ജനവികാരം അറിയാതെ പോയ നേതൃത്വത്തെ അണികൾ തിരുത്തി; സിപിഎം കണ്ണൂർ ജില്ലാ കമ്മിറ്റിയോഗത്തിൽ രൂക്ഷവിമർശനം

നവോദിത്ത് ബാബു 

കണ്ണൂർ: (KVARTHA) കഴിഞ്ഞ നിയമസഭാ തിരഞ്ഞെടുപ്പിലുണ്ടായ കനത്ത പരാജയം വിലയിരുത്തുന്നതിനായി ചേർന്ന സിപിഎം കണ്ണൂർ ജില്ലാ കമ്മിറ്റി യോഗത്തിൽ സംസ്ഥാന നേതൃത്വത്തിനെതിരെ അതിരൂക്ഷമായ വിമർശനം ഉയർന്നതായി പാർട്ടി വൃത്തങ്ങൾ സൂചിപ്പിക്കുന്നു. പാർട്ടി സംസ്ഥാന സെക്രട്ടറി എം വി ഗോവിന്ദൻ, പ്രതിപക്ഷ നേതാവ് പിണറായി വിജയൻ, കണ്ണൂർ ജില്ലാ സെക്രട്ടറി കെ കെ രാഗേഷ്, സംസ്ഥാന കമ്മിറ്റി അംഗം പി ശശി എന്നിവർക്കെതിരെയാണ് യോഗത്തിൽ പങ്കെടുത്ത ഭൂരിഭാഗം അംഗങ്ങളും കടുത്ത അതൃപ്തി രേഖപ്പെടുത്തിയത്.

നേതൃത്വത്തിൻ്റെ വീരാരാധനയ്ക്കെതിരെ ആഞ്ഞടിച്ച് അംഗങ്ങൾ

പാർട്ടിയിൽ ഇതുവരെ നിലനിന്നിരുന്ന ഭയത്തിൻ്റെ അന്തരീക്ഷം പൂർണ്ണമായും മാറ്റിവെച്ചാണ് കണ്ണൂർ ജില്ലാ കമ്മിറ്റിയിലെ ഭൂരിഭാഗം അംഗങ്ങളും സംസ്ഥാന നേതൃത്വത്തെ പ്രതിക്കൂട്ടിൽ നിർത്തിയത്. സംസ്ഥാന സെക്രട്ടറിയും പിബി അംഗവും ഇത്രമാത്രം പാർട്ടിക്കുള്ളിൽ ഒറ്റപ്പെട്ട ഒരു കാലം മുൻപുണ്ടായിട്ടില്ലെന്നാണ് യോഗത്തിൽ ഉയർന്ന വികാരം വ്യക്തമാക്കുന്നത്.

പിണറായി വിജയനെ മുൻപ് 'ഇരട്ടച്ചങ്കൻ' എന്ന് വിശേഷിപ്പിച്ച് വീരാരാധനയോടെ നടന്നിരുന്നവർ ഈ വമ്പൻ തോൽവിക്ക് ശേഷം 'ഓട്ടച്ചങ്കൻ' എന്ന് പറയുന്നതലത്തിലാണ് പ്രതികരിക്കുന്നത്. ജനങ്ങൾ പൂർണ്ണമായും തിരസ്കരിച്ച വ്യക്തികളെ വീണ്ടും പ്രതിപക്ഷ നേതാവാക്കരുതെന്ന ശക്തമായ വാദവും യോഗത്തിൽ ഉയർന്നു. കൊല്ലം, പത്തനംതിട്ട ജില്ലാ കമ്മിറ്റി യോഗങ്ങളിൽ ഉയർന്ന സമാനമായ ജനവികാരത്തിൻ്റെ ചുവടുപിടിച്ചാണ് നേതാക്കളുടെ സ്വന്തം തട്ടകമായ കണ്ണൂരിലും അണികൾ നിലപാട് കടുപ്പിച്ചത്.

എം എ ബേബിയുടെ പ്രസ്താവനയ്ക്കെതിരെ ചോദ്യങ്ങൾ

ഭരണവിരുദ്ധ വികാരം സംസ്ഥാനത്തില്ലെന്നും തിരഞ്ഞെടുപ്പിൽ പിണറായി വിരുദ്ധമായി യാതൊന്നും സംഭവിച്ചിട്ടില്ലെന്നുമുള്ള അഖിലേന്ത്യാ നേതാവ് എം എ ബേബിയുടെ പ്രസ്താവനയെ അംഗങ്ങൾ യോഗത്തിൽ ശക്തമായി ചോദ്യം ചെയ്തു.

