മധുസൂദനനോടുള്ള പക; വി കുഞ്ഞികൃഷ്ണൻ പാർട്ടി ശത്രുക്കളുടെ കോടാലിക്കൈയായി മാറിയെന്ന് കണ്ണൂർ ജില്ലാ സെക്രട്ടറി

കണ്ണൂർ: (KVARTHA) പയ്യന്നൂരിൽ ധനരാജ് രക്തസാക്ഷി ഫണ്ട് തട്ടിപ്പ് ഉൾപ്പെടെയുള്ള ആരോപണങ്ങൾ ഉന്നയിച്ച കണ്ണൂർ ജില്ലാ കമ്മിറ്റിയംഗം വി. കുഞ്ഞികൃഷ്ണനെ സി.പി.എം ജില്ലാ കമ്മിറ്റിയംഗത്വത്തിൽ നിന്നും പാർട്ടിയുടെ പ്രാഥമിക അംഗത്വത്തിൽ നിന്നും പുറത്താക്കി. 

സി.പി.എം കണ്ണൂർ ജില്ലാ സെക്രട്ടറി കെ.കെ. രാഗേഷ് കണ്ണൂർ ജില്ലാ കമ്മിറ്റി ഓഫീസായ അഴീക്കോടൻ മന്ദിരത്തിൽ നടത്തിയ വാർത്താ സമ്മേളനത്തിലാണ് ഇക്കാര്യം അറിയിച്ചത്. പാർട്ടിയെ വഞ്ചിച്ചതിനാണ് പ്രാഥമിക അംഗത്വത്തിൽ നിന്ന് വി. കുഞ്ഞികൃഷ്ണനെ പുറത്താക്കിയത്. 

കുഞ്ഞികൃഷ്ണൻ പാർട്ടി ശത്രുക്കളുടെ കോടാലിക്കൈയായി മാറിയെന്ന് കെ.കെ. രാഗേഷ് ആരോപിച്ചു. കുഞ്ഞികൃഷ്ണൻ ഉത്തമനായ കമ്മ്യൂണിസ്റ്റ് അല്ലെന്നും പാർട്ടിയെ വഞ്ചിച്ച ആളാണെന്നും രാഗേഷ് കുറ്റപ്പെടുത്തി.

തിരഞ്ഞെടുപ്പ് മുന്നിൽ കണ്ടുള്ള നീക്കം 

2022 ഏപ്രിൽ മാസം ജില്ലാ കമ്മിറ്റി തീരുമാനമെടുത്ത കാര്യങ്ങളാണ് കുഞ്ഞികൃഷ്ണൻ വീണ്ടും ആരോപിച്ചത്. മാധ്യമങ്ങൾക്ക് നൽകിയ അഭിമുഖത്തോടെ അദ്ദേഹം പാർട്ടി ശത്രുക്കളുടെ കോടാലിക്കൈയായി മാറി. 

തിരഞ്ഞെടുപ്പ് മുന്നിൽ കണ്ട് അഭിമുഖത്തിന് സമയം തിരഞ്ഞെടുത്തത് 'സെറ്റ് ഇട്ട് തയ്യാറാക്കിയ തിരക്കഥ' പോലെയാണ്. കുഞ്ഞികൃഷ്ണൻ പാർട്ടിയെ പിന്നിൽ നിന്ന് കുത്തി. ഇതിനെ നേരിടാൻ കെൽപ്പുള്ള പാർട്ടിയാണ് സി.പി.എം എന്നും രാഗേഷ് പറഞ്ഞു.

മധുസൂദനനോടുള്ള പക 

ടി.ഐ. മധുസൂദനനെ വ്യക്തിപരമായി അധിക്ഷേപിക്കാനാണ് കുഞ്ഞികൃഷ്ണൻ ശ്രമിച്ചത്. മധുസൂദനനെ മനഃപൂർവം താറടിക്കാനുള്ള ശ്രമം എന്നാണ് അന്വേഷണ കമ്മീഷൻ റിപ്പോർട്ടിലുള്ളത്. അത് കുഞ്ഞികൃഷ്ണനും അംഗീകരിച്ചതാണ്. 

പയ്യന്നൂരിലെ സഹകരണ സ്ഥാപനത്തിന്റെ ഭാരവാഹി അല്ലാതിരുന്നിട്ടും ഭൂമി ഇടപാടിൽ മധുസൂദനനെ ലക്ഷ്യം വെച്ചു. മധുവിനോടുള്ള പകയാണ് ഇപ്പോൾ ആരോപണം ഉന്നയിക്കാൻ കാരണം. വൈരനിര്യാതന ബുദ്ധിയോടെയാണ് കുഞ്ഞികൃഷ്ണൻ പ്രവർത്തിക്കുന്നത്.

