മധുര: (KVARTHA) തമിഴ്നാട്ടിലെ മധുരയിൽ നടക്കുന്ന സിപിഎം പാർട്ടി കോൺഗ്രസിൽ പ്രതിനിധികൾ ഫലസ്തീൻ ജനതയോട് ഐക്യദാർഢ്യം പ്രഖ്യാപിച്ചത് ശ്രദ്ധേയമായി. സമ്മേളനത്തിൽ പങ്കെടുത്ത പ്രതിനിധികൾ ഫലസ്തീന്റെ പോരാട്ടത്തിന്റെ പ്രതീകമായ കഫിയ ധരിച്ചെത്തിയത് ഐക്യദാർഢ്യത്തിന്റെ തീവ്രത വിളിച്ചോതുന്ന കാഴ്ചയായിരുന്നു. മുഖ്യമന്ത്രി പിണറായി വിജയൻ, പ്രകാശ് കാരാട്ട്, ബൃന്ദ കാരാട്ട്, എം എ ബേബി തുടങ്ങിയ പ്രമുഖ നേതാക്കളും കഫിയ ധരിച്ച് ഫലസ്തീന് പിന്തുണ അറിയിച്ചു. 

സയണിസത്തിനും സാമ്രാജ്യത്വത്തിനുമെതിരെ പ്രതിനിധികൾ മുദ്രാവാക്യങ്ങൾ മുഴക്കി. ഫലസ്തീനിൽ അടിയന്തിരമായി സമാധാനം പുനഃസ്ഥാപിക്കണമെന്ന് സിപിഎം പാർട്ടി കോൺഗ്രസ് പാസാക്കിയ പ്രമേയത്തിൽ ആവശ്യപ്പെട്ടു.

ജോർദാൻ നദി മുതൽ മെഡിറ്ററേനിയൻ കടൽ വരെയുള്ള ഫലസ്തീൻ സ്വതന്ത്രമാവുക തന്നെ ചെയ്യുമെന്ന് മുഖ്യമന്ത്രി പിണറായി വിജയൻ ഫേസ്ബുക്കിൽ കുറിച്ചു. ഇസ്രായേൽ എല്ലാ മാനുഷിക മൂല്യങ്ങളെയും അന്താരാഷ്ട്ര മനുഷ്യാവകാശ പ്രഖ്യാപനങ്ങളെയും ലംഘിച്ചുകൊണ്ട് ഹീനമായ അധിനിവേശം തുടരുകയാണെന്ന് മുഖ്യമന്ത്രി കുറ്റപ്പെടുത്തി. 

ഈ സാഹചര്യത്തിൽ ഫലസ്തീൻ ജനതയോടൊപ്പം അണിനിരക്കുന്നതിന് പകരം ഇസ്രായേലിനെ ന്യായീകരിക്കുന്ന കേന്ദ്രം ഭരിക്കുന്ന ബിജെപി സർക്കാരിന്റെ നിലപാട് സ്വാതന്ത്ര്യാനന്തര ഭാരതം പിന്തുടർന്നുപോന്ന നയങ്ങളിൽ നിന്നുള്ള വ്യതിചലനമാണെന്നും അദ്ദേഹം വിമർശിച്ചു.

പിണറായി വിജയന്റെ ഫേസ്ബുക് പോസ്റ്റിന്റെ പൂർണരൂപം:

സിപിഐഎം ഇരുപത്തിനാലാം പാർടി കോൺഗ്രസ് പ്രതിനിധികൾ ചെറുത്തുനില്‍പ്പിന്റെയും ഐക്യദാർഢ്യത്തിന്റെയും ചിഹ്നമായ കഫിയ അണിഞ്ഞു പലസ്തീന് ഐക്യദാർഢ്യം പ്രകടിപ്പിച്ചത് ആവേശകരമായ അനുഭവമായിരുന്നു. ഇസ്രായേൽ തുടരുന്ന വംശഹത്യക്കെതിരെ പലസ്തീൻ ജനതക്ക് ഐക്യദാർഢ്യം പ്രഖ്യാപിച്ചുകൊണ്ട് പ്രതിനിധി സമ്മേളനത്തിൽ പ്രമേയം പാസാക്കി. 

എല്ലാ മാനുഷിക മൂല്യങ്ങളും അന്താരാഷ്ട്ര മനുഷ്യാവകാശ പ്രഖ്യാപനങ്ങളും കാറ്റിൽ പറത്തിക്കൊണ്ട് ഹീനമായ അധിനിവേശവുമായി മുന്നോട്ടുപോവുകയാണ് ഇസ്രായേൽ. ഈ സാഹചര്യത്തിൽ പലസ്തീൻ ജനതയോടൊപ്പം അണിനിരക്കുന്നതിന് പകരം ഇസ്രായേലിനെ ന്യായീകരിക്കുകയാണ് കേന്ദ്രം ഭരിക്കുന്ന ബിജെപി സർക്കാർ. സ്വാതന്ത്ര്യാനന്തരം രാജ്യം തുടർന്നുപോന്ന നിലപാടിൽ വെള്ളം ചേർക്കുന്ന നടപടിയാണിത്. 

സമ്മേളനം പാസാക്കിയ പ്രമേയം പലസ്തീനിൽ അടിയന്തിരമായി സമാധാനം പുനഃസ്ഥാപിക്കണമെന്ന് ആവശ്യപ്പെട്ടു. ജോർദാൻ നദി മുതൽ മെഡിറ്ററേനിയൻ കടൽ വരെയുള്ള പലസ്തീൻ സ്വതന്ത്രമാവുക തന്നെ ചെയ്യും.

ഈ വാർത്തയെ കുറിച്ച് നിങ്ങളുടെ അഭിപ്രായങ്ങൾ രേഖപ്പെടുത്തുക.

Representatives at the CPM Party Congress in Madurai showed solidarity with Palestine by wearing keffiyehs. Chief Minister Pinarayi Vijayan strongly supported Palestine's freedom from the Jordan River to the Mediterranean Sea and criticized Israel's occupation and the Indian central government's stance.

#PalestineSolidarity #CPM #IndiaSupportsPalestine #PinarayiVijayan #PartyCongress #FreePalestine