തിരുവനന്തപുരം: (KVARTHA) സംസ്ഥാനത്ത് ലഹരിയുടെ ഉപയോഗവും വിപണനവും വർധിച്ചു വരുന്ന സാഹചര്യത്തിൽ ഇതിനെതിരെ അതിവിപുലമായ ജനകീയ ക്യാമ്പയിന് സർക്കാർ നേതൃത്വം നൽകും. എല്ലാ വിഭാഗം ജനങ്ങളെയും വിവിധ വകുപ്പുകളെയും സ്ഥാപനങ്ങളെയും ഏകോപിപ്പിച്ച് ഏപ്രിൽ മാസം മുതൽ ഈ ക്യാമ്പയിൻ ആരംഭിക്കുമെന്ന് മുഖ്യമന്ത്രി പിണറായി വിജയൻ അറിയിച്ചു. നിലവിലുള്ള ലഹരി വിരുദ്ധ പ്രവർത്തനങ്ങളെയും ഈ പുതിയ സംരംഭത്തിൽ സംയോജിപ്പിക്കും.

നിയമസഭാ മന്ദിരത്തിൽ ചേർന്ന ഉന്നതതല യോഗത്തിൽ സംസാരിക്കുകയായിരുന്നു മുഖ്യമന്ത്രി. മയക്കുമരുന്നിനെതിരായ പോരാട്ടത്തിൽ സമൂഹത്തിന്റെയാകെ സഹകരണം അനിവാര്യമാണെന്ന് അദ്ദേഹം പറഞ്ഞു. ഇതിന്റെ ഭാഗമായി ഈ മാസം 30 ന് വിദഗ്ധർ, വിദ്യാർത്ഥി-യുവജന സംഘടനാ പ്രതിനിധികൾ, സിനിമ-സാംസ്കാരിക-മാധ്യമ പ്രവർത്തകർ, അധ്യാപക-രക്ഷാകർതൃ സംഘടനാ നേതാക്കൾ എന്നിവരുമായി ചർച്ച നടത്തി കർമ്മപദ്ധതിക്ക് രൂപം നൽകും.

ചീഫ് സെക്രട്ടറിയുടെ നേതൃത്വത്തിൽ ലഹരിവിരുദ്ധ പ്രവർത്തനങ്ങളുടെ രൂപരേഖ തയ്യാറാക്കുന്നതിനായി വിവിധ വകുപ്പുകൾ ഉൾപ്പെടുന്ന ഒരു സമിതി രൂപീകരിക്കും. എൽ.പി ക്ലാസുകൾ മുതൽ തന്നെ ലഹരിയുടെ ദോഷവശങ്ങളെക്കുറിച്ച് ബോധവത്കരണം നൽകണം. കുട്ടികളെ കായികരംഗത്തേക്ക് ആകർഷിക്കുന്നതിനുള്ള കൂടുതൽ പരിപാടികൾ സംഘടിപ്പിക്കണം. ഹോസ്റ്റലുകളും പൊതുസ്ഥലങ്ങളും ലഹരിമുക്തമാക്കാൻ ആവശ്യമായ നടപടികൾ സ്വീകരിക്കണം. പരിശോധനകൾ കൂടുതൽ കർശനമാക്കണം. പോലീസും എക്സൈസും അവരുടെ എൻഫോഴ്സ്മെൻ്റ് പ്രവർത്തനങ്ങൾ വ്യാപിപ്പിക്കണം. 

ലഹരിവിൽപന നടത്തുന്ന കടകൾ അടച്ചുപൂട്ടാൻ തദ്ദേശസ്വയംഭരണ വകുപ്പ് അടിയന്തര നടപടി സ്വീകരിക്കണം. മയക്കുമരുന്ന് സാന്നിധ്യം കണ്ടെത്താനായി അത്യാധുനിക ഉപകരണങ്ങൾ വാങ്ങുകയും സ്നിഫർ ഡോഗ് സ്ക്വാഡിൻ്റെ എണ്ണം വർദ്ധിപ്പിക്കുകയും ചെയ്യും. ആവശ്യമെങ്കിൽ മറ്റ് സംസ്ഥാനങ്ങളിലെ പോലീസ് ഉദ്യോഗസ്ഥരുമായി സഹകരിച്ച് കൂടുതൽ ശക്തമായ നടപടികൾ സ്വീകരിക്കും. ഓൺലൈൻ ലഹരി വ്യാപാരം തടയുന്നതിനുള്ള നടപടികൾ ഊർജ്ജിതമാക്കും. 

വിമാനത്താവളങ്ങൾ, റെയിൽവേ സ്റ്റേഷനുകൾ, തുറമുഖങ്ങൾ എന്നിവിടങ്ങളിൽ പരിശോധന ശക്തമാക്കും. സംസ്ഥാന അതിർത്തികളിലെ പോലീസ് പരിശോധനയും വർദ്ധിപ്പിക്കും. കൊറിയറുകൾ, പാഴ്സലുകൾ, ടൂറിസ്റ്റ് വാഹനങ്ങൾ തുടങ്ങി കേരളത്തിലേക്ക് വരുന്ന എല്ലാ വാഹനങ്ങളും വിശദമായ പരിശോധനയ്ക്ക് വിധേയമാക്കുമെന്നും മുഖ്യമന്ത്രി വ്യക്തമാക്കി.

യോഗത്തിൽ പങ്കെടുത്ത മന്ത്രിമാരായ സജി ചെറിയാൻ, എം.ബി. രാജേഷ്, ഒ.ആർ. കേളു, ആർ. ബിന്ദു, വി. അബ്ദുറഹ്‌മാൻ എന്നിവർ അതത് വകുപ്പുകൾ നടപ്പാക്കിവരുന്ന ലഹരിവിരുദ്ധ പദ്ധതികളെക്കുറിച്ച് വിശദീകരിച്ചു. ചീഫ് സെക്രട്ടറി ശാരദാ മുരളീധരൻ, അഡീഷണൽ ചീഫ് സെക്രട്ടറിമാരായ എ. ജയതിലക്, കെ.ആർ. ജ്യോതിലാൽ, സംസ്ഥാന പോലീസ് മേധാവി ഷെയ്ക്ക് ദർവേഷ് സാഹിബ്, എ.ഡി.ജി.പിമാരായ മനോജ് എബ്രഹാം, പി. വിജയൻ, എക്സൈസ് കമ്മീഷണർ മഹിപാൽ യാദവ് തുടങ്ങിയ ഉന്നത ഉദ്യോഗസ്ഥരും യോഗത്തിൽ പങ്കെടുത്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Kerala government to launch an extensive anti-drug campaign from April, with stricter checks and public cooperation for tackling drug abuse and trafficking.

#AntiDrugCampaign #KeralaGovernment #DrugAbuse #DrugTrafficking #PublicAwareness #KeralaNews