ശ്രീനഗർ: (KVARTHA) ജമ്മു കശ്മീരിൽ ഒരു ദശാബ്ദത്തിന് ശേഷമുള്ള ആദ്യ നിയമസഭാ തിരഞ്ഞെടുപ്പാണ് നടക്കുന്നത്. ആദ്യഘട്ട വോട്ടെടുപ്പ് ബുധനാഴ്ച (സെപ്റ്റംബർ 18) യാണ്. ജമ്മു മേഖലയിലെ മൂന്ന് ജില്ലകളിലെ എട്ട്, കശ്മീർ താഴ്‌വരയിലെ നാല് ജില്ലകളിലെ 16 മണ്ഡലങ്ങളിലേക്കാണ് ആദ്യ ഘട്ടത്തിൽ തിരഞ്ഞെടുപ്പ്. 90 സ്വതന്ത്രർ ഉൾപ്പെടെ 219 സ്ഥാനാർത്ഥികളുടെ വിധി 23 ലക്ഷത്തിലധികം വോട്ടർമാർ തീരുമാനിക്കും. 

ചെനാബ് താഴ്‌വരയിലെ ദോഡ, കിഷ്ത്വാർ, റംബാൻ ജില്ലകളിലും ദക്ഷിണ കശ്മീരിലെ അനന്ത്നാഗ്, പുൽവാമ, കുൽഗാം, ഷോപിയാൻ ജില്ലകളിലുമാണ് ഈ 24 നിയമസഭാ മണ്ഡലങ്ങൾ. 26 സീറ്റുകളിലേക്ക്  രണ്ടാം ഘട്ടത്തിൽ സെപ്റ്റംബർ 25നും മൂന്നാമത്തേതും അവസാനത്തേതുമായ ഘട്ടത്തിൽ 40 സീറ്റുകളിലേക്ക് ഒക്ടോബർ അഞ്ചിനും വോട്ടെടുപ്പ് നടക്കും. 

പിരിച്ചുവിടലും അതിർത്തി നിർണയവും

2018 നവംബർ 21-ന്, ജമ്മു കശ്മീർ നിയമസഭ പിരിച്ചുവിടലോടെ സംസ്ഥാനം വലിയ മാറ്റത്തിന് സാക്ഷ്യം വഹിച്ചു. 2019 ഓഗസ്റ്റ് അഞ്ചിന്, ജമ്മു കശ്മീരിന് പ്രത്യേക പദവി നൽകിയിരുന്ന ഇന്ത്യൻ ഭരണഘടനയിലെ ആർട്ടിക്കിൾ 370 റദ്ദാക്കപ്പെട്ടു. തുടർന്ന് പാസാക്കിയ ജമ്മു കശ്മീർ പുനഃസംഘടന നിയമപ്രകാരം 2019 ഒക്ടോബർ 31 മുതൽ ജമ്മു കശ്മീർ സംസ്ഥാനം ലഡാക്ക്, ജമ്മു കശ്മീർ എന്നീ രണ്ട് കേന്ദ്രഭരണ പ്രദേശങ്ങളായി വിഭജിക്കപ്പെട്ടു.

2022 മെയ് അഞ്ചിന് ജമ്മു കശ്മീർ ഡീലിമിറ്റേഷൻ കമ്മീഷൻ പുറപ്പെടുവിച്ച റിപ്പോർട്ട് പ്രകാരം, കേന്ദ്രഭരണ പ്രദേശത്തെ നിയമസഭാ മണ്ഡലങ്ങളുടെ എണ്ണത്തിലും അതിർത്തികളിലും മാറ്റങ്ങൾ വരുത്തിയിട്ടുണ്ട്. മുൻപ് 87 സീറ്റുകളായിരുന്നത് (ലഡാക്ക് മേഖലയിലെ 4 സീറ്റുകൾ ഉൾപ്പെടെ) ഇപ്പോൾ 90 ആയി ഉയർന്നു. ഇതിൽ കശ്മീരിൽ 47-ഉം ജമ്മുവിൽ 43-ഉം സീറ്റുകളുണ്ട്. അതായത്, ജമ്മുവിലെ സീറ്റുകളുടെ എണ്ണം ആറ് കൂടിയപ്പോൾ കശ്മീരിൽ ഒന്ന് മാത്രമാണ് കൂടിയത്. മുൻപ് ജമ്മു കശ്മീരിൽ ആകെ 83 സീറ്റുകളായിരുന്നത് ഇപ്പോൾ 90 ആയി ഉയർന്നു.

