പിണറായിയുടെയും എം വി ഗോവിന്ദൻ്റെയും ശൈലി കനത്ത തോൽവിക്കിടയാക്കി; സിപിഎം കണ്ണൂർ ജില്ലാ സെക്രട്ടറിയേറ്റിൽ അതിരൂക്ഷ വിമർശനം

ഭാമനാവത്ത് 

കണ്ണൂർ: (KVARTHA) മുൻ മുഖ്യമന്ത്രിയുടെയും സിപിഎം സംസ്ഥാന സെക്രട്ടറിയുടെയും തട്ടകമായ കണ്ണൂരിൽ നേതൃത്വത്തിനെതിരെ അതിരൂക്ഷ വിമർശനം. വെള്ളിയാഴ്ച ചേർന്ന സിപിഎം കണ്ണൂർ ജില്ലാ സെക്രട്ടറിയേറ്റ് തിരഞ്ഞെടുപ്പ് അവലോകന യോഗത്തിലാണ് പിണറായി വിജയനും എം വി ഗോവിന്ദനും എതിരെ രൂക്ഷമായ വിമർശനങ്ങളുയർന്നത്. 

ഭരണവിരുദ്ധ വികാരമല്ല, മറിച്ച് പിണറായി വിജയൻ്റെയും എം വി ഗോവിന്ദൻ്റെയും ശൈലിയാണ് ഇത്തവണ കനത്ത തിരിച്ചടിക്ക് കാരണമായതെന്ന് യോഗത്തിൽ അംഗങ്ങൾ അസന്ദിഗ്ധമായി ചൂണ്ടിക്കാട്ടി. സംസ്ഥാന സെക്രട്ടറി എം വി ഗോവിന്ദൻ പങ്കെടുത്ത കമ്മിറ്റിയിലായിരുന്നു നേതൃത്വത്തെ ഞെട്ടിച്ചുകൊണ്ടുള്ള ഈ പ്രതികരണങ്ങൾ ഉയർന്നത്.

അമിത ആത്മവിശ്വാസവും അണികളുടെ തിരുത്തലും

പയ്യന്നൂരിൽ പാർട്ടിക്കുണ്ടായ അമിത ആത്മവിശ്വാസവും തളിപ്പറമ്പിലെ സ്ഥാനാർഥി നിർണ്ണയ ശൈലിയും യോഗത്തിൽ രൂക്ഷമായി വിമർശിക്കപ്പെട്ടു. പയ്യന്നൂരിലെ അടിയൊഴുക്ക് മനസ്സിലാക്കാൻ ജില്ലാ നേതൃത്വത്തിന് കഴിഞ്ഞില്ല. വി കുഞ്ഞികൃഷ്ണനെ പാർട്ടി ചെറുതായി കണ്ടുവെന്നും വിമർശനമുയർന്നു. 

തളിപ്പറമ്പിലും ഞെട്ടിക്കുന്ന വോട്ട് ചോർച്ചയാണുണ്ടായത്. ഇവിടെയും അമിത ആത്മവിശ്വാസം തിരിച്ചടിയായി. പാർട്ടി തിരുത്തിയില്ലെങ്കിൽ അണികൾ തിരുത്തിക്കുമെന്ന് അനുഭവപ്പെട്ടതായി ചില അംഗങ്ങൾ വ്യക്തമാക്കി. ആന്തൂർ, മലപ്പട്ടം, മയ്യിൽ പോലുള്ള ശക്തമായ മേഖലകളിൽ കണ്ടത് ഇതാണെന്നും അവർ കൂട്ടിച്ചേർത്തു.

പിണറായിയുടെ ശൈലിക്കെതിരെ വിമർശനം

താൻ മാറില്ല എന്ന് ബോധ്യപ്പെടുത്തുന്ന രീതിയിലായിരുന്നു തിരഞ്ഞെടുപ്പ് സമയത്ത് പിണറായി വിജയൻ 'വീട്ടിൽ പോയി ചോദിക്ക്' എന്ന് പ്രതികരിച്ചത്. ഒരു പാർട്ടി പ്രവർത്തകൻ വിളിച്ചു ചോദിച്ചത് കേട്ടില്ലെന്ന് വെച്ചാൽ എന്തായിരുന്നു കുഴപ്പമെന്ന ചോദ്യവും യോഗത്തിൽ ഉയർന്നുവന്നു. 

