'മുഹമ്മദ് ദീപക്കി'നെ തേടി ജോൺ ബ്രിട്ടാസ് എംപി കോട്ദ്വാറിൽ; വർഗീയതയ്‌ക്കെതിരായ പോരാട്ടത്തിന്റെ പ്രത്യാശാനാളമെന്ന് അഭിനന്ദനം

കോട്ദ്വാർ: (KVARTHA) ഉത്തരാഖണ്ഡിലെ കോട്ദ്വാർ നഗരത്തിൽ മതവിദ്വേഷത്തിന്റെ പേരിൽ നടന്ന ആക്രമണശ്രമത്തെ ഒറ്റയ്ക്ക് നേരിട്ട ദീപക് കുമാറിനെ സന്ദർശിച്ച് സിപിഎം നേതാവ് ഡോ. ജോൺ ബ്രിട്ടാസ് എംപി. 

ബജ്‌റംഗ് ദൾ പ്രവർത്തകരുടെ ആക്രമണത്തിൽ നിന്ന് വയോധികനായ മുസ്ലീം കച്ചവടക്കാരനെ രക്ഷിച്ച ദീപക്കിന്റെ വീട്ടിലെത്തി അദ്ദേഹം കേരളത്തിന്റെ ഐക്യദാർഢ്യം അറിയിച്ചു. ദീപക് കുമാർ എന്ന 'മുഹമ്മദ് ദീപക്' ഇന്ത്യയെ കാർന്നുതിന്നുന്ന അർബുദമായ ഹിന്ദുത്വ വർഗീയവാദികൾക്കെതിരെയുള്ള പോരാട്ടത്തിന്റെ പ്രത്യാശാനാളമാണെന്ന് ബ്രിട്ടാസ് പറഞ്ഞു.

സംഭവം ഇങ്ങനെ

ഹിമാലയത്തിന്റെ താഴ്വാരമായ കോട്ട്ദ്വാറിൽ വന്ദ്യവയോധികനായ മുഹമ്മദ് ഷൊയ്ബിന്റെ ഉടമസ്ഥതയിലുള്ള 'ബാബ' എന്ന വസ്ത്രക്കടയ്ക്ക് എതിരെയാണ് ബജ്‌റംഗ് ദൾ പ്രവർത്തകർ തിരിഞ്ഞത്. സാഹോദര്യത്തിന്റെയും സഹവർത്തിത്വത്തിന്റെയും സന്ദേശം പ്രസരിക്കേണ്ട റിപ്പബ്ലിക്ക് ദിനത്തിലായിരുന്നു വർഗീയവാദികളുടെ അഴിഞ്ഞാട്ടം. 

പ്രദേശത്തെ പ്രശസ്തമായ ഹനുമാൻ ക്ഷേത്രമായ സിദ്ധബലി ബാബയുമായി കടയുടെ പേരിന് സാമ്യമുണ്ടെന്നും, ഒരു മുസ്ലീം വ്യാപാരി ഈ പേര് ഉപയോഗിക്കുന്നത് മതവികാരം വ്രണപ്പെടുത്തുമെന്നും ആരോപിച്ചായിരുന്നു പ്രതിഷേധം.

രക്ഷകനായി ദീപക് കുമാർ

ജനുവരി 28-ന് പ്രതിഷേധക്കാർ കടയ്ക്ക് മുന്നിൽ തടിച്ചുകൂടിയതോടെ സ്ഥിതിഗതികൾ വഷളായി. നിസ്സഹായനായ മുഹമ്മദിന് മുന്നിൽ രക്ഷകനായി ജിം ഉടമയായ ദീപക് കുമാർ എത്തി. നൂറ്റിയൻപതോളം വരുന്ന അക്രമികളെ അദ്ദേഹം ഒറ്റയ്ക്ക് നേരിട്ടു. 

പേര് എന്താണെന്ന് ചോദിച്ച അക്രമികളോട് 'എന്റെ പേര് മുഹമ്മദ് ദീപക് എന്നാണ്' എന്ന് മറുപടി നൽകി അദ്ദേഹം പ്രതിരോധം തീർത്തു. ഈ ദൃശ്യങ്ങൾ സാമൂഹിക മാധ്യമങ്ങളിൽ വൈറലായിരുന്നു. ഹിന്ദുവായ താൻ തന്റെ മതത്തിൽ അഭിമാനിക്കുന്നുണ്ടെന്നും എന്നാൽ അതിനുമുമ്പ് താനൊരു ഇന്ത്യക്കാരനാണെന്നും ദീപക് വ്യക്തമാക്കിയിരുന്നു.

പൊലീസ് നടപടിയിൽ പ്രതിഷേധം

ദീപക്കിനെ നേരിൽകണ്ട് മതമൈത്രിയിൽ അഭിമാനിക്കുന്ന കേരളത്തിന്റെ ആശംസകൾ നേരാനാണ് എത്തിയതെന്ന് ബ്രിട്ടാസ് പറഞ്ഞു. വർഗീയവാദികളുടെ ഭീഷണിയിൽ അനാഥമായ ജിമ്മും മുഹമ്മദിന്റെ 'ബാബ' തുണിക്കടയും എംപി സന്ദർശിച്ചു. 

കലാപകാരികളെ സംരക്ഷിച്ചുകൊണ്ട് ദീപക്കിനെതിരെ കേസെടുത്ത പൊലീസ് നടപടിയെ അദ്ദേഹം രൂക്ഷമായി വിമർശിച്ചു. കോട്ട്ദ്വാർ പൊലീസ് സ്റ്റേഷനിലെത്തി അദ്ദേഹം ഉദ്യോഗസ്ഥരോട് ശക്തമായ എതിർപ്പും രേഖപ്പെടുത്തി.

അതേസമയം, പൊലീസിന്റെയും ഭരണകൂടത്തിന്റെയും നേതൃത്വത്തിൽ നടത്തിയ ചർച്ചകൾക്കൊടുവിൽ തർക്കം പരിഹരിച്ചതായും ഷൊയ്ബിന്റെ കട 'ബാബ' എന്ന പേരിൽ തന്നെ തുടർന്നും പ്രവർത്തിക്കുമെന്നും അധികൃതർ വ്യക്തമാക്കിയിട്ടുണ്ട്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുക്കൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: MP John Brittas visited Deepak Kumar in Kotdwar, who saved a Muslim trader from communal attack.

#JohnBrittas #DeepakKumar #Kotdwar #CommunalHarmony #Uttarakhand #Humanity #KVARTHA