കൂട്ടായ നേതൃത്വമാണ് തിരഞ്ഞെടുപ്പിനെ നേരിട്ടതെന്നും അതുകൊണ്ട് പരാജയത്തിൻ്റെ ഉത്തരവാദിത്തം മുഖ്യമന്ത്രിക്ക് മാത്രമായി നൽകാനാകില്ലെന്നുമുള്ള ന്യായീകരണങ്ങൾ പാർട്ടി വൃത്തങ്ങളിൽ കടുത്ത അരോചകമുണ്ടാക്കുന്നുണ്ടെന്ന് ചില അംഗങ്ങൾ ചൂണ്ടിക്കാട്ടി.

മുഖ്യമന്ത്രിയുടെ ഏകാധിപത്യ ശൈലി ജനങ്ങൾക്കിടയിൽ വലിയ അവമതിപ്പുണ്ടാക്കിയെന്നും തോൽവിയെക്കുറിച്ച് വസ്തുതാവിരുദ്ധമായ പ്രസ്താവനകൾ നടത്തുന്നത് ഇനിയെങ്കിലും അവസാനിപ്പിച്ച് കൃത്യമായ ആത്മപരിശോധനയ്ക്ക് നേതാക്കൾ തയ്യാറാകണമെന്നും ആവശ്യമുയർന്നു.

സംസ്ഥാന സെക്രട്ടറിയുടെ ശരീരഭാഷയ്ക്ക് കടുത്ത വിമർശനം

പാർട്ടി സംസ്ഥാന സെക്രട്ടറി എം വി ഗോവിന്ദൻ മാധ്യമങ്ങളെ കാണുമ്പോൾ ഉപയോഗിക്കുന്ന ധാർഷ്ട്യം നിറഞ്ഞ വാക്കുകളും അദ്ദേഹത്തിൻ്റെ ശരീരഭാഷയും സാധാരണക്കാരായ പ്രവർത്തകരെയും അനുഭാവികളെയും പാർട്ടിയിൽ നിന്നും അകറ്റാൻ കാരണമായതായി യോഗത്തിൽ വിമർശനമുയർന്നു.

പാർട്ടി ഗ്രാമങ്ങളിൽ ജനങ്ങൾക്കിടയിലുണ്ടായ നിശബ്ദമായ അടിയൊഴുക്കുകൾ മുൻകൂട്ടി കണ്ടെത്താൻ ഇവിടുത്തെ രഹസ്യാന്വേഷണ സംവിധാനങ്ങൾക്കോ നേതൃത്വത്തിനോ സാധിച്ചില്ല. പാർട്ടി കോട്ടകളായ പയ്യന്നൂരിലും തളിപ്പറമ്പിലും തൃക്കരിപ്പൂരിലും കണ്ടത് നേതൃത്വം തിരുത്താത്തതിനെ തുടർന്ന് അണികൾ നേരിട്ട് തിരുത്തിച്ച കാഴ്ചയാണെന്ന് ചിലർ ഓർമ്മിപ്പിച്ചു.

തനിക്ക് നേരെ അതിനിശിതമായ വിമർശനങ്ങൾ ഉയർന്നപ്പോഴും സംസ്ഥാന സെക്രട്ടറി എം വി ഗോവിന്ദൻ ഇടപെടാതെ നിശബ്ദനായി കാര്യങ്ങൾ കേട്ടിരിക്കുകയായിരുന്നു. യോഗത്തിൽ നേതാക്കളായ എം വി ജയരാജൻ, പി കെ ശ്രീമതി, ഇ പി ജയരാജൻ, പി ജയരാജൻ, പി ശശി, എ എൻ ഷംസീർ തുടങ്ങിയ പ്രമുഖർ പങ്കെടുത്തു.

സിപിഎം കണ്ണൂർ ജില്ലാ കമ്മിറ്റിയിൽ ഉയർന്ന ഈ അഭൂതപൂർവ്വമായ വിമർശനങ്ങളെക്കുറിച്ചുള്ള നിങ്ങളുടെ അഭിപ്രായങ്ങൾ താഴെ ഫേസ്ബുക്ക് പോസ്റ്റിന് താഴെ കമന്റായി രേഖപ്പെടുത്തുക. രാഷ്ട്രീയരംഗത്തെ പുതിയ വാർത്തകൾ അറിയാൻ ഞങ്ങളുടെ ഫേസ്ബുക്ക് പേജും വാട്സാപ്പ് ചാനലും ഫോളോ ചെയ്യുക. ഈ വാർത്ത സുഹൃത്തുക്കളിലേക്ക് ഷെയർ ചെയ്യൂ.

Article Summary: Internal rebellion intensifies within Kerala CPM as the Kannur district committee heavily criticizes top leadership, including Pinarayi Vijayan and MV Govindan, over the recent election debacle.

#CPMKerala #KannurCPM #PinarayiVijayan #MVGovindan #KeralaPolitics #PoliticalCrisis