പയ്യന്നൂരിൽ വി കുഞ്ഞികൃഷ്ണന് അനുകൂലമായി പ്രകടനം നടത്തി; ദാമു സർഗത്തിന്റെ ഫോട്ടോ പ്രദർശനത്തിൽ നിന്ന് ഡിവൈഎഫ്ഐ പിൻമാറി

കണ്ണൂർ: (KVARTHA) പയ്യന്നൂരിൽ സി.പി.എം മുൻ ഏരിയാ സെക്രട്ടറി വി. കുഞ്ഞികൃഷ്ണനെ അനുകൂലിച്ച് പ്രകടനം നടത്തിയ സി.പി.എം അനുകൂലിയായ കലാകാരന്റെ ഫോട്ടോ പ്രദർശനം തടഞ്ഞതായി ആരോപണം. 

വെള്ളൂർ ശ്രീ കുടക്കത്ത് കൊട്ടണച്ചേരി മഹാക്ഷേത്രത്തിലാണ് സംഭവം. പ്രശസ്ത ഫോട്ടോഗ്രാഫറും സി.പി.എം അനുകൂലിയുമായ ദാമു സർഗത്തിന്റെ ഫോട്ടോ പ്രദർശനമാണ് അവസാന നിമിഷം തടസ്സപ്പെട്ടത്.

ക്ഷേത്രോത്സവവുമായി ബന്ധപ്പെട്ട് ഡി.വൈ.എഫ്.ഐ വെള്ളൂർ നോർത്ത് മേഖല കമ്മിറ്റിയുടെ നേതൃത്വത്തിലായിരുന്നു ഫോട്ടോ പ്രദർശനം സംഘടിപ്പിക്കാൻ തീരുമാനിച്ചിരുന്നത്. 

എന്നാൽ ചൊവ്വാഴ്ച രാത്രി മേഖല കമ്മിറ്റി ഭാരവാഹികളിലൊരാൾ തന്നെ വിളിച്ച് ഫോട്ടോ പ്രദർശനം നടത്താൻ കഴിയില്ലെന്ന് അറിയിച്ചതായി ദാമു സർഗം മാധ്യമങ്ങളോട് പറഞ്ഞു. മുകളിൽ നിന്നുള്ള നിർദ്ദേശം അനുസരിച്ചാണ് ഇത്തരമൊരു തീരുമാനമെടുത്തതെന്ന് ഭാരവാഹി വ്യക്തമാക്കിയതായും ദാമു സർഗം പറഞ്ഞു.

വിവാദ പശ്ചാത്തലം

കുന്നരുവിലെ രക്തസാക്ഷി ധനരാജ് ഫണ്ടുമായി ബന്ധപ്പെട്ട വിവാദങ്ങൾക്ക് പിന്നാലെ ജില്ലാ കമ്മിറ്റി അംഗമായിരുന്ന വി. കുഞ്ഞികൃഷ്ണനെ പാർട്ടിയിൽ നിന്ന് പുറത്താക്കിയിരുന്നു. 

ഇതിന് പിന്നാലെ വി. കുഞ്ഞികൃഷ്ണനെ അനുകൂലിച്ച് ദാമു സർഗം അടക്കമുള്ള നിരവധി പേർ പങ്കെടുത്ത് പ്രകടനം നടത്തിയിരുന്നു. ഇതിലുള്ള രാഷ്ട്രീയ വിരോധമാകാം ഫോട്ടോ പ്രദർശനം തടയാൻ ഇടയാക്കിയതെന്ന് കരുതുന്നു.

കൊല്ലപ്പെട്ട ധനരാജിന്റെ കുടുംബത്തെ സഹായിക്കാൻ പാർട്ടി പിരിച്ച ഫണ്ടിൽ തിരിമറി നടന്നുവെന്നും, ഒരുകോടി രൂപ പിരിച്ചതിൽ 46 ലക്ഷം രൂപ പയ്യന്നൂർ എം.എൽ.എ ടി.ഐ മധുസൂദനൻ ഉൾപ്പെടെയുള്ളവർ ചേർന്ന് തട്ടിയെടുത്തു എന്നുമായിരുന്നു വി. കുഞ്ഞികൃഷ്ണന്റെ ആരോപണം. 

പാർട്ടിക്ക് തെളിവ് നൽകിയിട്ടും നടപടി എടുത്തില്ലെന്നും അദ്ദേഹം ആരോപിച്ചിരുന്നു. ഇതിന് പിന്നാലെയാണ് കുഞ്ഞികൃഷ്ണനെ പാർട്ടിയുടെ പ്രാഥമികാംഗത്വത്തിൽ നിന്നും പുറത്താക്കിയത്.

കണക്കുകൾ പുറത്തുവിടും

വി. കുഞ്ഞികൃഷ്ണന്റെ ആരോപണം അണികൾക്കിടയിൽ സംശയങ്ങൾ ഉടലെടുത്ത സാഹചര്യത്തിൽ ഫണ്ടുമായി ബന്ധപ്പെട്ട കണക്കുകൾ പുറത്തുവിടാൻ സി.പി.എം തീരുമാനിച്ചിട്ടുണ്ട്. 

ഫെബ്രുവരി ആറിന് ജില്ലാ സെക്രട്ടറി കെ.കെ രാഗേഷ് വാർത്താ സമ്മേളനം നടത്തി കണക്കുകൾ അവതരിപ്പിക്കും. സംസ്ഥാന നേതൃത്വത്തിന്റെ നിർദ്ദേശത്തിന് പിന്നാലെയാണ് കണക്ക് അവതരിപ്പിക്കാനുള്ള തീരുമാനം.

താൻ എഴുതിയ പുസ്തകം പുറത്തിറങ്ങും മുൻപ് കണക്കുകൾ പുറത്തുവിടാൻ വി. കുഞ്ഞികൃഷ്ണൻ പാർട്ടി നേതൃത്വത്തെ വെല്ലുവിളിച്ചിരുന്നു. എന്നാൽ ഇത് ഔദ്യോഗികമായി സ്വീകരിക്കാതെയാണ് സി.പി.എം കണ്ണൂർ ജില്ലാ നേതൃത്വം ഇപ്പോൾ കണക്കുകൾ പുറത്തുവിടാൻ തീരുമാനിച്ചിരിക്കുന്നത്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത സുഹൃത്തുകൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: The DYFI has reportedly blocked a photo exhibition by artist Damu Sargam in Payyannur after he participated in a protest supporting ousted CPM leader V. Kunjikrishnan. This development comes amid ongoing tensions in the Payyannur CPM over allegations of fund misappropriation.

#PayyannurNews #CPM #DYFI #DamuSargam #VKunjikrishnan #KannurPolitics #FundControversy #KeralaPolitics #DhanarajFund