(KVARTHA) പാകിസ്താൻ തീവ്രവാദത്തെക്കുറിച്ച് അന്താരാഷ്ട്ര വേദികളിൽ വിശദീകരിക്കാനായി കേന്ദ്ര സർക്കാർ നിയോഗിച്ച പ്രതിനിധി സംഘത്തിലേക്കുള്ള ക്ഷണം സ്വീകരിച്ച ശശി തരൂരിനെതിരെ രൂക്ഷ വിമർശനവുമായി കെപിസിസി അച്ചടക്ക സമിതി അധ്യക്ഷൻ തിരുവഞ്ചൂർ രാധാകൃഷ്ണൻ രംഗത്ത്. 

കോൺഗ്രസ് പാർലമെന്ററി പാർട്ടി അംഗം എന്ന നിലയിൽ, തരൂർ എല്ലാ കാര്യങ്ങളും പാർട്ടിയെ അറിയിക്കേണ്ടതുണ്ടെന്നും, പാർട്ടിയെ തള്ളിപ്പറഞ്ഞ് മുന്നോട്ട് പോകരുതെന്നും അദ്ദേഹം പറഞ്ഞു. തരൂരിന്റെ ഇത്തരം നീക്കങ്ങൾ പാർട്ടിയെ ചവിട്ടിമെതിക്കുന്നതിന് തുല്യമാണെന്നും, കോൺഗ്രസ് അംഗമെന്ന നിലയിൽ പ്രാഥമിക ഉത്തരവാദിത്തങ്ങൾ നിറവേറ്റണമെന്നും തിരുവഞ്ചൂർ ഓർമ്മിപ്പിച്ചു. 

അന്താരാഷ്ട്ര തലങ്ങളിൽ പ്രവർത്തിക്കുമ്പോൾ പാർട്ടിയുടെ അംഗീകാരം നേടേണ്ടത് അത്യാവശ്യമാണ്. ഏത് തലം വരെ വേണമെങ്കിലും അദ്ദേഹത്തിന് പോകാം, പക്ഷേ കോൺഗ്രസ് അംഗമായിരിക്കുമ്പോൾ പാർട്ടിക്ക് വിധേയനാകണം.

എഐസിസി ജനറൽ സെക്രട്ടറി കെ.സി. വേണുഗോപാലിനെതിരെ നടക്കുന്ന ആക്രമണങ്ങളെയും തിരുവഞ്ചൂർ വിമർശിച്ചു. കെ.സി. വേണുഗോപാൽ ചുമതലകളിൽ നേട്ടം കൊയ്യുമ്പോൾ മൗനം പാലിക്കുകയും, ചെറിയ പാളിച്ചകൾ വരുമ്പോൾ വിമർശിക്കുകയും ചെയ്യുന്ന പ്രവണത ശരിയല്ല. കെ.സി. ദേശീയ തലത്തിലെ കേരളത്തിന്റെ മുഖമാണ്. മലയാളികളുടെ അന്തസ്സാണ് അദ്ദേഹം. 

എഐസിസി ജനറൽ സെക്രട്ടറി എന്ന നിലയിൽ അദ്ദേഹം തന്റെ ചുമതലകൾ കൃത്യമായി നിർവഹിക്കുന്നുണ്ട്. കെ.സി. സംഘടന ജനറൽ സെക്രട്ടറി ആയതിനു ശേഷം കേരളത്തിലെ പാർട്ടിയിൽ തർക്കങ്ങൾ കുറഞ്ഞെന്നും തിരുവഞ്ചൂർ കൂട്ടിച്ചേർത്തു.

ഈ രാഷ്ട്രീയ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Summary: Thiruvanchoor Radhakrishnan criticized Shashi Tharoor for accepting the central government's invitation to represent India on Pakistan terrorism. He urged Tharoor to inform the party of his actions and adhere to party discipline. He also defended K.C. Venugopal against attacks, highlighting his contributions.

#ShashiTharoor, #ThiruvanchoorRadhakrishnan, #CongressKerala, #KCVenugopal, #IndianPolitics, #PoliticalCriticism