കണ്ണൂർ: (KVARTHA) തളിപ്പറമ്പ് താലൂക്ക് ആശുപത്രിയിൽ പ്രസവ വാർഡ് തുറക്കാത്തതിൽ കോൺഗ്രസ് നേതാക്കൾ പ്രതിഷേധം ശക്തമാക്കുന്നു. എം.വി. ഗോവിന്ദൻ എം.എൽ.എ ജനങ്ങളെ തെറ്റിദ്ധരിപ്പിച്ചെന്നും വാഗ്ദാനം പാഴായിപ്പോയെന്നും അവർ ആരോപിച്ചു.

ഫെബ്രവരി ഏഴിന് പ്രസവ വാർഡ് തുറക്കുമെന്നും ഇതിനായി ഒരു ഡോക്ടറെ നിയമിച്ചെന്നും എം.വി. ഗോവിന്ദൻ എം.എൽ.എ വാർത്താക്കുറിപ്പിലൂടെ അറിയിച്ചിരുന്നു. എന്നാൽ വാഗ്ദാനം നൽകി ദിവസങ്ങൾ കഴിഞ്ഞിട്ടും ഡോക്ടർ ചുമതല ഏറ്റെടുത്തിട്ടില്ലെന്നും വാർഡ് തുറന്നിട്ടില്ലെന്നും ഡി.സി.സി ജനറൽ സെക്രട്ടറിമാരായ നൗഷാദ് ബ്ലാത്തൂരും അഡ്വ. രാജീവൻ കപ്പച്ചേരിയും പറഞ്ഞു. ഇതിനെതിരെ എട്ടാം തീയതി ഇരുവരും ആശുപത്രിക്ക് മുന്നിൽ ഉപവാസ സമരം നടത്തിയിരുന്നു. ചൊവ്വാഴ്ച ആശുപത്രിയിൽ വീണ്ടും അന്വേഷിച്ചപ്പോഴും വാർഡ് തുറന്നിട്ടില്ലെന്നും ഡോക്ടർമാർ എത്തിയിട്ടില്ലെന്നും അവർ അറിയിച്ചു.

ജനങ്ങളെ വഞ്ചിക്കുന്ന നടപടി പ്രതിഷേധാർഹമാണെന്നും ഉത്തരവാദിത്തം നിറവേറ്റാത്ത എം.എൽ.എയുടെ നടപടി അംഗീകരിക്കാനാവില്ലെന്നും നേതാക്കൾ പത്രക്കുറിപ്പിൽ പറഞ്ഞു. തളിപ്പറമ്പ് മുനിസിപ്പാലിറ്റിയിലെ ജനന രജിസ്റ്റർ പ്രകാരം 2024 ഡിസംബർ 16-നാണ് തളിപ്പറമ്പ് ഗവൺമെന്റ് ആശുപത്രിയിൽ അവസാനമായി പ്രസവം നടന്നത്. പ്രസവ വാർഡ് അടച്ചതിന് പിന്നിൽ ഗൂഢാലോചനയും സാമ്പത്തിക താൽപ്പര്യവുമുണ്ടെന്നും ഭരണകൂടത്തിന്റെ അനാസ്ഥക്കെതിരെ ശക്തമായ സമര പരിപാടികൾ ആരംഭിക്കേണ്ടത് പൊതുജനങ്ങളുടെ ക്ഷേമത്തിനും അവകാശ സംരക്ഷണത്തിനും അനിവാര്യമാണെന്നും അവർ കൂട്ടിച്ചേർത്തു. പ്രസവ വാർഡ് തുറക്കുന്ന വരെ ഉപവാസ സമരം ആരംഭിക്കുമെന്നും നേതാക്കൾ അറിയിച്ചു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Congress leaders protest the non-opening of the labor room at Taliparamba Taluk Hospital, accusing the MLA of failing to fulfill promises.

#Taliparamba, #CongressProtest, #LaborRoom, #Hospital, #KeralaNews, #HealthCare