കൊച്ചി: (KVARTHA) മഞ്ചേശ്വരം തിരഞ്ഞെടുപ്പ് കോഴക്കേസിൽ കുറ്റവിമുക്തനാക്കിയ കെ സുരേന്ദ്രന് ഹൈകോടതിയിൽ തിരിച്ചടി. കാസർകോട് സെഷൻസ് കോടതിയുടെ വിധി ഹൈകോടതി സ്റ്റേ ചെയ്തിരിക്കുകയാണ്. കാസർകോട് സെഷൻസ് കോടതിയുടെ ഉത്തരവ് റദ്ദാക്കണമെന്ന് ആവശ്യപ്പെട്ട് സംസ്ഥാന സർക്കാർ നല്‍കിയ പുനഃപരിശോധനാ ഹർജിയിലാണ് നടപടി. 

പ്രോസിക്യൂഷൻ സാക്ഷികളുടെ മൊഴികളേക്കാൾ പ്രതിഭാഗം സമർപ്പിച്ച രേഖകൾക്കാണ് സെഷൻസ് കോടതി പ്രാധാന്യം നൽകിയെന്നും വിചാരണ നടപടികൾക്ക് മുമ്പേ തന്നെ കേസ് അവസാനിപ്പിച്ചെന്നുമായിരുന്നു സർക്കാർ ഹർജിയിൽ ആരോപിച്ചത്. മൊഴികളില്‍ പൊരുത്തക്കേടുണ്ടെങ്കില്‍ സാക്ഷിക്ക് അത് വിചാരണകോടതിയില്‍ വിശദീകരിക്കാവുന്നതാണെന്നും അതിനുള്ള അവസരം നല്‍കിയില്ലെന്നും ഹർജിയിലുണ്ടായിരുന്നു.

കേസിന്റെ പശ്ചാത്തലം

2021ലെ നിയമസഭ തിരഞ്ഞെടുപ്പിൽ മഞ്ചേശ്വരം മണ്ഡലത്തിൽ മത്സരിച്ച കെ സുരേന്ദ്രന്റെ എതിരാളിയായി ബി.എസ്.പിയിലെ കെ സുന്ദര പത്രിക സമർപ്പിച്ചിരുന്നു. ഈ പത്രിക പിൻവലിക്കാൻ സുരേന്ദ്രന്റെ അനുയായികൾ സുന്ദരയെ ഭീഷണിപ്പെടുത്തിയെന്നും രണ്ടരലക്ഷം രൂപയും 8,300 രൂപ വിലയുള്ള മൊബൈല്‍ ഫോണും കോഴ നല്‍കി അനുനയിപ്പിച്ച്‌ പത്രിക പിൻവലിപ്പിച്ചതായും ആരോപിക്കുന്നു. ബദിയടുക്ക പൊലീസ് ഇക്കാര്യത്തിൽ കേസെടുത്തിരുന്നു.

കോടതിയുടെ വിധി

കാസർകോട് സെഷൻസ് കോടതി ഈ വർഷം ആദ്യം കെ സുരേന്ദ്രൻ ഉൾപ്പെടെയുള്ള എല്ലാ പ്രതികളെയും കുറ്റവിമുക്തരാക്കിയിരുന്നു. കെ സുരേന്ദ്രൻ നല്‍കിയ വിടുതല്‍ ഹർജി പരിഗണിച്ചായിരുന്നു ഇത്. 'കേസ് കെട്ടിച്ചമച്ചതാണെന്നും പരാതിയും അന്വേഷണവും അന്തിമ റിപ്പോർട്ടും നിയമാനുസൃതമല്ല.’ എന്ന പ്രതിഭാഗത്തിന്റെ വാദം കോടതി അംഗീകരിക്കുകയായിരുന്നു.

സെഷൻസ് കോടതിയുടെ ഈ വിധിക്കെതിരെയാണ് സംസ്ഥാന സർക്കാർ ഹൈകോടതിയെ സമീപിച്ചത്. പ്രോസിക്യൂഷൻ സാക്ഷികളുടെ മൊഴികളെ അവഗണിച്ച് പ്രതിഭാഗത്തിന്റെ വാദങ്ങൾ മാത്രം പരിഗണിച്ചെന്നും വിചാരണ നടപടികൾക്ക് വേണ്ടത്ര അവസരം നൽകിയില്ലെന്നും സർക്കാർ വാദിച്ചു. ഈ വാദങ്ങൾ പരിഗണിച്ച ഹൈകോടതി സെഷൻസ് കോടതിയുടെ വിധി സ്റ്റേ ചെയ്യുകയായിരുന്നു. ഇതോടെ കേസിന്റെ തുടർ നടപടികൾ ഹൈകോടതിയിലേക്ക് മാറി.

#KSurendran #BriberyCase #HighCourt #MangaloreElections #KeralaPolitics #JudicialDecision