കണ്ണൂർ: (KVARTHA) ഗാന്ധി സ്തൂപം നിർമ്മിക്കാൻ അനുവദിക്കില്ലെന്ന കണ്ണൂർ സിപിഎം ജില്ലാ സെക്രട്ടറിയേറ്റ് അംഗത്തിന്റെ പ്രഖ്യാപനം സിപിഎം സംസ്ഥാന കമ്മിറ്റിയുടെ നയമാണോയെന്ന് കെപിസിസി പ്രസിഡന്റ് സണ്ണി ജോസഫ് എംഎൽഎ ചോദിച്ചു. കണ്ണൂർ മലപ്പട്ടത്ത് സിപിഎം തകർത്ത ഗാന്ധി സ്തൂപവും പി.ആർ.സനീഷിന്റെ വീടും സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

ഗാന്ധി നിന്ദ നിറഞ്ഞ ജില്ലാ സെക്രട്ടറിയേറ്റ് അംഗത്തിന്റെ പ്രസ്താവന ആഭ്യന്തര വകുപ്പിന്റെ ശ്രദ്ധയിൽപ്പെട്ടില്ലേ? സിപിഎം സംസ്ഥാന സെക്രട്ടറിയുടെ നാട്ടിൽ പോലും ഇതാണ് അവസ്ഥ. ജനാധിപത്യവും ഭരണഘടന അനുവദിക്കുന്ന പൗരസ്വാതന്ത്ര്യവും സ്വതന്ത്ര സംഘടനാ പ്രവർത്തനവും കേരളത്തിൽ എങ്ങനെ നടത്തുമെന്ന് മുഖ്യമന്ത്രി ഉത്തരം പറയണം. 

ഗാന്ധി സ്തൂപം തകർത്തതിനെതിരെ പരാതി നൽകിയിട്ടും പോലീസ് പ്രതികൾക്ക് ഒത്താശ നൽകുകയാണ്. ഗാന്ധി നിന്ദയിൽ സിപിഎം ബിജെപിയെ പോലും തോൽപ്പിക്കുകയാണ്. ഗാന്ധി സ്തൂപം തകർക്കുകയും കെ.സുധാകരൻ എംപി, രാഹുൽ മാങ്കൂട്ടത്തിൽ എംഎൽഎ ഉൾപ്പെടെയുള്ള ജനപ്രതിനിധികളെയും കോൺഗ്രസ് നേതാക്കളെയും ആക്രമിക്കുകയും ചെയ്ത കുറ്റവാളികൾക്കെതിരെ നിയമനടപടി സ്വീകരിക്കണമെന്നും സണ്ണി ജോസഫ് ആവശ്യപ്പെട്ടു.

മലപ്പട്ടത്ത് പോലീസ് നിഷ്പക്ഷമായല്ല പ്രവർത്തിക്കുന്നത്. തളിപ്പറമ്പിലെ ഇർഷാദിൻ്റെ വീട് ആക്രമിച്ച് അദ്ദേഹത്തിന്റെ പിതാവിനെ കയ്യേറ്റം ചെയ്യുകയും വാഹനങ്ങൾ തല്ലിത്തകർക്കുകയും ചെയ്ത പ്രതികൾ സൈ്വര്യ വിഹാരം നടത്തുന്നു. അക്രമങ്ങളെ പ്രോത്സാഹിപ്പിക്കുന്ന നടപടിയാണ് സിപിഎമ്മിൻ്റേത്. 

രാഷ്ട്രീയ കൊലപാതക കേസിലെ പ്രതികളെ മുദ്രാവാക്യം വിളിച്ച് ജയിലിലേക്ക് അയയ്ക്കുകയും അവരെ രക്ഷപ്പെടുത്താൻ ഖജനാവിൽ നിന്ന് കോടികൾ ചെലവാക്കി നിയമനടപടികൾ സ്വീകരിക്കുകയും ചെയ്തു. കണ്ണൂരിൽ വ്യാപകമായി ബോംബ് നിർമ്മാണത്തിന് നേതൃത്വം നൽകുന്നുവെന്നും സണ്ണി ജോസഫ് ആരോപിച്ചു.

ഗാന്ധി സ്തൂപം തകർത്ത സംഭവത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: KPCC President Sunny Joseph criticized CPM for destroying the Gandhi statue in Malappattam, Kannur. He accused CPM of surpassing BJP in Gandhi condemnation and demanded legal action against the culprits, alleging police support for the accused.

#GandhiStatue, #CPM, #Congress, #KeralaPolitics, #Kannur, #Violence