കണ്ണൂരിന് പുതിയ ട്രെയിനുകളും, കൂടുതൽ സൗകര്യങ്ങളും; റെയിൽവേ മന്ത്രിക്ക് കെ സുധാകരന്റെ നിവേദനം

കണ്ണൂർ: (KVARTHA) മണ്ഡലത്തിലെ റെയിൽവേ വികസനത്തിന് സമഗ്രനിർദ്ദേശങ്ങളുമായി കോൺഗ്രസ് പ്രവർത്തകസമിതി അംഗം കെ. സുധാകരൻ എം.പി. കേന്ദ്ര റെയിൽവേ വകുപ്പ് മന്ത്രി അശ്വിനി വൈഷ്ണവുമായി കൂടിക്കാഴ്ച നടത്തി. കണ്ണൂരിലെ റെയിൽവേ അടിസ്ഥാന സൗകര്യങ്ങളുടെ പുരോഗതിയും പുതിയ ട്രെയിൻ സർവീസുകളും ആവശ്യപ്പെട്ടാണ് എം.പി നിവേദനം സമർപ്പിച്ചത്.

വർഷങ്ങളായി യാത്രക്കാരും ജനപ്രതിനിധികളും നാട്ടുകാരും ഉന്നയിച്ചുവരുന്ന വിഷയങ്ങൾ ചർച്ചയിൽ എം.പി കേന്ദ്രമന്ത്രിയുടെ ശ്രദ്ധയിൽപ്പെടുത്തി. യാത്രക്കാരുടെ സുരക്ഷ, സൗകര്യം, കണക്ടിവിറ്റി എന്നീ വിഷയങ്ങളിൽ അടിയന്തര ഇടപെടൽ വേണമെന്ന് കെ. സുധാകരൻ എം.പി ആവശ്യപ്പെട്ടു.

റെയിൽവേ വികസന കാര്യത്തിൽ കണ്ണൂർ വർഷങ്ങളായി അവഗണിക്കപ്പെടുകയാണെന്നും പ്രഖ്യാപിച്ച പദ്ധതികളുടെ പൂർത്തീകരണം വൈകുകയാണെന്നും എം.പി ചൂണ്ടിക്കാട്ടി. അമൃത് ഭാരത് പദ്ധതിയുടെ ഭാഗമായി അനുവദിച്ച 34 കോടിയുടെ വികസന പ്രവർത്തനങ്ങൾ ഇതുവരെ ആരംഭിക്കാത്തതിലുള്ള പ്രതിഷേധം കേന്ദ്രമന്ത്രിയെ അറിയിച്ചു.

നിർദ്ദേശങ്ങൾ:

● കണ്ണൂർ റെയിൽവേ സ്റ്റേഷനിൽ നാലാം പ്ലാറ്റ്‌ഫോം നിർമ്മിക്കുക.
● ഒന്നും രണ്ടും പ്ലാറ്റ്‌ഫോമുകളിൽ എയർ കൂളർ സ്ഥാപിക്കുക.
● എൻ.ഒ.സി അപേക്ഷകൾക്ക് സിംഗിൾ വിൻഡോ സംവിധാനം ഏർപ്പെടുത്തുക.
● പ്രധാന സ്റ്റേഷനുകളിലെ പ്ലാറ്റ്‌ഫോം, റൂഫ് എന്നിവ നവീകരിക്കുക.
● കണ്ണൂർ സൗത്ത്, ധർമ്മടം, വളപട്ടണം, പാപ്പിനിശ്ശേരി, ചിറക്കൽ സ്റ്റേഷനുകളിൽ യാത്രക്കാരുടെ സുരക്ഷക്കും അടിസ്ഥാന സൗകര്യങ്ങൾക്കും വേണ്ടിയുള്ള നവീകരണം അടിയന്തര പ്രാധാന്യത്തോടെ നടപ്പിലാക്കുക.

പുതിയ ട്രെയിൻ സർവീസുകൾ:

● മംഗളൂരു-ഗോവ വന്ദേഭാരത് കണ്ണൂർ വരെ നീട്ടുക.
● കണ്ണൂർ-കോയമ്പത്തൂർ പാസഞ്ചർ മംഗളൂരു വരെ നീട്ടുക.
● ഉച്ചയ്ക്ക് 12നും 3നും കണ്ണൂർ–മംഗളൂരു മെമു സർവീസ് ആരംഭിക്കുക.
● കണ്ണൂർ–ഗോവ പാസഞ്ചർ ട്രെയിൻ ആരംഭിക്കുക.
● തിരുവനന്തപുരം-കണ്ണൂർ ജനശതാബ്ദി മംഗളൂരു വരെ നീട്ടുക.
● എറണാകുളം-കണ്ണൂർ എക്സിക്യൂട്ടീവ് എക്സ്പ്രസ് മംഗളൂരു വരെ നീട്ടുക.
● മംഗളൂരു-തിരുവനന്തപുരം സ്പെഷ്യൽ ട്രെയിൻ ദിവസേന നടത്തുക.
● കണ്ണൂരിൽ നിന്ന് മൂകാംബികയിലേക്ക് പുതിയ ട്രെയിൻ ആരംഭിക്കുക.

അധിക സ്റ്റോപ്പുകൾ:

● കോയമ്പത്തൂർ - മംഗളൂരു പാസഞ്ചറിന് കണ്ണൂർ സൗത്തിൽ സ്റ്റോപ്പ് നൽകുക.
● മലബാർ എക്സ്പ്രസിന് പാപ്പിനിശ്ശേരി, കണ്ണൂർ സൗത്ത് സ്റ്റേഷനുകളിൽ സ്റ്റോപ്പ് നൽകുക.
● കോയമ്പത്തൂർ പാസഞ്ചറിന് ധർമ്മടത്ത് സ്റ്റോപ്പ് അനുവദിക്കുക.
● എല്ലാ സൂപ്പർഫാസ്റ്റ്, എക്സ്പ്രസ് ട്രെയിനുകളിലും സാധാരണ കോച്ചുകളും വനിതകൾക്കായി പ്രത്യേകം കോച്ചുകളും കൂട്ടിച്ചേർക്കുക.

ചിറക്കൽ റെയിൽവേ സ്റ്റേഷൻ സാമ്പത്തികമായി നഷ്ടത്തിലാകാൻ കാരണം അവിടുത്തെ അടിസ്ഥാന സൗകര്യങ്ങളുടെ അപര്യാപ്തതയാണെന്നും എം.പി ചൂണ്ടിക്കാട്ടി. കോവിഡ് കാലത്ത് നിർത്തിവെച്ച പല സ്റ്റോപ്പുകളും ഇതുവരെ പുനഃസ്ഥാപിച്ചിട്ടില്ലെന്നും നിവേദനത്തിൽ പറയുന്നു. 

കണ്ണൂർ സൗത്ത് റെയിൽവേ സ്റ്റേഷന്റെ സമഗ്ര വികസനത്തിനുവേണ്ടിയുള്ള നിവേദനവും കെ. സുധാകരൻ എം.പി റെയിൽവേ മന്ത്രിക്ക് സമർപ്പിച്ചു.

കണ്ണൂരിലെ റെയിൽവേ വികസനത്തെക്കുറിച്ചുള്ള ഈ നിവേദനത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: K. Sudhakaran MP submitted a memorandum to the Railway Minister for rail development in Kannur.

#KannurRailways #KSudhakaran #KeralaNews #RailwayDevelopment #IndianRailways #Kannur