മട്ടന്നൂർ സീറ്റ് കോൺഗ്രസ് ഏറ്റെടുക്കുന്നു; ഫർസീൻ മജീദ് യുഡിഎഫ് സ്ഥാനാർത്ഥിയായേക്കും

കണ്ണൂർ: (KVARTHA) സി.പി.എമ്മിന്റെ ഉറച്ച മണ്ഡലങ്ങളിലൊന്നായ മട്ടന്നൂരിൽ കടുത്ത മത്സരം കാഴ്ചവയ്ക്കാൻ കോൺഗ്രസ് ഒരുങ്ങുന്നു. മട്ടന്നൂർ നിയമസഭാ സീറ്റ് ആർഎസ്പിയിൽ നിന്ന് ഏറ്റെടുക്കാൻ കോൺഗ്രസ് നീക്കം ആരംഭിച്ചു. കൈപ്പത്തി ചിഹ്നത്തിൽ സ്ഥാനാർത്ഥി വേണമെന്ന് ആവശ്യപ്പെട്ട് മട്ടന്നൂർ മണ്ഡലം ബ്ലോക്ക് കമ്മിറ്റി ഡിസിസിക്ക് കത്തുനൽകി.

ഈ ആവശ്യം ഉന്നയിച്ച് കെപിസിസി അധ്യക്ഷൻ കെ സുധാകരനും ഭാരവാഹികൾക്കും മട്ടന്നൂർ ബ്ലോക്ക് കമ്മിറ്റി ശുപാർശ കൈമാറിക്കഴിഞ്ഞു. ലോക്‌സഭാ, തദ്ദേശ തിരഞ്ഞെടുപ്പുകളിലെ മികച്ച പ്രകടനം ചൂണ്ടിക്കാട്ടിയാണ് മണ്ഡലം കോൺഗ്രസ് പ്രാദേശിക ഘടകം ഈ ആവശ്യവുമായി രംഗത്തെത്തിയത്. കോൺഗ്രസ് സ്ഥാനാർത്ഥി വന്നാൽ സിപിഎമ്മിന് കടുത്ത മത്സരം നൽകാൻ കഴിയുമെന്ന് നേതൃത്വം പ്രതീക്ഷിക്കുന്നു.

കഴിഞ്ഞ തവണ കെ കെ ശൈലജ സംസ്ഥാനത്തെ ഏറ്റവും ഉയർന്ന ഭൂരിപക്ഷത്തിലാണ് മട്ടന്നൂർ മണ്ഡലത്തിൽ നിന്ന് വിജയിച്ചത്. 62,000 വോട്ടിന്റെ ഭൂരിപക്ഷത്തിന് ജയിച്ച ശൈലജ വീണ്ടും മത്സരിക്കാൻ എത്തുകയാണെങ്കിൽ മികച്ച പോരാട്ടം സമ്മാനിക്കാൻ താൻ തയ്യാറാണെന്ന് യൂത്ത് കോൺഗ്രസ് നേതാവ് ഫർസീൻ മജീദ് പ്രതികരിച്ചു. സീറ്റ് ഏറ്റെടുത്താൽ ഫർസീന് പുറമെ രാജീവ് എളയാവൂർ, ചന്ദ്രൻ തില്ലങ്കേരി എന്നീ പേരുകളും കോൺഗ്രസിന്റെ പരിഗണനയിലുണ്ട്.

അതേസമയം മട്ടന്നൂർ സീറ്റ് വേണ്ടെന്ന ആർഎസ്പി നിലപാടും കോൺഗ്രസിന് അനുകൂലമാണ്. മത്സരിക്കാൻ അനുയോജ്യനായ സ്ഥാനാർത്ഥിയെ കണ്ടെത്താനാകാത്തതാണ് ആർഎസ്പി നേരിടുന്ന പ്രതിസന്ധി. കഴിഞ്ഞ നിയമസഭാ തിരഞ്ഞെടുപ്പിൽ ആർഎസ്പിക്ക് സീറ്റ് നൽകിയതിൽ പ്രതിഷേധിച്ച് കോൺഗ്രസിലെ ഒരു വിഭാഗം വിട്ടുനിന്നിരുന്നു. 

എന്നാൽ മട്ടന്നൂരിൽ കെ കെ ശൈലജ മാറിനിൽക്കുകയാണെങ്കിൽ ഡിവൈഎഫ്ഐ സംസ്ഥാന സെക്രട്ടറി വി കെ സനോജ്, സിപിഎം കണ്ണൂർ ജില്ലാ സെക്രട്ടേറിയറ്റംഗം പി പുരുഷോത്തമൻ എന്നിവർക്കും എൽഡിഎഫ് സ്ഥാനാർത്ഥി പട്ടികയിൽ സാധ്യതയുണ്ട്.

മട്ടന്നൂരിലെ രാഷ്ട്രീയ മാറ്റത്തെക്കുറിച്ചുള്ള ഈ വാർത്ത സുഹൃത്തുക്കൾക്കും ഷെയർ ചെയ്യൂ.

Article Summary: Congress moves to reclaim Mattannur seat from RSP, considering Farzeen Majeed as a potential candidate to challenge CPM stronghold.

#Mattannur #Congress #FarzeenMajeed #KannurPolitics #KeralaAssemblyElection #UDF