വാർത്ത ചോർത്തൽ 

വാർത്ത ചോർച്ച സംബന്ധിച്ച് പാർട്ടിക്ക് കൃത്യമായ തെളിവുണ്ട്. വാർത്ത ചോർത്തിയെന്ന കുറ്റസമ്മതം കുഞ്ഞികൃഷ്ണന്റെ വാക്കിൽ തന്നെ ഉണ്ടായിട്ടുണ്ട്. കമ്മ്യൂണിസ്റ്റ് എന്ന പദത്തിന്റെ പരിസരത്തു നിൽക്കാൻ പറ്റുന്ന പണിയാണോ ഇതെന്നും രാഗേഷ് ചോദിച്ചു.

ധനരാജ് രക്തസാക്ഷി ഫണ്ട് 

കുടുംബത്തെ സഹായിക്കുക, വീട് വെച്ചു നൽകുക, കേസുകൾ കൈകാര്യം ചെയ്യുക തുടങ്ങിയ ആവശ്യങ്ങൾക്ക് വേണ്ടിയാണ് ഫണ്ട് ഉണ്ടാക്കിയത്. ഇതിലൊന്നും പാർട്ടിക്ക് ധനം നഷ്ടപ്പെട്ടിട്ടില്ല. വരവ് ചെലവ് കണക്ക് അവതരിപ്പിക്കുന്നതിൽ നാലു വർഷം താമസം ഉണ്ടായി. 2022-ൽ ഇക്കാര്യത്തിൽ മധുസൂദനൻ ഉൾപ്പെടെയുള്ള ആളുകൾക്ക് എതിരെ നടപടി എടുത്തിട്ടുണ്ടെന്നും കെ.കെ. രാഗേഷ് പറഞ്ഞു.

രസീത് അടിച്ചതിൽ അക്ഷരത്തെറ്റ് ഉണ്ടായി. ആറു ബുക്കുകളിൽ പിശക് ഉണ്ടായി. അത് നശിപ്പിക്കുന്നതിൽ ജാഗ്രതകുറവുണ്ടായി. എന്നാൽ ഈ രസീത് ഉപയോഗിച്ച് പണം പിരിച്ചത് മധുസൂദനൻ അല്ല. ചില ബുക്കുകൾ നഷ്ടപ്പെട്ടു പോയിട്ടുണ്ടെന്നും രാഗേഷ് സമ്മതിച്ചു. ഇതിന് അന്നത്തെ ഓഫീസ് സെക്രട്ടറിക്കെതിരെ പാർട്ടി അച്ചടക്ക നടപടിയുടെ ഭാഗമായി സസ്പെൻഷൻ നടപടി സ്വീകരിച്ചിട്ടുണ്ട്.

വിഭാഗീയത

കുഞ്ഞികൃഷ്ണൻ ഉന്നയിച്ച ആരോപണങ്ങൾ എല്ലാം പാർട്ടി 2022-ൽ ചർച്ച ചെയ്‌ത്‌ തള്ളിയതാണ്. പയ്യന്നൂരിലെ വിഭാഗീയ പ്രവർത്തനമാണിതെന്നാണ് അന്വേഷണ കമ്മീഷൻ കണ്ടെത്തിയത്. മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ സാന്നിധ്യത്തിൽ പയ്യന്നൂരിലെ വിഷയം ചർച്ച ചെയ്യാൻ ജില്ലാ കമ്മിറ്റി യോഗം ചേർന്നിരുന്നു. 

എല്ലാവരെയും ചേർത്തു നിർത്തിക്കൊണ്ടു മുൻപോട്ടു പോകാൻ കഴിയാത്തതിനാലാണ് അന്ന് കുഞ്ഞികൃഷ്ണനെ ഏരിയാ സെക്രട്ടറി സ്ഥാനത്തു നിന്നും നീക്കിയതെന്നും, അല്ലാതെ പാർട്ടിയിൽ ആരോപണം ഉന്നയിച്ചതിനല്ലെന്നും കെ.കെ. രാഗേഷ് വ്യക്തമാക്കി.

ഈ വാർത്ത സുഹൃത്തുകൾക്കും കുടുംബാംഗങ്ങൾക്കും ഷെയർ ചെയ്യൂ. നിങ്ങളുടെ അഭിപ്രായം കമന്റായി രേഖപ്പെടുത്തൂ.

Article Summary: CPM Kannur District Secretary K.K. Ragesh announced the expulsion of V. Kunhikrishnan from the party's primary membership. Ragesh accused Kunhikrishnan of being a "backstabber" and acting with a personal vendetta against T.I. Madhusoodanan, aiming to damage the party during election time.

#CPM #Kannur #KKRagesh #VKunhikrishnan #Payyannur #KeralaPolitics #TIMadhusoodanan