'അഴിമതി ഭരണം തുലയട്ടെ': മുദ്രാവാക്യവുമായി പ്രതിപക്ഷം നടുത്തളത്തിൽ; കൗൺസിൽ ബഹളമയം

കണ്ണൂർ: (KVARTHA) കോർപ്പറേഷൻ കൗൺസിൽ യോഗം പരസ്പരം അഴിമതി ആരോപിച്ച് ഭരണ-പ്രതിപക്ഷ ബഹളത്തെ തുടർന്ന് പാതിവഴിയിൽ പിരിഞ്ഞു. കൗൺസിൽ യോഗം തുടങ്ങിയ ഉടൻ 'അഴിമതി ഭരണം തുലയട്ടെ' എന്ന് മുദ്രാവാക്യം വിളിച്ച് പ്രതിപക്ഷം നടുത്തളത്തിലേക്ക് ഇറങ്ങി പ്രതിഷേധിച്ചു. 

ഇതിന് പിന്നാലെ 'പിണറായി ഭരണം തുലയട്ടെ' എന്ന് പറഞ്ഞ് ഭരണപക്ഷവും മുദ്രാവാക്യം വിളിച്ചതോടെ അന്തരീക്ഷം പൂർണ്ണമായും ബഹളമയമായി. 17 അജണ്ടകളാണ് കൗൺസിൽ യോഗത്തിനായി വെച്ചിരുന്നത്.

മേയർ ചേംബറിൽ കയറിയ ഉടൻ പ്രതിപക്ഷം 'അഴിമതി ഭരണം തുലയട്ടെ' എന്ന് മുദ്രാവാക്യം വിളിച്ചാണ് രംഗത്തെത്തിയത്. എന്നാൽ ഇതിന് മറുപടിയായി 'പിണറായി ഭരണം തുലയട്ടെ' എന്ന് പറഞ്ഞ് ഭരണപക്ഷവും മുദ്രാവാക്യം വിളി തുടങ്ങി. കൗൺസിൽ യോഗം ബഹളത്തിൽ മുങ്ങിയതോടെ, മേയർ അജണ്ടകൾ പാസാക്കുന്നുവെന്ന് അറിയിച്ച് യോഗം പിരിച്ചുവിടുകയായിരുന്നു.

കണ്ണൂർ കോർപ്പറേഷന്റെ സദ്ഭരണത്തിൽ 'വിറളി പിടിച്ച്' നിരന്തരം ഭരണസ്തംഭനം ഉണ്ടാക്കാനാണ് പ്രതിപക്ഷം ശ്രമിക്കുന്നതെന്ന് മേയർ മുസ്ലിഹ് മഠത്തിൽ മാധ്യമങ്ങളോട് പറഞ്ഞു. സംസ്ഥാന സർക്കാരിന്റെ അഴിമതികൾ പുറത്തുവരുമ്പോൾ, യുഡിഎഫ് ഭരിക്കുന്ന തദ്ദേശസ്വയംഭരണ സ്ഥാപനങ്ങൾക്ക് എതിരെ അഴിമതി ആരോപിച്ചു സംസ്ഥാന ഭരണത്തിലെ അഴിമതി വാർത്ത വഴിതിരിച്ചു വിടാനാണ് പ്രതിപക്ഷം ശ്രമിക്കുന്നത്.

കോർപ്പറേഷന് എതിരെ അഴിമതി ആരോപിച്ച സിപിഎം ജില്ലാ സെക്രട്ടറി കെ കെ രാഗേഷ് വായിക്കാൻ അറിയാത്തതുകൊണ്ടാണോ മനപ്പൂർവ്വമാണോ റദ്ദാക്കിയ ടെൻഡറുകളുടെ രേഖകൾ ഹാജരാക്കി ഇല്ലാത്ത അഴിമതി ആരോപിക്കുന്നതെന്ന് മനസ്സിലാവുന്നില്ല. 

കോർപ്പറേഷനിലെ പല ഉദ്യോഗസ്ഥരും സിപിഎമ്മിന്റെ വിനീത ദാസന്മാരാണ്. വിവരാവകാശ നിയമം പാലിക്കാതെയാണ് ഇവർ സുപ്രധാനമായ രേഖകൾ പുറത്തു കൊടുക്കുന്നതെന്നും അത് എങ്ങനെ സംഭവിക്കുന്നുവെന്ന് അറിയില്ലെന്നും മേയർ ചൂണ്ടിക്കാട്ടി. വെള്ളിയാഴ്ച വാർത്താസമ്മേളനം വിളിച്ച് എല്ലാ കാര്യങ്ങളും വിശദീകരിക്കുമെന്നും മേയർ കൂട്ടിച്ചേർത്തു.

ഈ വാർത്തയെക്കുറിച്ച് നിങ്ങളുടെ അഭിപ്രായം എന്താണ്? കമൻ്റ് ചെയ്യുക. 

Article Summary: Kannur Corporation Council meeting disrupted due to corruption allegations and mutual protests, leading to the Mayor dissolving the session.

#Kannur #Corporation #Protest #MuslihMadathil #KeralaPolitics #Corruption