മലപ്പുറം/കണ്ണൂർ: (KVARTHA) മലപ്പുറം ജില്ലയെക്കുറിച്ചുള്ള തൻ്റെ വിവാദ പരാമർശത്തിൽ ഉറച്ചുനിൽക്കുന്നുവെന്ന് എസ്.എൻ.ഡി.പി. ജനറൽ സെക്രട്ടറി വെള്ളാപ്പള്ളി നടേശൻ വീണ്ടും വ്യക്തമാക്കി. തൻ്റെ പ്രസംഗത്തിലെ ഒരു ഭാഗം മാത്രം അടർത്തിയെടുത്ത് പ്രചരിപ്പിക്കുകയാണെന്നും ശ്രീനാരായണീയർക്ക് മലപ്പുറത്ത് പിന്നോക്കാവസ്ഥയാണുള്ളത് എന്നാണ് താൻ പറഞ്ഞതെന്നും വെള്ളാപ്പള്ളി മാധ്യമങ്ങളോട് പറഞ്ഞു. ലീഗിലെ സമ്പന്നരാണ് മലപ്പുറത്തെ വിദ്യാഭ്യാസ മേഖല നിയന്ത്രിക്കുന്നതെന്നും തന്നെ വർഗീയവാദിയാക്കാനാണ് ശ്രമമെന്നും അദ്ദേഹം കൂട്ടിച്ചേർത്തു. താൻ പറഞ്ഞതിൽ ഒരു വാക്കുപോലും പിൻവലിക്കില്ലെന്നും വെള്ളാപ്പള്ളി വ്യക്തമാക്കി. ചുങ്കത്തറയിലെ പൊതുപരിപാടിയിലായിരുന്നു വെള്ളാപ്പള്ളിയുടെ വിവാദ പ്രസ്താവന. മലപ്പുറത്ത് ഒരു വിഭാഗം പേടിച്ചും ശ്വാസവായു കിട്ടാതെയുമാണ് ജീവിക്കുന്നതെന്നും മലപ്പുറം ഒരു പ്രത്യേക രാജ്യമാണെന്നുമാണ് വെള്ളാപ്പള്ളി കഴിഞ്ഞ ദിവസം പറഞ്ഞത്.

അതേസമയം, മലപ്പുറത്തെക്കുറിച്ച് സമാനമായ രീതിയിൽ പ്രതികരിച്ച് ബി.ജെ.പി സംസ്ഥാന ജനറൽ സെക്രട്ടറി എം.ടി. രമേശും രംഗത്തെത്തി. സി.പി.എം മുസ്ലിം മൗലികവാദത്തിന് കീഴടങ്ങിയെന്നും മലപ്പുറത്തോട് ബി.ജെ.പിക്ക് വിരോധമില്ലെന്നും എന്നാൽ അവിടെ തീവ്രവാദ പ്രവർത്തനം കൂടുതലാണെന്നുമാണ് അദ്ദേഹം കണ്ണൂരിൽ പറഞ്ഞത്. പാർട്ടി കോൺഗ്രസിൽ മത ചിഹ്നമായ കഫിയ അണിഞ്ഞത് മൗലികവാദത്തിന് തെളിവാണെന്നും രമേശ് കൂട്ടിച്ചേർത്തു. ഭാരതീയ ജനതാപാർട്ടി സ്ഥാപക ദിനത്തിൽ കണ്ണൂരിൽ സംസാരിക്കുകയായിരുന്നു അദ്ദേഹം. എന്നാൽ മലപ്പുറത്ത് എന്ത് തീവ്രവാദമാണ് നടക്കുന്നതെന്ന് രമേശ് വ്യക്തമാക്കിയില്ല. 

വെള്ളാപ്പള്ളിയുടെ പരാമർശങ്ങൾക്കെതിരെ വിവിധ രാഷ്ട്രീയ കക്ഷി നേതാക്കൾ രൂക്ഷമായ വിമർശനവുമായി രംഗത്തെത്തിയിട്ടുണ്ട്. വെള്ളാപ്പള്ളി പറഞ്ഞത് ഒരിക്കലും പറയാൻ പാടില്ലാത്തതാണെന്ന് കെ.പി.സി.സി അധ്യക്ഷൻ കെ. സുധാകരൻ പ്രതികരിച്ചു. കേരളം കൂടുതൽ വർഗീയമായിക്കൊണ്ടിരിക്കുകയാണെന്ന് മുതിർന്ന കോൺഗ്രസ് നേതാവ് മുല്ലപ്പള്ളി രാമചന്ദ്രനും അഭിപ്രായപ്പെട്ടു. വെള്ളാപ്പള്ളിയുടെ പരാമർശത്തിനെതിരെ മുസ്ലിം ലീഗ് വിവിധയിടങ്ങളിൽ പ്രതിഷേധ പ്രകടനങ്ങളും സംഘടിപ്പിച്ചു. മലപ്പുറത്തെക്കുറിച്ചുള്ള ഇരു നേതാക്കളുടെയും വിവാദ പ്രസ്താവനകൾ സംസ്ഥാന രാഷ്ട്രീയത്തിൽ പുതിയ ചലനങ്ങൾക്ക് വഴിവെച്ചിരിക്കുകയാണ്.

SNDP leader Vellappally Natesan reiterated his controversial remarks about Malappuram, claiming backwardness for Sree Narayana followers. BJP leader MT Ramesh echoed similar sentiments, alleging increased extremist activities in Malappuram and accusing CPI(M) of appeasing Muslim fundamentalism. Their statements have drawn sharp criticism from other political leaders and sparked protests.

#Malappuram #VellappallyNatesan #MTRamesh #ExtremismAllegations #KeralaPolitics #Communalism