ഇന്ത്യയുടെ പരമാധികാരം ട്രംപിന് മുന്നിൽ അടിയറവ് വെച്ചു; പ്രധാനമന്ത്രി പദം ട്രംപിന് നൽകുന്നതാണ് നല്ലതെന്ന് കെസി വേണുഗോപാൽ

ന്യൂഡൽഹി: (KVARTHA) ഇന്ത്യയുടെ പരമാധികാരം പ്രധാനമന്ത്രി നരേന്ദ്ര മോദി അമേരിക്കൻ പ്രസിഡന്റ് ട്രംപിന് മുന്നിൽ അടിയറവ് വെച്ചെന്ന് എഐസിസി ജനറൽ സെക്രട്ടറി കെസി വേണുഗോപാൽ എംപി. ന്യൂഡൽഹിയിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. 

ഇന്ത്യയുടെ വ്യാപാര കരാർ മറ്റൊരു രാജ്യത്തിന്റെ പ്രസിഡന്റ് പ്രഖ്യാപിക്കുന്നത് ചരിത്രത്തിലാദ്യത്തെ സംഭവമാണെന്നും ഇത് രാജ്യത്തിന്റെ അഭിമാനത്തെ ബാധിക്കുന്ന ഗുരുതരമായ പ്രശ്നമാണെന്നും അദ്ദേഹം കുറ്റപ്പെടുത്തി.

എല്ലാം ട്രംപ് തീരുമാനിക്കുന്നതിനനുസരിച്ച് പ്രധാനമന്ത്രി നരേന്ദ്ര മോദി കീഴടങ്ങുകയാണ്. ഇന്ത്യയുടെ കാര്യങ്ങൾ തീരുമാനിക്കുന്നത് ഇപ്പോൾ അമേരിക്കൻ പ്രസിഡന്റാണെന്ന അവസ്ഥയാണ്. പ്രധാനമന്ത്രി പദത്തെ മോദി വെറും നോക്കുകുത്തിയാക്കി മാറ്റി. 

ഇങ്ങനെയെങ്കിൽ ഇന്ത്യൻ പ്രധാനമന്ത്രി പദവി ട്രംപിന് ഏൽപ്പിക്കുന്നതല്ലേ നല്ലതെന്ന് കെസി വേണുഗോപാൽ പരിഹസിച്ചു. ഈ വിഷയത്തിൽ എന്ത് സംഭവിച്ചുവെന്ന് പാർലമെന്റിനെ അറിയിക്കാൻ സർക്കാർ തയ്യാറാകണം.

 ഇത് ആവശ്യപ്പെട്ട് പ്രതിപക്ഷം അടിയന്തര പ്രമേയത്തിന് നോട്ടീസ് നൽകിയിട്ടുണ്ടെന്നും അദ്ദേഹം വ്യക്തമാക്കി. ബിജെപിക്ക് ദേശസ്നേഹത്തെക്കുറിച്ച് സംസാരിക്കാൻ യാതൊരു യോഗ്യതയുമില്ലെന്നും അദ്ദേഹം കൂട്ടിച്ചേർത്തു.

രാഹുലിനെ തടയാൻ മൈക്ക് ഓഫ് ചെയ്തു

ചൈനീസ് സൈന്യത്തെ പ്രതിരോധിക്കാൻ സർക്കാർ അനുമതി വൈകിയത് സംബന്ധിച്ച് മുൻ കരസേന മേധാവിയുടെ പുസ്തകത്തിലെ ഭാഗങ്ങൾ പ്രതിപക്ഷ നേതാവ് രാഹുൽ ഗാന്ധി പാർലമെന്റിൽ ഉന്നയിച്ചിരുന്നു. എന്നാൽ ഇതിന് മറുപടി നൽകുന്നതിന് പകരം തികച്ചും അവാസ്തവമായ കാര്യങ്ങൾ പറഞ്ഞ് രക്ഷപ്പെടാനാണ് പ്രധാനമന്ത്രി ശ്രമിച്ചതെന്ന് വേണുഗോപാൽ ആരോപിച്ചു.