തങ്ങളെ വിശ്വാസത്തിലെടുക്കാതെ മുൻപോട്ടു പോയ നേതൃത്വത്തെ അണികൾ തിരുത്തിയെന്ന് സെക്രട്ടറിയേറ്റ് അംഗങ്ങളിലൊരാൾ വി കുഞ്ഞികൃഷ്ണൻ്റെ പുസ്തകത്തിലെ തലവാചകം കടമെടുത്തുകൊണ്ട് തുറന്നടിച്ചു.

സ്ഥാനാർഥി നിർണ്ണയത്തിലെ പാളിച്ചകളും നേതാക്കളുടെ കൊഴിഞ്ഞുപോക്കും

ടി കെ ഗോവിന്ദൻ പാർട്ടി വിടുമെന്ന് നേരത്തെ ചില നേതാക്കൾക്ക് അറിയാമായിരുന്നു. നേതാക്കളെ സന്ദർശിച്ച് അദ്ദേഹം തൻ്റെ അതൃപ്തി വ്യക്തമാക്കിയിട്ടും തടഞ്ഞു നിർത്താൻ കഴിഞ്ഞില്ല. അയാൾ പോകുന്നെങ്കിൽ പോകട്ടെ എന്ന നിലപാടാണ് നേതൃത്വം സ്വീകരിച്ചത്. തളിപ്പറമ്പിൽ എൻ സുകന്യയുടെ പേര് കൂടി സ്ഥാനാർഥി പട്ടികയിലുണ്ടായിരുന്നു. 

എന്നാൽ ജില്ലാ സെക്രട്ടറിയും സെക്രട്ടറിയേറ്റ് അംഗവും സംസ്ഥാന സെക്രട്ടറിക്ക് കൈമാറിയ ലിസ്റ്റിൽ പി കെ ശ്യാമളയുടെ പേര് മാത്രമേ ഉണ്ടായിരുന്നുള്ളൂ. ഇത് പാർട്ടി അണികൾക്കിടയിൽ കടുത്ത ആശയക്കുഴപ്പവും അതൃപ്തിയും ഉണ്ടാക്കിയെന്ന് യോഗം വിലയിരുത്തി.

മണ്ഡലങ്ങളിലെ വോട്ട് ചോർച്ച

പയ്യന്നൂരിൽ ടി ഐ മധുസൂദനൻ ജയിക്കുമെന്ന് പാർട്ടി അമിതമായി വിശ്വസിച്ചു. കഴിഞ്ഞ തിരഞ്ഞെടുപ്പിൽ 50,000-ത്തിന് ജയിച്ച മണ്ഡലത്തിലാണ് ഇത്തവണ 7,000-ത്തിലേറെ വോട്ടുകൾക്ക് തോറ്റത്. ബിജെപിയുടെ 10,000 വോട്ട് മറിച്ചുവെന്ന് വാദിച്ചാലും ഈ കനത്ത തോൽവിയെ ഒരിക്കലും ന്യായീകരിക്കാനാവില്ലെന്ന് അംഗങ്ങൾ വ്യക്തമാക്കി.

ധർമ്മടത്ത് ആറാം റൗണ്ട് വരെ പിണറായി വിജയൻ പിന്നിലായത് പാർട്ടിയുടെ നെഞ്ചിടിപ്പ് കൂട്ടിയെന്ന് ഒരംഗം ചൂണ്ടിക്കാട്ടി. മട്ടന്നൂരും കല്ല്യാശ്ശേരിയും അഴീക്കോടും വോട്ടുകൾ ഗണ്യമായി കുറഞ്ഞത് ഗൗരവമായി പരിശോധിക്കണം. കണ്ണൂർ മണ്ഡലം നഷ്ടമായതിനൊപ്പം, കൂത്തുപറമ്പിൽ നേരിയ വ്യത്യാസത്തിനാണ് ആർജെഡി സ്ഥാനാർഥി ജയിച്ചുകയറിയതെന്നും അവലോകന യോഗത്തിൽ വിമർശനമുയർന്നു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: The CPM Kannur district secretariat witnessed severe criticism against the leadership styles of Pinarayi Vijayan and MV Govindan, holding them responsible for the heavy election defeat.

#CPMKerala #KannurPolitics #PinarayiVijayan #MVGovindan #KeralaPolitics #ElectionResults2026 #BreakingNews #KeralaNews #2026