കണ്ണൂർ: (KVARTHA) തലശ്ശേരി താലൂക്കിലെ ബോംബ് രാഷ്ട്രീയത്തിനെതിരെ മാധ്യമങ്ങൾക്ക് മുൻപിൽ തുറന്നടിച്ച് ശ്രദ്ധ നേടിയ എം. സീന ബി.ജെ.പി മണ്ഡലം ഭാരവാഹിയായി ചുമതലയേറ്റു. എരഞ്ഞോളിയിൽ ബോംബ് സ്ഫോടനത്തിൽ ഒരാൾ കൊല്ലപ്പെട്ടതിന് പിന്നാലെ സി.പി.എമ്മിനെതിരെ ഗുരുതര ആരോപണങ്ങൾ ഉന്നയിച്ച കുടക്കളത്തെ എം. സീനയെ തലശ്ശേരി മണ്ഡലം സെക്രട്ടറിയായാണ് ബി.ജെ.പി തെരഞ്ഞെടുത്തത്.

ബി.ജെ.പി കണ്ണൂർ സൗത്ത് ജില്ലാ പ്രസിഡന്റ് ബിജു ഏളക്കുഴി പങ്കെടുത്ത ചടങ്ങിൽ വെച്ചാണ് സീന തലശ്ശേരി മണ്ഡലം സെക്രട്ടറിയായി ചുമതലയേറ്റത്. 2024 ജൂൺ 18-ന് എരഞ്ഞോളി ഗ്രാമ പഞ്ചായത്ത് ഓഫീസിന് സമീപം ആളൊഴിഞ്ഞ വീട്ടിലുണ്ടായ സ്ഫോടനത്തിൽ വേലായുധനെന്ന വയോധികൻ കൊല്ലപ്പെട്ടിരുന്നു. പറമ്പിൽ തേങ്ങ പെറുക്കാനെത്തിയ വേലായുധൻ തേങ്ങയാണെന്ന് കരുതി ബോംബ് എടുത്തപ്പോഴായിരുന്നു ദാരുണമായ അപകടം.

സംഭവസ്ഥലം സന്ദർശിച്ച് മടങ്ങുകയായിരുന്ന ഷാഫി പറമ്പിൽ എം.പിയോട് സംസാരിക്കുമ്പോഴാണ് സീന രൂക്ഷമായ ആരോപണങ്ങൾ ഉന്നയിച്ചത്. ‘ആളൊഴിഞ്ഞ വീടുകൾ ബോംബ് നിർമ്മാണ കേന്ദ്രങ്ങളാക്കുകയാണ്. ഇവ പാർട്ടിക്കാരുടെ ഹബ്ബുകളാണ്. ആരെങ്കിലും തുറന്നു പറഞ്ഞാൽ പറയുന്നവരുടെ വീട് ബോംബെറിഞ്ഞ് നശിപ്പിക്കും. ഇവിടെ ജീവിക്കാൻ അനുവദിക്കില്ല’ - എന്നായിരുന്നു സീനയുടെ ആരോപണങ്ങൾ. സഹികെട്ടാണ് താൻ പ്രതികരിക്കുന്നതെന്നും എത്ര കാലമാണ് സി.പി.എമ്മുകാരെ പേടിച്ച് ജീവിക്കേണ്ടതെന്നും സീന ചോദിച്ചിരുന്നു.

ആളൊഴിഞ്ഞ വീടുകൾ സി.പി.എം ബോംബ് നിർമ്മാണ കേന്ദ്രങ്ങളാക്കുകയാണെന്ന സീനയുടെ ആരോപണം വലിയ രാഷ്ട്രീയ വിവാദത്തിന് വഴിതെളിച്ചു. ദിവസങ്ങളോളം മാധ്യമങ്ങളിൽ ഈ വിഷയം ചർച്ചയായിരുന്നു. സീനയുടേത് പാർട്ടി വിരുദ്ധ പ്രചാരണമാണെന്ന് സി.പി.എം പ്രാദേശിക നേതൃത്വം ആരോപിച്ചിരുന്നു. ഈ ആരോപണ പ്രത്യാരോപണങ്ങൾക്കിടയിലാണ് സീന ബി.ജെ.പി മണ്ഡലം സെക്രട്ടറിയായി ചുമതലയേറ്റത്. ഇത് രാഷ്ട്രീയ രംഗത്ത് കൂടുതൽ ചർച്ചകൾക്ക് വഴിവെക്കും.

M. Seena, who gained attention for her strong allegations against the CPM regarding bomb politics in Eranholi following a bomb blast death, has now taken charge as a BJP Mandal office bearer in Thalassery. Her accusations of CPM using abandoned houses as bomb-making centers had triggered a major political controversy.

#EranholiBombBlast #KeralaPolitics #BJP #CPM #PoliticalControversy #MSeena