കണ്ണൂർ ഉൾപ്പെടെയുള്ള ജില്ലകളിൽ സിപിഎമ്മിൽ അഴിച്ചുപണിക്ക് സാധ്യത; പയ്യന്നൂരിലെയും തളിപ്പറമ്പിലെയും തിരിച്ചടിയിൽ ജില്ലാ നേതൃത്വത്തിനെതിരെ കേന്ദ്ര കമ്മിറ്റി

കണ്ണൂർ: (KVARTHA) സംഘടനാ പ്രശ്നങ്ങൾ നിലനിൽക്കുന്ന ജില്ലകളിലെ നേതൃനിരയിൽ അഴിച്ചുപണിയുമായി സിപിഎം. കേന്ദ്ര നേതൃത്വത്തിൻ്റെ നിർദേശപ്രകാരമാണ് സംസ്ഥാന സെക്രട്ടറിയേറ്റ് വിപുലീകൃത ജില്ലാ കമ്മിറ്റി യോഗങ്ങൾ വിളിച്ചുചേർത്ത് അഴിച്ചുപണിക്കൊരുങ്ങുന്നത്. ഇതിൽ കണ്ണൂരിൽ ഉൾപ്പെടെയുള്ള ജില്ലകളിൽ സംഘടനാ തലത്തിൽ തന്നെ മാറ്റമുണ്ടാകുമെന്നാണ് ലഭിക്കുന്ന സൂചന.

കണ്ണൂരിൽ നേതൃമാറ്റത്തിന് സാധ്യത

പാർട്ടിയുടെ ശക്തികേന്ദ്രങ്ങളായ പയ്യന്നൂർ, തളിപ്പറമ്പ് മണ്ഡലങ്ങളിലേറ്റ തിരിച്ചടിക്ക് പരിഹാരം കണ്ടേതീരൂവെന്ന നിലപാടിലാണ് സിപിഎം കേന്ദ്ര നേതൃത്വം. ഈ മണ്ഡലങ്ങളിലെ സ്ഥാനാർഥി നിർണയത്തിൽ ഗുരുതര വീഴ്ചയുണ്ടായതിൻ്റെ ഉത്തരവാദിത്തം ജില്ലാ നേതൃത്വത്തിനാണെന്നാണ് കേന്ദ്ര കമ്മിറ്റിയുടെ വിലയിരുത്തൽ. അതിനാൽ കണ്ണൂർ ജില്ലാ സെക്രട്ടറി കെകെ രാഗേഷിനെ മാറ്റണമെന്ന ആവശ്യം പാർട്ടിയിൽ ഉയർന്നുകഴിഞ്ഞിട്ടുണ്ട്.

എന്നാൽ ഈ കാര്യത്തിൽ പിണറായി പക്ഷത്തിൻ്റെ നിലപാട് നിർണായകമാകും. തൻ്റെ അതീവ വിശ്വസ്തനായ കെകെ രാഗേഷിനെ കൈവെടിയാതിരിക്കാൻ പിണറായി വിജയനും അദ്ദേഹത്തെ അനുകൂലിക്കുന്നവരും ശ്രമിച്ചേക്കും. ഇനി അഥവാ കെകെ രാഗേഷ് മാറിയാൽ എം പ്രകാശൻ മാസ്റ്റർ, ടിവി രാജേഷ് എന്നിവർക്കാണ് ജില്ലാ സെക്രട്ടറി സ്ഥാനത്തേക്ക് സാധ്യത കൽപ്പിക്കപ്പെടുന്നത്.

മറ്റ് ജില്ലകളിലും പുനഃസംഘടന

കണ്ണൂർ കൂടാതെ കൊല്ലം, പത്തനംതിട്ട, കോട്ടയം, പാലക്കാട്, തിരുവനന്തപുരം എന്നീ ജില്ലകളിലും പുനഃസംഘടനയുണ്ടാകുമെന്നാണ് റിപ്പോർട്ടുകൾ. എംഎൽഎയായ വി ജോയി തിരുവനന്തപുരം ജില്ലാ സെക്രട്ടറിയായി തുടരുന്നതിൽ വിപുലീകൃത സംസ്ഥാന കമ്മിറ്റിയിൽ കടുത്ത വിമർശനം ഉയർന്നിരുന്നു.

നേതൃത്വത്തിന് മുന്നിൽ വെല്ലുവിളികൾ

വരാനിരിക്കുന്ന വിപുലീകൃത ജില്ലാ കമ്മിറ്റി യോഗങ്ങളിൽ കടുത്ത വിമർശനങ്ങൾ സംസ്ഥാന നേതൃത്വം പ്രതീക്ഷിക്കുന്നുണ്ട്. അതുകൊണ്ടുതന്നെ യോഗങ്ങളിലെ തുറന്നുപറച്ചിലുകളുടെ സാരാംശം ഉൾക്കൊണ്ട് അടിമുടി മാറ്റങ്ങൾ വരുത്തുകയല്ലാതെ നേതൃത്വത്തിന് മുൻപിൽ മറ്റ് മാർഗങ്ങളൊന്നും ഇല്ലാതായിരിക്കുകയാണ്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Due to organizational issues and electoral setbacks, CPI(M) is planning major restructuring in several Kerala districts including Kannur.

#Kvartha #CPIM #KannurPolitics #KeralaPolitics #KKRagesh #PinarayiVijayan #MalayalamNews #CPIMKerala #AmmuNews