കൽപറ്റ: (KVARTHA) സുൽത്താൻ ബത്തേരി നിയമസഭാ തിരഞ്ഞെടുപ്പ് കോഴക്കേസിൽ ബിജെപി സംസ്ഥാന അധ്യക്ഷൻ കെ സുരേന്ദ്രന് ജാമ്യം ലഭിച്ചു. സുൽത്താൻ ബത്തേരി കോടതിയാണ് അദ്ദേഹത്തിന് ജാമ്യം അനുവദിച്ചത്. 2021-ൽ നടന്ന നിയമസഭാ തിരഞ്ഞെടുപ്പിൽ സുൽത്താൻ ബത്തേരി നിയോജകമണ്ഡലത്തിൽ എൻഡിഎ സ്ഥാനാർത്ഥിയായി മത്സരിക്കാൻ സി കെ ജാനുവിന് പണം നൽകിയെന്ന കേസിലാണ് സുരേന്ദ്രൻ ഒന്നാം പ്രതിയായിരുന്നത്. 

കേസിലെ രണ്ടാം പ്രതിയായ സി കെ ജാനുവിന് നേരത്തെ ജാമ്യം ലഭിച്ചിരുന്നു. മൂന്നാം പ്രതിയായ ബിജെപി ജില്ലാ പ്രസിഡന്റ് പ്രശാന്ത് മലവയലും ജാമ്യത്തിനായി കോടതിയെ സമീപിച്ചിട്ടുണ്ട്. എംഎസ്എഫ് സംസ്ഥാന പ്രസിഡന്റ് പി കെ നവാസാണ് ഇതുമായി ബന്ധപ്പെട്ട് പരാതി നൽകിയത്.

ജാമ്യം ലഭിച്ച ശേഷം മാധ്യമങ്ങളോട് സംസാരിച്ച കെ സുരേന്ദ്രൻ, ഇത് മുസ്ലിം ലീഗ് നേതാവ് നൽകിയ പരാതിയുടെ അടിസ്ഥാനത്തിൽ സർക്കാർ കെട്ടിച്ചമച്ച കേസാണെന്ന് ആരോപിച്ചു. പൊലീസ് ഇതിന് ഒത്താശ ചെയ്യുകയായിരുന്നുവെന്നും അദ്ദേഹം കുറ്റപ്പെടുത്തി. രണ്ട് തവണ കോടതി കുറ്റപത്രം മടക്കിയ ഈ വ്യാജ കേസിനെ ബിജെപി നിയമപരമായി നേരിടുമെന്നും മഞ്ചേശ്വരം കേസ് പോലെ ഇതും കോടതി തള്ളിക്കളയുമെന്നും സുരേന്ദ്രൻ പറഞ്ഞു. എല്ലാ കേസുകളിലും സത്യം തെളിയിക്കുമെന്നും അദ്ദേഹം കൂട്ടിച്ചേർത്തു.

മുണ്ടക്കൈ-ചൂരൽമല പുനരധിവാസ പദ്ധതി പൂർണമായും പരാജയപ്പെട്ടെന്നും ദുരന്തത്തിൽ നിന്ന് തട്ടിപ്പ് നടത്തുകയാണ് പിണറായി സർക്കാരിന്റെ ലക്ഷ്യമെന്നും അദ്ദേഹം ആരോപിച്ചു. ആശാവർക്കർമാരുടെ സമരത്തെ സിപിഎം അപമാനിക്കുകയാണെന്നും തൊഴിലാളി വിരുദ്ധമായ പാർട്ടിയാണ് അവരുടേതെന്നും സുരേന്ദ്രൻ കുറ്റപ്പെടുത്തി. 

ഈ മാസം 27, 28 തീയതികളിൽ ആശാവർക്കർമാർക്ക് പിന്തുണയുമായി ബിജെപി രാപ്പകൽ സമരം നടത്തുമെന്നും അദ്ദേഹം അറിയിച്ചു. പ്രധാനമന്ത്രി നരേന്ദ്ര മോദിയെ പ്രശംസിച്ച ശശി തരൂരിന്റെ പ്രസ്താവനയെ പിന്തുണച്ച സുരേന്ദ്രൻ രാഹുൽ ഗാന്ധി രാജ്യത്തെ തിരഞ്ഞെടുപ്പ് സമ്പ്രദായങ്ങളെ പുച്ഛിക്കുന്ന വ്യക്തിയാണെന്നും മതഭീകരവാദികളുടെ കയ്യിലെ ചട്ടുകമാണെന്നും ആരോപിച്ചു.

BJP State President K Surendran was granted bail in the Sulthan Bathery election bribery case. He alleges the case is fabricated by the government based on a complaint from a Muslim League leader. He also criticized the Pinarayi government and announced a protest in support of Asha workers.

#KSurendran #SulthanBathery #BriberyCase #BJP #KeralaPolitics #BailGranted