വി കുഞ്ഞികൃഷ്ണന്റെ പുസ്തകത്തിന് പിന്നിൽ ആർഎംപി ഗൂഢാലോചനയെന്ന് സിപിഎം; കെ സി ഉമേഷ് ബാബുവിനെതിരെ ആരോപണം

കണ്ണൂർ: (KVARTHA) മുൻ സി.പി.എം ജില്ലാ കമ്മിറ്റിയംഗം വി. കുഞ്ഞികൃഷ്ണന്റെ വിവാദ പുസ്തകത്തിന് പിന്നിൽ ഗൂഢാലോചനയുണ്ടെന്ന ആരോപണവുമായി സി.പി.എം. പുസ്തകത്തിന്റെ വിവിധ പതിപ്പുകളിലെ വിലാസങ്ങളിലുള്ള വ്യത്യാസം ചൂണ്ടിക്കാട്ടിയാണ് ഇത് സി.പി.എം വിരുദ്ധ കൂട്ടായ്മയാണെന്ന് പാർട്ടി ആരോപിക്കുന്നത്. 

പുസ്തകത്തിന്റെ പി.ഡി.എഫ് പതിപ്പിൽ കവിയും രാഷ്ട്രീയ നിരീക്ഷകനുമായ കെ.സി. ഉമേഷ് ബാബുവിന്റെ മേൽവിലാസമാണ് ചേർത്തിരിക്കുന്നത്. സി.പി.എം വിരുദ്ധ ചാനൽ ചർച്ചകളിലെ സ്ഥിരം സാന്നിധ്യമാണ് ഉമേഷ് ബാബു.

വി. കുഞ്ഞികൃഷ്ണന്റെ ‘നേതൃത്വത്തെ അണികൾ തിരുത്തട്ടെ’ എന്ന പുസ്തകത്തിൽ എഴുത്തുകാരന്റെ രണ്ട് മേൽവിലാസങ്ങളാണ് നൽകിയിരിക്കുന്നത്. പി.ഡി.എഫ് പതിപ്പിൽ കെ.സി. ഉമേഷ് ബാബുവിന്റെ വിലാസവും പ്രിന്റ് എഡിഷനിൽ കുഞ്ഞികൃഷ്ണന്റെ പയ്യന്നൂർ കരിവെള്ളൂരിലെ വിലാസവുമാണുള്ളത്.

വി. കുഞ്ഞികൃഷ്ണന് വേണ്ടി കെ.സി. ഉമേഷ് ബാബുവാണോ പുസ്തകം എഴുതിയതെന്ന ചോദ്യമാണ് സി.പി.എം ഇപ്പോൾ ഉയർത്തുന്നത്. പ്രസാധകരെ പുസ്തകം ഏൽപ്പിച്ചത് ഉമേഷ് ബാബുവാണെന്ന് പാർട്ടി കേന്ദ്രങ്ങൾ ചൂണ്ടിക്കാട്ടുന്നു. പുസ്തക പ്രകാശന ചടങ്ങിൽ പങ്കെടുത്തവർ പാർട്ടിയിൽനിന്ന് പുറത്താക്കപ്പെട്ടവരും ആർ.എം.പിക്കാരും ഉൾപ്പെടെയുള്ള സി.പി.എം വിരുദ്ധരായിരുന്നുവെന്നും ആരോപണമുണ്ട്.

പുറത്തുവരുന്ന തെളിവുകൾ സി.പി.എം വിരുദ്ധ കൂട്ടായ്മയെ ശരിവയ്ക്കുന്നതാണെന്ന് പാർട്ടി കരുതുന്നു. പ്രിന്റഡ് കോപ്പി പ്രകാശനവേളയിൽ തന്നെ വൻതോതിൽ വിറ്റഴിക്കപ്പെട്ടിരുന്നു. സി.പി.എം എതിർപ്പ് മറികടന്ന് വലിയ ജനാവലിയാണ് ചടങ്ങിലെത്തിയത്. എന്നാൽ എത്തിയത് ആർ.എം.പിക്കാരാണെന്ന് സി.പി.എം കണ്ണൂർ ജില്ലാ സെക്രട്ടറി കെ.കെ. രാഗേഷ് വാർത്താസമ്മേളനത്തിൽ ആരോപിച്ചിരുന്നു.

സി.പി.എം വിട്ട് താൻ മറ്റെങ്ങും പോകില്ലെന്ന നിലപാടാണ് വി. കുഞ്ഞികൃഷ്ണൻ തുടക്കം മുതൽ സ്വീകരിച്ചിരുന്നത്. ഇതിനിടയിലാണ് ആർ.എം.പിയുമായി അടുപ്പം പുലർത്തുന്ന കെ.സി. ഉമേഷ് ബാബു പുസ്തകത്തിന് പിന്നിൽ പ്രവർത്തിച്ചെന്ന ആരോപണം ഉയരുന്നത്. 

വി.എസ്. അച്യുതാനന്ദന് സമർപ്പിച്ച പുസ്തകം അദ്ദേഹത്തിന്റെ ഐ.ടി ഉപദേഷ്ടാവായിരുന്ന ജോസഫ് സി. മാത്യുവാണ് എം.എൻ. വിജയന്റെ മകൻ വി.എസ്. അനിൽകുമാറിന് നൽകി പ്രകാശനം ചെയ്തത്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: CPM Kannur leadership alleges RMP conspiracy behind V Kunjikrishnan's book, citing KC Umesh Babu's address in the PDF version.

#KannurPolitics #CPIM #VKunjikrishnan #RMP #KCUmeshBabu #Payyannur #PoliticalControversy #KVARTHA