2014ലെ തിരഞ്ഞെടുപ്പ്

2014-ൽ ഏകീകൃത ജമ്മു കശ്മീരിൽ നടന്ന അഞ്ചുഘട്ട തിരഞ്ഞെടുപ്പിൽ മുഫ്തി മുഹമ്മദ് സയീദിന്റെ നേതൃത്വത്തിലുള്ള പീപ്പിൾസ് ഡെമോക്രാറ്റിക് പാർട്ടി (പിഡിപി) 28 സീറ്റുകൾ നേടി ഏറ്റവും വലിയ കക്ഷിയായി മാറി. എന്നാൽ കേവല ഭൂരിപക്ഷത്തിന് ആവശ്യമായ 44 സീറ്റുകൾ നേടാൻ ആർക്കും കഴിഞ്ഞില്ല. ബിജെപി 25 സീറ്റുകളോടെ രണ്ടാം സ്ഥാനത്തെത്തി. ജമ്മു കശ്മീർ നാഷണൽ കോൺഫറൻസ് 15 ഉം കോൺഗ്രസ് 12 ഉം സീറ്റുകൾ നേടി.

താഴ്‌വരയിലെ 46 സീറ്റുകളിൽ 25 എണ്ണം നേടി പിഡിപി കശ്മീരിൽ തങ്ങളുടെ ശക്തി പ്രകടിപ്പിച്ചു. എന്നാൽ, ജമ്മു മേഖലയിൽ 37 സീറ്റുകളിൽ 25 എണ്ണം ബിജെപിയും ലഡാക്ക് ഡിവിഷനിലെ നാല് സീറ്റുകളിൽ മൂന്ന് എണ്ണം കോൺഗ്രസും നേടി. ഈ തിരഞ്ഞെടുപ്പ് ഫലം കശ്മീരിലെ രാഷ്ട്രീയ ചിത്രത്തെ വ്യക്തമാക്കുന്നതാണ്. 

2024 ലെ സ്ഥിതിഗതികൾ 

ഇത്തവണ കോൺഗ്രസ് എൻസിയുമായി സഖ്യത്തിലേർപ്പെടുമ്പോൾ, ബിജെപി ഒറ്റയ്ക്ക് തിരഞ്ഞെടുപ്പിനെ നേരിടുകയാണ്. ബിജെപി ഔദ്യോഗികമായി ഒരു പാർട്ടിയുമായും സഖ്യമുണ്ടാക്കിയിട്ടില്ലെങ്കിലും, പാർട്ടിയുടെ നയവുമായി യോജിക്കുന്ന നിരവധി ‘സ്വതന്ത്രരെ’ അല്ലെങ്കിൽ പ്രാദേശിക പാർട്ടികളെ പിന്തുണക്കുന്നുണ്ട്.

ഈ നാല് പ്രധാന പാർട്ടികളെ കൂടാതെ, വോട്ടെടുപ്പിൽ ശ്രദ്ധേയമായ മറ്റ് മൂന്ന് കക്ഷികളുണ്ട്. സജ്ജാദ് ലോണിൻ്റെ ജെ & കെ പീപ്പിൾസ് കോൺഫറൻസ് (പിസി), മുൻ കോൺഗ്രസ് നേതാവ് ഗുലാം നബി ആസാദിൻ്റെ ഡെമോക്രാറ്റിക് പ്രോഗ്രസീവ് ആസാദ് പാർട്ടി (ഡിപിഎപി), അൽത്താഫ് ബുഖാരിയുടെ ജെ ആൻഡ് കെ അപ്നി പാർട്ടി എന്നിവയാണിവ.

#JammuKashmirElections, #PoliticalChanges, #Delimitation, #BJP, #Congress, #PDP