ടിവികെ കരൂർ റാലി ദുരന്തം: ബിജെപിയുടെ കരുതലോടെയുള്ള പ്രതികരണം; സഖ്യത്തിനുള്ള സൂചനയോ?

ചെന്നൈ: (KVARTHA) രാജ്യത്തെ നടുക്കിയ ടിവികെ കരൂർ റാലി ദുരന്തത്തിൽ നടനും ടിവികെ നേതാവുമായ വിജയ്‌യെ കുറ്റപ്പെടുത്താതെ ബിജെപി നേതാക്കൾ. സംഭവത്തിൽ ഡിഎംകെയും കോൺഗ്രസും ഉൾപ്പെടെയുള്ള കക്ഷികൾ വിജയ്‌ക്കെതിരെ രൂക്ഷമായ വിമർശനം ഉന്നയിക്കുകയും അറസ്റ്റ് ആവശ്യപ്പെടുകയും ചെയ്യുമ്പോൾ, ബിജെപി കരുതലോടെയുള്ള പ്രതികരണമാണ് നൽകുന്നത്. ടിവികെ എൻഡിഎക്ക് ഒപ്പം ചേരുമെന്ന പ്രതീക്ഷയാണ് ബിജെപിയുടെ ഈ മൗനത്തിന് പിന്നിലെന്നാണ് ഉയരുന്ന ചോദ്യം.

ദുരന്തത്തിന് ഉത്തരവാദികൾ വിജയ്‌യും ടിവികെ നേതാക്കളുമാണെന്ന് ഡിഎംകെ കുറ്റപ്പെടുത്തുന്നു. ആൾക്കൂട്ട ദുരന്തം വരുത്തിവച്ച വിജയ്‌യെ അറസ്റ്റ് ചെയ്യണമെന്നാണ് കോൺഗ്രസിന്റെ ആവശ്യം. 

എന്നാൽ, തങ്ങൾക്കെതിരെ പ്രസംഗങ്ങളിലെല്ലാം വിമർശനം ഉന്നയിച്ച വിജയ്‌ക്കെതിരെ തിരിച്ചടിക്കാൻ കിട്ടിയ അവസരത്തിലും ബിജെപി മൗനം പാലിക്കുകയാണ്. ദുരന്തത്തിൽ പ്രതികരിച്ച ബിജെപി ദേശീയ നേതാക്കളാരും വിജയ്‌യുടെ പേരെടുത്ത് പറയാൻ തയ്യാറായില്ല. 

തമിഴ്‌നാട് ബിജെപിയിലെ പ്രമുഖ നേതാവായ അണ്ണാമലൈ, ദുരന്തം പൊലീസിന്റെ പിടിപ്പുകേടെന്നാണ് കുറ്റപ്പെടുത്തിയത്. വിജയ്‌യെ കുറ്റപ്പെടുത്താനോ പേര് പരാമർശിക്കാനോ അണ്ണാമലൈയും തയ്യാറായില്ല.
ബിജെപിയുടെ തമിഴ്‌നാട് വിശാല പദ്ധതിയുടെ ഭാഗമാണോ ഈ മൗനമെന്നാണ് രാഷ്ട്രീയ കേന്ദ്രങ്ങൾ ഉറ്റുനോക്കുന്നത്. തമിഴകം എന്നും ബിജെപിയുടെ സ്വപ്നഭൂമിയാണ്. തമിഴ്‌നാടിന്റെ പാരമ്പര്യം പേറിയ ചെങ്കോൽ കയ്യിലെടുത്ത പ്രധാനമന്ത്രി നരേന്ദ്ര മോദി, തഞ്ചാവൂരും രാമനാഥപുരവും രാമേശ്വരവും ഉൾപ്പെടെയുള്ള ക്ഷേത്രങ്ങളിൽ പലതവണ സന്ദർശനം നടത്തിയിരുന്നു. കൂടാതെ ഉപരാഷ്ട്രപതി സ്ഥാനത്തേക്ക് തമിഴ്‌നാട്ടിൽ നിന്നുള്ള ഒരാളെ അവരോധിക്കുകയും ചെയ്തു.

എഐഎഡിഎംകെയുടെ പിന്തുണ കൊണ്ട് മാത്രം തമിഴ്‌നാട്ടിൽ ഭരണം പിടിക്കാനാകില്ലെന്ന് അറിയാവുന്ന ബിജെപി, ടിവികെ രൂപംകൊണ്ടത് മുതൽ ഈ പാർട്ടിയുമായി സഖ്യമുണ്ടാക്കാൻ ശ്രമിക്കുന്നുണ്ട്. 

ഈ പശ്ചാത്തലത്തിൽ, എല്ലാ വേദിയിലും മോദിയെ വിജയ് ശക്തമായി ആക്രമിക്കുമ്പോഴും തിരിച്ചടിക്കാൻ കിട്ടിയ അവസരത്തിൽ ബിജെപി അനങ്ങാതിരിക്കുന്നത് ശ്രദ്ധേയമാണ്. ആപത്ഘട്ടത്തിൽ സഹായിച്ചു എന്ന തരത്തിൽ ഭാവിയിൽ വിജയ് നന്ദി പ്രകടിപ്പിക്കുമെന്നും ടിവികെ എൻഡിഎയുടെ ഭാഗമാകുമെന്നുമാണ് ബിജെപി പ്രതീക്ഷിക്കുന്നതെന്നാണ് വിലയിരുത്തൽ.

ദുരന്തത്തിൽ സഹായ വാഗ്ദാനവുമായി കേരളം

തമിഴ്‌നാട്ടിലെ കരുരിൽ റാലിക്കിടെയുണ്ടായ ദുരന്തത്തിൽ എല്ലാ സഹായങ്ങളും വാഗ്ദാനം ചെയ്‌ത്‌ കേരളം രംഗത്തെത്തി. തമിഴ്‌നാട് മുഖ്യമന്ത്രി എം കെ സ്റ്റാലിന് മുഖ്യമന്ത്രി പിണറായി വിജയൻ സഹായ വാഗ്ദാനം ചെയ്‌ത്‌ കത്തയച്ചു. 

ആരോഗ്യ പ്രവർത്തകരുടെ ടീമിനെ അയക്കാൻ കേരളം സന്നദ്ധത അറിയിച്ചിട്ടുണ്ട്. മുഖ്യമന്ത്രിയുടെ നിർദേശാനുസരണം തമിഴ്‌നാട് ആരോഗ്യ മന്ത്രി മാ സുബ്രഹ്മണ്യത്തെ ഫോണിൽ വിളിച്ചെന്നും രക്ഷാപ്രവർത്തനത്തിന് കേരളത്തിന്റെ പൂർണ പിന്തുണ അറിയിച്ചെന്നും ആരോഗ്യ മന്ത്രി വീണാ ജോർജ് പറഞ്ഞു.

കരൂർ റാലി ദുരന്തത്തോടുള്ള ബിജെപിയുടെ പ്രതികരണത്തെക്കുറിച്ച് നിങ്ങളുടെ കാഴ്ചപ്പാട് എന്താണ്? ഈ വാർത്ത സുഹൃത്തുക്കളുമായി പങ്കിടൂ.

Article Summary: BJP avoids criticizing Vijay post-Karur tragedy, hinting at a potential alliance.

#TVKKarurTragedy #BJPVijayAlliance #TamilNaduPolitics #NDATVK #Annamalai #KeralaHelp