തൊടുപുഴ: (KVARTHA) പശ്ചിമഘട്ട മേഖലയെ പരിസ്ഥിതി ലോല പ്രദേശമാക്കുന്നത് സംബന്ധിച്ച കേന്ദ്ര സർക്കാരിന്റെ തീരുമാനത്തിനെതിരെ കോൺഗ്രസ് ഭരിക്കുന്ന വണ്ടന്മേട് പഞ്ചായത്ത് നടത്തിയ പ്രതിഷേധത്തിൽ ബിജെപി ജില്ലാ വൈസ് പ്രസിഡൻറ് പങ്കെടുത്തത് വിവാദമായി. സ്വന്തം പാർട്ടിയുടെ നയത്തിന് എതിരായി പ്രതിപക്ഷ പാർട്ടികളോടൊപ്പം നിന്ന കെ കുമാറിനെതിരെ നടപടി വേണമെന്ന് ബിജെപിയിൽ നിന്ന് തന്നെ ആവശ്യം ഉയർന്നതായാണ് വിവരം.

ജില്ലയിലെ പ്രബല സമുദായമായ കത്തോലിക്കാ സഭയും പ്രതിപക്ഷ പാർട്ടികളും പരിസ്ഥിതി ലോല വിഷയത്തിൽ ശക്തമായ സമരം നടത്തുന്ന സാഹചര്യത്തിൽ, ബിജെപി നേതാക്കൾ പാർട്ടിയുടെ നയം വിശദീകരിക്കാനുള്ള ശ്രമങ്ങളിൽ ഏർപ്പെട്ടിരിക്കെയാണ് ഈ സംഭവം ഉണ്ടായത്. ജില്ലാ നേതൃത്വത്തിന് ഈ സാഹചര്യം വലിയ തലവേദനയായിരിക്കുകയാണ്.

പശ്ചിമഘട്ടത്തിലെ 56,825.7 ചതുരശ്ര കിലോമീറ്റർ പ്രദേശം പരിസ്ഥിതി ലോല പ്രദേശമാക്കുന്നതിനായി കരട് വിജ്ഞാപനം  പുറത്തിറക്കിയ കേന്ദ്ര സർക്കാരിന്റെ തീരുമാനത്തെതിരെയാണ് വണ്ടന്മേട് പഞ്ചായത്ത് പ്രതിഷേധം സംഘടിപ്പിച്ചത്. പഞ്ചായത്ത് ഭരണസമിതിയുടെ നേതൃത്വത്തിൽ നടന്ന റാലിയും പൊതു സമ്മേളനവും വലിയ രീതിയിൽ ശ്രദ്ധിക്കപ്പെട്ടു.

ബിജെപി നേതാവ് കെ കുമാർ പങ്കെടുത്തത് സംബന്ധിച്ച വാർത്തകളും ചിത്രങ്ങളും മാധ്യമങ്ങളിൽ വ്യാപകമായി പ്രചരിച്ചതോടെ പാർട്ടിക്ക് തിരിച്ചടിയായി. ജില്ലയിലെ മുതിർന്ന നേതാവ് തന്നെ പങ്കെടുത്തതാണ് ജില്ലാ നേതൃത്വത്തെ കൂടുതൽ പ്രതിസന്ധിയിലാക്കിയിരിക്കുന്നത്.

#BJP #Kerala #ecosensitiveszone #esteWrnGhats #protest #controversy #politics