഒറ്റപ്പെട്ട സംഭവങ്ങളല്ലെന്നും രാജ്യത്തിന്റെ മതനിരപേക്ഷ സ്വഭാവം തകർക്കുന്ന വിദ്വേഷ പ്രചാരണത്തിന്റെ ഭാഗമാണെന്നും കെ.സി. വേണുഗോപാൽ ചൂണ്ടിക്കാട്ടി. 'സബ്കാ സാഥ്, സബ്കാ വികാസ്' എന്ന് പ്രസംഗിക്കുന്ന ഭരണകൂടം, പൗരന്മാരെ ആൾക്കൂട്ടാക്രമണങ്ങൾക്ക് വിട്ടുകൊടുക്കുമ്പോൾ ആ മുദ്രാവാക്യം അർത്ഥശൂന്യമാകുകയാണ്. പ്രധാനമന്ത്രിയുടെയും കേന്ദ്ര സർക്കാരിന്റെയും നിശബ്ദത വിദ്വേഷ പ്രചാരകർക്ക് കൂടുതൽ ധൈര്യം പകരുകയാണെന്നും അദ്ദേഹം കുറ്റപ്പെടുത്തി.

ക്രിസ്ത്യൻ സമൂഹത്തിനെതിരായ അക്രമങ്ങൾ അന്വേഷിച്ച് കുറ്റവാളികളെ നിയമത്തിന് മുന്നിൽ കൊണ്ടുവരണമെന്ന് അദ്ദേഹം കത്തിൽ ആവശ്യപ്പെട്ടു. രാജ്യത്തെ ഓരോ പൗരനും ഭയമില്ലാതെ തനിക്കിഷ്ടമുള്ള മതം അനുഷ്ഠിക്കാനുള്ള ഭരണഘടനാപരമായ അവകാശം ഉറപ്പാക്കാൻ കേന്ദ്ര സർക്കാർ അടിയന്തര നടപടികൾ സ്വീകരിക്കണമെന്നും അദ്ദേഹം വ്യക്തമാക്കി. ക്രിസ്തുമസ് ആഘോഷവേളയിൽ രാജ്യത്തിന്റെ വിവിധ ഭാഗങ്ങളിൽ നടന്ന അക്രമ സംഭവങ്ങൾ അതീവ ആശങ്കാജനകമാണെന്ന് അദ്ദേഹം പറഞ്ഞു.

ഡൽഹി, ഛത്തീസ്ഗഢ്, ഉത്തർപ്രദേശ്, മധ്യപ്രദേശ്, കേരളം എന്നിവിടങ്ങളിൽ നടന്ന സംഭവങ്ങൾ ഇതിന് തെളിവായി അദ്ദേഹം ചൂണ്ടിക്കാട്ടി. ഡൽഹിയിലെ ലജ്പത് നഗറിൽ സാന്താക്ലോസ് തൊപ്പി ധരിച്ചതിന്റെ പേരിൽ സ്ത്രീകളെയും കുട്ടികളെയും ചില സംഘടനകളുടെ അംഗങ്ങൾ അധിക്ഷേപിച്ചു. രാജ്യതലസ്ഥാനത്ത് തന്നെ ഇത്തരമൊരു സംഭവം ഉണ്ടായത് ഭരണകൂടത്തിന്റെ പരാജയമാണെന്ന് അദ്ദേഹം കുറ്റപ്പെടുത്തി.

ഛത്തീസ്ഗഢിലെ കാങ്കർ ഗ്രാമത്തിൽ മതപരിവർത്തന ആരോപണങ്ങൾ ഉന്നയിച്ച് രണ്ട് പള്ളികൾ ആക്രമിക്കുകയും ക്രൈസ്തവരുടെ വീടുകൾ കത്തിക്കുകയും ചെയ്തതായി കത്തിൽ പറയുന്നു. ദുർഗ് റെയിൽവേ സ്റ്റേഷനിൽ രണ്ട് സന്യാസിനികൾക്ക് നേരെ ആക്രമണം നടന്നു.

റായ്പൂരിലെ മാഗ്നറ്റോ മാളിൽ ആയുധധാരികൾ ക്രിസ്തുമസ് അലങ്കാരങ്ങൾ നശിപ്പിക്കുകയും ഷോപ്പിംഗ് നടത്തിയിരുന്നവരോട് മതവും ജാതിയും ചോദിച്ച് ഭീകരാന്തരീക്ഷം സൃഷ്ടിക്കുകയും ചെയ്തു. ഛത്തീസ്ഗഢിലെ ചില ഗ്രാമങ്ങളിൽ പാസ്റ്റർമാരുടെയും മിഷണറിമാരുടെയും പ്രവേശനം നിരോധിക്കുന്ന സാഹചര്യം പോലുമുണ്ടായതായി അദ്ദേഹം വിശദീകരിച്ചു.

മധ്യപ്രദേശിലെ ജബൽപൂരിൽ കേൾവി-കാഴ്ച വൈകല്യമുള്ള കുട്ടികൾ പങ്കെടുത്ത ക്രിസ്തുമസ് വിരുന്നിന് നേരെ ആക്രമണമുണ്ടായി. ഉത്തർപ്രദേശിലെ ഗാസിയാബാദിൽ ക്രിസ്തുമസ് തലേന്ന് പള്ളിയിലെ പ്രാർത്ഥനാ യോഗം അക്രമിസംഘം തടസ്സപ്പെടുത്തി. കേരളത്തിലും മതവൈരാഗ്യത്തിന്റെ വിഷം പടരുന്നതായി അദ്ദേഹം ആശങ്ക പ്രകടിപ്പിച്ചു. 

പാലക്കാട് 15 വയസ്സിൽ താഴെയുള്ള കുട്ടികൾ പങ്കെടുത്ത കരോൾ ഘോഷയാത്ര ആക്രമിക്കപ്പെടുകയും കുട്ടികളുടെ സംഗീതോപകരണങ്ങൾ നശിപ്പിക്കപ്പെടുകയും ചെയ്ത സംഭവം കത്തിൽ പ്രത്യേകം പരാമർശിച്ചിട്ടുണ്ട്. മുമ്പത്തെ വർഷങ്ങളിലെ പുതുവത്സരാഘോഷങ്ങൾ പോലും അക്രമങ്ങളുടെ വേദിയായി മാറിയതായും കെ.സി. വേണുഗോപാൽ ചൂണ്ടിക്കാട്ടി.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: KC Venugopal wrote to PM Modi over rising attacks on Christians in India, citing incidents in various states.

#KCVenugopal #PMModi #ChristianMinority #ReligiousFreedom #IndiaNews #HumanRights