അപ്രിയ സത്യങ്ങൾ പുറത്തുവരുമെന്ന് ഭയന്ന് പ്രതിപക്ഷ നേതാവിന് സംസാരിക്കാൻ അവസരം നിഷേധിക്കുകയായിരുന്നു. പാർലമെന്റിൽ രാഹുൽ ഗാന്ധി സംസാരിക്കുമ്പോൾ തുടരെത്തുടരെ അദ്ദേഹത്തിന്റെ മൈക്ക് ഓഫ് ചെയ്തു. 

ജനാധിപത്യ കീഴ്വഴക്കങ്ങളെ മോദി ഭരണകൂടം കാറ്റിൽപ്പറത്തുകയാണ്. ജനങ്ങളെ ബാധിക്കുന്ന വിഷയങ്ങൾ പാർലമെന്റിൽ ഉന്നയിക്കാനല്ലെങ്കിൽ പിന്നെ എവിടെയാണ് ഉന്നയിക്കുകയെന്ന് അദ്ദേഹം ചോദിച്ചു. 

മൈക്ക് ഓഫ് ചെയ്തതുകൊണ്ടോ ഭീഷണിപ്പെടുത്തിയതുകൊണ്ടോ പേടിക്കുന്ന ആളല്ല രാഹുൽ ഗാന്ധിയെന്ന് മോദിക്കും കൂട്ടർക്കും കഴിഞ്ഞ ദിവസം ഒരിക്കൽക്കൂടി ബോധ്യപ്പെട്ടിട്ടുണ്ടെന്നും വേണുഗോപാൽ പറഞ്ഞു.

ശബരിമല കേസ്: സർക്കാരിനെതിരെ ഗുരുതര ആരോപണം

ശബരിമല സ്വർണ്ണക്കൊള്ളയിലെ പ്രതികളെ സംരക്ഷിക്കാൻ സംസ്ഥാന സർക്കാർ ശ്രമിക്കുകയാണെന്നും കെസി വേണുഗോപാൽ ആരോപിച്ചു. കേസ് അന്വേഷിക്കുന്ന പ്രത്യേക അന്വേഷണ സംഘത്തിന് (എസ്ഐടി) മേൽ സർക്കാരിന്റെ കടുത്ത സമ്മർദ്ദമുണ്ട്. 

ഇതുകാരണം അന്വേഷണം അട്ടിമറിക്കപ്പെടുകയും പ്രതികൾക്ക് ഓരോരുത്തർക്കായി ജാമ്യം ലഭിക്കുകയും ചെയ്യുന്ന സാഹചര്യമാണുള്ളത്. ഈ കാര്യങ്ങളെല്ലാം ഹൈക്കോടതി കൃത്യമായി നിരീക്ഷിക്കുന്നുണ്ടെന്നാണ് കരുതുന്നത്. 

ഈ വിഷയത്തിൽ ഹൈക്കോടതിയുടെ ഭാഗത്തുനിന്ന് ശക്തമായ ഇടപെടൽ ഉണ്ടാകുമെന്നാണ് പ്രതീക്ഷിക്കുന്നതെന്നും അദ്ദേഹം ഡൽഹിയിൽ പറഞ്ഞു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുകൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: AICC General Secretary KC Venugopal accused PM Narendra Modi of surrendering India's sovereignty to US President Donald Trump, following Trump's announcements regarding Indian trade deals. He also criticized the silencing of Rahul Gandhi in Parliament and alleged that the Kerala government is shielding the accused in the Sabarimala gold theft case.

#KCVenugopal #Congress #NarendraModi #Donald Trump #IndiaUSRelations #RahulGandhi #Parliament #SabarimalaCase #KeralaPolitics #Democracy