കണ്ണൂരിൽ മത്സരിക്കാൻ കെ സുധാകരൻ; പച്ചക്കൊടി വീശാൻ ഹൈക്കമാൻഡ്; സീറ്റിനായി മുസ്ലിം ലീഗും രംഗത്ത്

കണ്ണൂർ: (KVARTHA) തങ്ങളിൽ നിന്ന് നഷ്ടപ്പെട്ട കണ്ണൂർ നിയമസഭാ സീറ്റ് തിരിച്ചുപിടിക്കാൻ കെ സുധാകരൻ എം പിയെ കളത്തിലിറക്കണമെന്ന ആവശ്യവുമായി പാർട്ടിയിലെ ഒരു വിഭാഗം രംഗത്തെത്തി.

മന്ത്രി രാമചന്ദ്രൻ കടന്നപ്പള്ളി നേരിയ ഭൂരിപക്ഷത്തിന് രണ്ടുതവണ വിജയിച്ച മണ്ഡലം കോൺഗ്രസിന്റെ ഉറച്ച കോട്ടകളിലൊന്നാണെന്നും കെ സുധാകരൻ മത്സരിച്ചാൽ വിജയം ഉറപ്പാണെന്നുമാണ് നേതാക്കളുടെ അവകാശവാദം.

നിയമസഭാ തിരഞ്ഞെടുപ്പിൽ മത്സരിക്കാൻ കെ സുധാകരനും താത്പര്യമുണ്ട്. യുഡിഎഫ് അധികാരത്തിലെത്തിയാൽ മുഖ്യമന്ത്രി സ്ഥാനത്തേക്ക് പരിഗണിക്കുന്നവരിലൊരാളായി മാറാൻ ഇതിലൂടെ സാധിക്കുമെന്നും അദ്ദേഹം കരുതുന്നു.

എന്നാൽ സുധാകരന്റെ സ്ഥാനാർത്ഥിത്വത്തോട് എഐസിസി സംഘടനാ ജനറൽ സെക്രട്ടറി കെ സി വേണുഗോപാലിന് അത്ര താത്പര്യമില്ലെന്നാണ് സൂചന. കെ സുധാകരൻ മാറുന്നതോടെ ലോക്സഭയിലെ ഒരു സീറ്റ് പാർട്ടിക്ക് നഷ്ടമാകുമോ എന്ന ആശങ്കയാണ് ഇതിന് പിന്നിൽ.

കെപിസിസി അധ്യക്ഷ പദവി ഒഴിയുന്ന സമയത്തെ കരാർ പ്രകാരം കണ്ണൂർ നിയമസഭാ സീറ്റിൽ മത്സരിപ്പിക്കുമെന്ന് ഹൈക്കമാൻഡ് ഉറപ്പുനൽകിയിരുന്നതായി സുധാകരനെ അനുകൂലിക്കുന്നവർ പറയുന്നു. ഈ ഉറപ്പ് പാലിക്കണമെന്നാണ് അവരുടെ ആവശ്യം. കണ്ണൂർ മണ്ഡലം നേരത്തെ തന്നെ മുസ്ലിം ലീഗ് നോട്ടമിട്ട സീറ്റുകളിലൊന്നാണ്. മണ്ഡലത്തിൽ തങ്ങൾക്കാണ് മേൽക്കൈ എന്നാണ് ലീഗ് ജില്ലാ നേതൃത്വത്തിന്റെ വാദം.

അഴീക്കോട് കോൺഗ്രസിന് നൽകി പകരം കണ്ണൂർ ഏറ്റെടുക്കണമെന്നാണ് ലീഗിന്റെ ആവശ്യം. എന്നാൽ കെ സുധാകരനാണ് സ്ഥാനാർത്ഥിയെങ്കിൽ മുസ്ലിം ലീഗിന് കടുത്ത നിലപാട് സ്വീകരിക്കാൻ കഴിയില്ലെന്നാണ് സുധാകര വിഭാഗത്തിന്റെ കണക്കുകൂട്ടൽ.

കെ സുധാകരൻ കണ്ണൂർ മണ്ഡലത്തിൽ മത്സരിക്കുകയാണെങ്കിൽ പാർലമെന്റിലേക്ക് യൂത്ത് കോൺഗ്രസ് നേതാവ് വി പി അബ്ദുൽ റഷീദിനെ പരിഗണിക്കണമെന്ന വാദവും ഉയരുന്നുണ്ട്.

ഇക്കുറി അബ്ദുൽ റഷീദ് തളിപ്പറമ്പ് മണ്ഡലത്തിൽ നിന്ന് തന്നെ നിയമസഭയിലേക്ക് മത്സരിച്ചേക്കും. സിപിഎം ശക്തികേന്ദ്രമായ ആന്തൂർ ഉൾപ്പെടുന്ന തളിപ്പറമ്പിൽ സംസ്ഥാന സെക്രട്ടറി എം വി ഗോവിന്ദന്റെ ഭൂരിപക്ഷം ഇരുപതിനായിരത്തിൽ ഒതുക്കാൻ അബ്ദുൽ റഷീദിന് കഴിഞ്ഞിരുന്നു.

വരാനിരിക്കുന്ന നിയമസഭാ തിരഞ്ഞെടുപ്പിലും തളിപ്പറമ്പിൽ എം വി ഗോവിന്ദൻ തന്നെ മത്സരിക്കാനാണ് സാധ്യത. അദ്ദേഹം മാറുന്ന പക്ഷം എം വി നികേഷ് കുമാറിന് നറുക്ക് വീണേക്കും.

കണ്ണൂർ രാഷ്ട്രീയത്തിലെ ഈ മാറ്റങ്ങളെക്കുറിച്ച് നിങ്ങളുടെ അഭിപ്രായമെന്താണ്? കമന്റ് ചെയ്യൂ. വാർത്ത ഷെയർ ചെയ്യൂ. 

Article Summary: K Sudhakaran might contest in the Kannur assembly seat to reclaim the UDF stronghold while the Muslim League also eyes the seat.

#KSudhakaran #KannurPolitics #KeralaAssemblyElection #INC #MuslimLeague #KCVenugopal